ចិន៖បែកធ្លាយរឿងអាស្រូវថ្មីពាក់ព័ន្ធនឹងការជួញដូរកាកសំណល់របស់មន្ទីរពេទ្យ
នៅក្នុងប្រទេសចិន រឿងអាស្រូវថ្មីមួយទើបបានបែកធ្លាយយ៉ាងខ្ចរខ្ចាយទាក់ទងនឹងការជួញដូរកាកសំណល់របស់មន្ទីរពេទ្យ។ បន្ទាប់ពីបានបើកការស៊ើបអង្កេតរយៈពេល ៦ខែមក ប៉ូលិសបានចាប់ខ្លួនមនុស្សប្រមាណជា ១២នាក់ក្នុងខេត្តចំនួន ៥ ពីបទជាប់ពាក់ព័ន្ធនឹងការជួញដូរកាកសំណល់របស់មន្ទីរពេទ្យ។ រឿងអាស្រូវមួយត្រូវបានទម្លាយឡើងដោយទស្សនាវដ្តីចិនមួយឈ្មោះ Outlook។ កន្លងមក ក៏ធ្លាប់កើតមានរឿងអាស្រូវស្រដៀងគ្នានេះទាក់ទងនឹងថ្នាំវ៉ាក់សាំងហួសកំណត់ប្រើប្រាស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ទស្សនាវដ្តី Outlook បានរៀបរាប់ថា គឺជាមួយនឹងការភាយក្លិនស្អុយអាសើចដែលក្រុមអ្នកស៊ើបអង្កេតបានចូលទៅឆែកឆេរនៅក្នុងរោងចក្រមួយស្ថិតក្នុងស្រុក Gupei ខេត្ត Hunan។ នៅទីនោះ គេបានប្រទះឃើញកាកសំណល់គ្រប់ប្រភេទដែលមន្ទីរពេទ្យនានាបានប្រើប្រាស់រួចប្រមាណជា ៥០តោន មានដូចសឺរុំាងចាក់ថ្នាំ សំបកប្លោកដាក់សេរ៉ូម សំបកប្លោកដាក់ឈាម និងកាកសំណល់ផ្សេងៗទៀតរបស់មន្ទីរពេទ្យ។ កម្មករដែលធ្វើការនៅក្នុងរោងចក្រនោះមិនមានពាក់ម៉ាស់ ឬមួយក៏ស្រោមដៃដើម្បីការពារទេ។
បន្ទាប់ពីបានលាងសំអាត ជ្រើសរើសតាមប្រភេទ និងកាត់ចិញ្រ្ចាំជាបំណែកតូចៗរួចហើយ កាកសំណល់ទាំងអស់នេះដែលភាគច្រើនជាប្លាស្ទិចនឹងត្រូវគេលក់បន្តទៅឲ្យរោងចក្រដើម្បីយកទៅកែច្នៃ ចម្រាញ់ និងបំឡែងធ្វើជាផលិតផលសម្រាប់បម្រើក្នុងវិស័យឱសថសាស្រ្ត ឬមួយក៏ផលិតផលសម្រាប់ដាក់គ្រឿងឧបភោគបរិភោគ។ ការជួញដូរកាកសំណល់របស់មន្ទីរពេទ្យបានធ្វើឲ្យឈ្មួញចំណេញច្រើនណាស់ ព្រោះប្លាស្ទិចចម្រាញ់ចេញពីកាកសំណល់មន្ទីរពេទ្យទិញក្នុងតម្លៃ ២៦០អឺរ៉ុបក្នុងមួយតោនអាចលក់បានដល់ទៅជាង ៥០០អឺរ៉ូឯណោះ។
កាលពីខែធ្នូ ឆ្នាំ ២០១៦ មានផ្ទុះរឿងអាស្រូវដូចគ្នានេះម្តងហើយ និងដែលត្រូវបានកាសែតក្នុងស្រុកយកទៅចុះផ្សាយយ៉ាងព្រោងព្រាត។ ជាក់ស្តែងក្នុងខេត្ត Nankin ក្រុមឈ្មួញបានលក់កាកសំណល់របស់មន្ទីរពេទ្យចំនួន ៣ ០០០តោនទៅឲ្យបណ្តាញឧក្រិដ្ឋជនដើម្បីយកទៅធ្វើចានប្លាស្ទិច និងគ្រឿងកូនក្មេងលេង។ តាមពិតទៅ មន្ទីរពេទ្យត្រូវប្រមូលកាកសំណល់ និងសម្ភារៈប្រើប្រាស់រួចភាគច្រើនទៅឲ្យក្រុមហ៊ុនមួយដើម្បីលាងសំអាតឲ្យបានត្រឹមត្រូវ។ តែគេសង្កេតឃើញជាទូទៅថា មានមន្ទីរពេទ្យភាគច្រើនចៀសវាងបង់ថ្លៃលាងសំអាតដែលមានតម្លៃថ្លៃ និងសុខចិត្តបិទភ្នែកឲ្យបុគ្គលិកក្នុងមន្ទីរពេទ្យយកទៅលក់ឲ្យឈ្មួញខាងក្រៅដើម្បីបានលុយខ្លះសម្រាប់បំពេញបន្ថែមលើប្រាក់ខែដែលមានតិចតួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ