អតីតស្នងការប៉ូលិសជាតិថៃត្រូវកោះហៅឲ្យឆ្លើយបំភ្លឺ ពីលុយដែលខ្ចីពីមេបន
ក្រុមស៊ើបអង្កេតថៃនៃការិយាល័យប្រយុទ្ធប្រឆាំងនឹងការជួញដូរ នៅថ្ងៃព្រហស្បតិ៍នេះបានកោះហៅអតីតស្នងការប៉ូលិសជាតិថៃ ឲ្យទៅឆ្លើយបំភ្លឺ ពីប្រាក់ដែលបានខ្ចីពីមេបន ដ៏ល្បីឈ្មោះ ក្នុងក្រុងបាងកក។ សំណុំរឿងនេះបានឆ្លុះបញ្ចាំងជាថ្មី ពីការស៊ុំគ្រលំរបស់អាជ្ញាធរមានសមត្ថកិច្ច ថៃ ដែលបានបិទភ្នែក បណ្តោយឲ្យឧស្សាហកម្មផ្លូវភេទ រីកកាក់កប ជាថ្នូរនឹងការសូកប៉ាន់ របស់ក្រុមមេបន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
លោកសម យុទ្ធ ពុមប៉ាន់មួង អតីតមេប៉ូលិសជាតិថៃ បានបង្ហាញខ្លួន នៅថ្ងៃនេះ នៅចំពោះ មុខក្រុមអ្នកស៊ើបអង្កេតរបស់ការិយាល័យប្រយុទ្ធប្រឆាំងការជួញដូរ ដែលចង់ដឹងអំពីទឹកប្រាក់ ជិត ១០លានដុល្លារ ដែលលោកសម យុទ្ធ បានខ្ចីពីម្ចាស់បន ដ៏ល្បីឈ្មោះមួយកន្លែង របស់ក្រុងបាងកក។
ការិយាល័យប្រយុទ្ធប្រឆាំងការជួញដូរ បានកោះហៅអតីតស្នងការប៉ូលិសជាតិថៃ នៅបន្ទាប់ពីប៉ូលិសបានបើកការបង្រ្កាប បិទផ្ទះបនដ៏មហាសាលមួយ ក្នុងក្រុងបាងកក កាលពីខែ មករាមុន។ នៅ ប្រទេសថៃ ពេស្យាចារជាអំពើខុសច្បាប់ ប៉ុន្តែ គេកម្រនឹងឃើញការបង្រ្កាបទៅលើផ្ទះបន ដែលចូលរួមចំណែកធ្វើឲ្យឧស្សាហកម្មផ្លូវភេទ រីកដុះដាល និងជាប្រភពជំនួញ មានបាន របស់មហាសេដ្ឋីថៃ។
សូមអាន៖ឧបនាយករដ្ឋមន្រ្តី ថៃជួបរឿងអាស្រូវពុករលួយដោយសារពាក់នាឡិកាម៉ាកថ្លៃ
ប៉ូលិសថៃ អន្តរាគមន៍ ចេញមុខបង្រ្កាប ផ្ទះបន តែនៅពេលណាដែលគេលឺថា មានកុមារក្រោមអាយុបម្រើការផ្លូវភេទ តែប៉ុណ្ណោះ។ ជាក់ស្តែង នៅខែមករា ប៉ូលិសបានសម្រុកបិទផ្ទះបន Victoria Secret ដ៏ធំសម្បើមក្នុងក្រុងបាងកក។ នៅក្នុងចំណោមស្រ្តីបម្រើផ្លូវភេទ ១០០នាក់ ដែលប៉ូលិសឃាត់ខ្លួន មាន១៣នាក់ ជាជនរងគ្រោះដោយការជួញដូរមនុស្ស។ នៅក្នុងប្រតិបត្តិកាចុះបិទផ្ទះបន គេរកឃើញផងដែរបញ្ជីររាយឈ្មោះប៉ូលិស និងមន្រ្តីរដ្ឋាភិបាល ដែលបានទទួលសំណូក តាំងពីអាហារ ភេសជ្ជៈ ឬម៉ាស្សារបស់ផ្ទះបន។
នៅសប្តាហ៍មុន លោកសមយុទ្ធ ដែលពេលនេះបានក្លាយជាប្រធានសមគមបាល់ទាត់ នៅប្រទេសថៃ បានលើកឡើងពីមិត្តភាពដ៏ល្អូកល្អឺនរបស់លោកជាមួយ Kampol Wirathepsuporn ម្ចាស់ផ្ទះបន ដែលបានឲ្យលោកខ្ចីប្រាក់ដល់ទៅជិត ១០លានដុល្លារ កាលលោកនៅ ធ្វើជាប្រធានប៉ូលិសជាតិថៃ។ សម្រាប់អតីតស្នងការប៉ូលិសជាតិថៃរូបនេះ ដំណើរការខ្ចីប្រាក់ពីមិត្តរបស់លោក បានធ្វើឡើងតាមផ្លូវច្បាប់ ហើយលោកក៏មិនបានជជីកសួរ មិត្តរបស់លោក ពីប្រភពប្រាក់ចំណូល ដែលគេបានឲ្យលោកខ្ចីនោះដែរ។ Kampol Wirathepsuporn ម្ចាស់ផ្ទះបន ហើយនិងប្រពន្ធត្រូវបានប៉ូលិសចាប់ឃុំខ្លួន នៅក្នុងប្រតិបត្តិការចុះបិទផ្ទះបន Victoria secretនៅខែមករា។
រឿងអាស្រូវ ពុករលួយរបស់ប៉ូលិស ដែលទាក់ទងនឹងការជួយញដូរមនុស្ស ឬពេស្យាចារ មិនមែនជារឿងថ្មីក្នុងប្រទេសថៃ ប៉ុន្តែ សំណុំរឿងលើកនេះ កំពុងបន្ថែមធ្វើឲ្យរបបសឹកថៃ បាក់មុខមួយកម្រិតទៀត។ របបសឹកថៃ របស់លោកប្រាយុទ្ធ ចាន់អូចារដែលបានធ្វើរដ្ឋប្រហារ ផ្តួលរំលំ រដ្ឋាភិបាលរបស់លោកស្រីយីងឡាក់ នៅឆ្នាំ ២០១៤ បានសន្យាបោសសម្អាតអំពើពុករលួយក្នុងជួររដ្ឋាភិបាលរបស់លោក។ ប៉ុន្តែ រឿងអាស្រូវពុករលួយ ជាបន្តបន្ទាប់របស់មន្រ្តីជាន់ខ្ពស់រដ្ឋាភិបាល ដែលនៅក្នុងនោះមានផងដែរ ឧបនាយករដ្ឋមន្រ្តីថៃ ដែលជា ដៃស្តាំរបស់លោកប្រាយុទ្ធ ចាន់អូចារ កំពុងធ្វើឲ្យមុខមាត់របស់របបសឹក កាន់តែធ្លាក់ចុះ មួយកម្រិតទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ