អំពើហិង្សាលើរ៉ូហ៊ីងយ៉ា ៖ អង្គការសហប្រជាជាតិចង់បញ្ជូនជាបន្ទាន់ភ្នាក់ងារអង្កេតទៅភូមា
នៅថ្ងៃសុក្រទី ២៤មីនា ២០១៧នេះ អង្គការសហប្រជាជាតិបានរៀបចំបង្កើតឱ្យមាន ភ្នាក់ងារអន្តរជាតិឯករាជ្យមួយ ដែលនឹងត្រូវបញ្ជូនទៅបំពេញការងារនៅក្នុងប្រទេសភូមា ដ៏ឆាប់ៗបំផុតខាងមុខនេះ។ បេសកកម្មរបស់ពួកគេគឺចុះទៅធ្វើអង្កេតលើហេតុការណ៍ហិង្សា កាប់សម្លាប់មនុស្ស កាលពីថ្មីៗនេះ ពីសំណាក់ទាហានរដ្ឋាភិបាលភូមាលើក្រុមជាតិពិន្ធុរ៉ូហ៊ីងយ៉ា ជនជាតិភាគតិចកាន់សាសនាអ៊ីស្លាម គ្មានទឺក គ្មានដី គ្មានសញ្ជាតិ។
ចុះផ្សាយនៅថ្ងៃ៖
ស្តាប់ - ០១:៥៩
សេចក្តីសម្រេចបង្កើតភ្នាក់ងារអង្កេតឯករាជ្យ ត្រូវបានអនុម័តឡើង តាមរយៈការព្រមព្រៀងគ្នា ដោយគ្មានឆ្លងកាត់ការបោះឆ្នោតនៅក្រុមប្រឹក្សាសិទ្ធិមនុស្ស នៃអង្គការសហប្រជាជាតិទេ។ ប្រទេសខ្លះ ដូចយ៉ាងចិន និងឥណ្ឌា បានដកខ្លួនចេញពីសេចក្តីសម្រេចចិត្តនេះ។ ចំណែកជប៉ុន រក្សាសិទ្ធិរង់ចាំមើលលទ្ធផលអង្កេតជាតិរបស់ភូមាសិន មុននឹងសម្រេចថាចាំបាច់គួរបញ្ជូននិងចូលរួមក្នុងបេសកកម្មអង្កេតនេះឬអត់។
តាមរយៈសេចក្តីសម្រេចដែលស្នើឡើងដោយសហភាពអឺរ៉ុប ក្រុមប្រឹក្សាសន្តិសុខ បានសម្រេចពន្លឿនការបញ្ជូនភ្នាក់ងារអង្កេតអន្តរជាតិឯករាជ្យមួយ ជាបន្ទាន់ ទៅកាន់ប្រទេសភូមា ដើម្បីបានដឹងអំពីដំណើរដើមទងនិងបរិបទនៃអំពើហិង្សា រំលោភសិទ្ធិមនុស្ស របស់ទាហាននិងកម្លាំងរក្សាសន្តិសុខ នៅក្នុងប្រទេសជាពិសេសនៅក្នុងរដ្ឋរ៉ាឃីន ក្នុងក្របខ័ណ្ឌនៃការបើកយុទ្ធនាការយោធាទ្រង់ទ្រាយធំ នៅតាមព្រំដែន។
បើតាមឧត្តមស្នងការការពារសិទ្ធិមនុស្សនៃអង្គការសហប្រជាជាតិ យុទ្ធនាការ បើកធ្វើតាំងពីថ្ងៃទី ១០តុលា ២០១៦ នៅរដ្ឋរ៉ាឃីនដែលមានជនជាតិរ៉ូហ៊ីងយ៉ារស់នៅច្រើន មានទម្រង់ជាបោសសម្អាតជាតិពិន្ធុ និងមានទម្រង់ស្រដៀងឧក្រិដ្ឋកម្មប្រឆាំងមនុស្សជាតិ។ យោធានិងប៉ូលិសភូមាទាំងនោះ ត្រូវជាប់សង្ស័យថា បានប្រើអំពើហិង្សា លើជនជាតិរ៉ូហ៊ីងយ៉ា ដោយបានចាប់ឃុំឃាំង ធ្វើទារុណកម្ម ដូចសត្វធាតុ រំលោភ បំពានផ្លូវភេទគ្រប់បែបយ៉ាង ព្រមទាំងសម្លាប់ដោយគ្មានឆ្លងកាត់តុលាការ ដោយចិត្តពាល ធ្វើឱ្យមានការរត់ភៀសខ្លួនដោយបង្ខំ និងបំផ្លិចបំផ្លាញផ្ទះសម្បែងដោយខុសច្បាប់។
បេសកកម្មអង្កេតនេះ នឹងផ្តល់របាយការណ៍ផ្ទាល់មាត់ នៅខែកញ្ញា និងផ្តល់របាយការណ៍លម្អិតជាលាយលក្ខណ៍អក្សរ ទៅឱ្យអង្គមហាសន្និបាតក្រុមប្រឹក្សាសិទ្ធិមនុស្ស នៅខែកុម្ភៈឬមីនា ២០១៨។
ឯកអគ្គរដ្ឋទូតភូមាប្រចាំក្រុមប្រឹក្សាសន្តិសុខ បានបរិហារការបង្កើតភ្នាក់ងារអង្កេតនេះ ដោយយល់ថាជាសកម្មភាពមិនអាចទទួលយកបាន ព្រោះបេសកកម្មមិនស៊ីនឹងស្ថានការណ៍។ ស្ថានការណ៍នៅរ៉ាឃីនដែលមានស្ថិរភាពវិញ ហើយរបាយការណ៍របស់គណៈកម្មការជាតិស្តីអំពីហិង្សានេះ ក៏នឹងត្រូវបង្ហាញនៅខែសីហាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ