ប្រធានាធិបតីហ្វីលីពីនរិះគន់សំណង់ចិន នៅលើកោះសិប្បនិម្មិត នៅសមុទ្រចិនខាងត្បូង
ប្រធានាធិបតីហ្វីលីពីន លោកឌុយទែរតេ នៅថ្ងៃអង្គារម្សិលមិញ បានទាមទារឲ្យចិន កាត់បន្ថយមហិច្ឆតារបស់ខ្លួន នៅក្នុងសមុទ្រចិនខាងត្បូង។ ប្រមុខរដ្ឋាភិបាលហ្វីលីពីនចេញមុខរិះគន់នយោបាយពង្រីកទឹកដីរបស់ចិន នៅសមុទ្រចិនខាងត្បូង។ នេះជារឿង ដ៏កម្រ ដែលកើតមាន នៅក្នុងអាណត្តិរបស់ប្រធានាធិបតី ហ្វីលីពីន លោកឌុយទែរតេ ដែលធ្លាប់តែមានជំហរទន់ភ្លន់ ជាមួយ ចិន ជាថ្នូរនឹងប្រាក់ជំនួយ ហើយនិងការវិនិយោគរបស់ចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ទោះជាប់ឈ្មោះជាភាគីជម្លោះមួយ ជាមួយចិន នៅសមុទ្រចិនខាងត្បូង ប្រមុខរដ្ឋាភិបាលហ្វីលីពីន លោកឌុយទែរតេ កម្រនឹងដំឡើងសំលេងខ្លាំងៗ ដាក់ទីក្រុងប៉េកាំង ដែលរដ្ឋាភិបាលហ្វីលីពីនត្រូវពឹងផ្អែកទាំងក្នុងការដោះដូរពាណិជ្ជកម្ម ហើយនិងការវិនិយោគ។
ប៉ុន្តែ នៅថ្ងៃអង្គារម្សិលមិញ នៅក្នុងពិធីសំណេះសំណាលជាមួយពាណិជ្ជករ និងសហគ្រិន នៅទីក្រុងម៉ានីល លោកប្រធានាធិបតីហ្វីលីពីនស្រាប់តែប្តូរជំហរ និងបានអះអាងថា ចិនគ្មានសិទ្ធិអ្វី ដែលទាមទារគ្រប់គ្រងដែនអាកាស នៅពីលើកោះសប្បនិម្មិតដែលចិនសាងសង់ដោយអន្តោម័ត នៅក្នុងសមុទ្រចិនខាងត្បូងនោះទេ។
“អ្នកមិនអាចសាងសង់បង្កើតកោះមួយ។ ជាកោះសិប្បនិម្មិត និងបន្ទាប់មក អ្នកនិយាយថា ដែនអាកាសនៅពីលើកោះនោះជារបស់អ្នកនោះទេ”។ នេះជាប្រសាសន៍របស់លោកឌុយទែរតេ នៅក្នុងសុន្ទរកថារបស់លោក ដែលវិមានប្រធានាធិបតីហ្វីលីពីនបានចេញផ្សាយ នៅថ្ងៃពុធនេះ។ យ៉ាងណាក៏ដោយ លោកប្រធានាធិបតីឌុយទែរតេ បញ្ជាក់ថា លោកមិនចង់ ឈ្លោះជាមួយចិននោះទេ។
ការថ្លែងរិះគន់ចិន ពីសំណាក់ប្រធានាធិបតីហ្វីលីពីន កើតមាននៅក្រោយពេលមន្រ្តីយោធាហ្វីលីពីនបានតវ៉ាត្អូញត្អែរ ពីការដែល ថា យន្តហោះ កងទ័ពហ្វីលីពីន ត្រូវបានភាគីចិន ព្រមាន ជាញឹកញយ នៅរាល់ពេល យន្តហោះហោះទៅជិតកោះហ្វីលីពីន ដែលស្ថិតនៅមិនឆ្ងាយប៉ុន្មានពីកោះសិប្បនិម្មិតរបស់ចិន នៅសមុទ្រចិនខាងត្បូង។
សូមអាន៖ ប្រធានាធិបតីហ្វីលីពីនគ្មានសង្ឃឹមនឹងអាចប្រឆាំងតទល់នឹងចិន
កាលពីខែឧសភា មន្រ្តីយោធាហ្វីលីពីន ធ្លាប់បានចោទប្រកាន់ម្តងហើយថា ទីក្រុងប៉េកាំងបានរំលោភ មើលស្រាលកងទ័ពហ្វីលីពីន ដែលប្រចាំការនៅលើកោះមួយផ្សេង ទៀត នៅសមុទ្រចិនខាងត្បូង។ នៅខែឧសភាដដែល កងទ័ពចិនបាននាំសព្វាវុធទំនើបៗជាច្រើន មកតាំងទីប្រចាំការនៅលើកោះដែលចិនសាងសង់នៅសមុទ្រចិនខាងត្បូង ដូចជាមីស៊ីលដែលអាចផ្ទុកក្បាលគ្រាប់នុយក្លេអ៊ែរ។ ការតាំងទី សព្វាវុធ របស់ចិន ដែលមានជាលើកទី ១នៅលើកោះសិប្បនិម្មិត នៅសមុទ្រចិនខាងត្បូង បានបង្កឲ្យមានការព្រួយបារម្ភ និងរិះគន់ពីសហគមន៍អន្តរជាតិ ព្រោះថា សមុទ្រចិនខាងត្បូងជាដែនទឹកអន្តរជាតិ ដែលមានឆ្លងកាត់ ១ភាគ៣ នៃកប៉ាល់ទំនិញពិភពលោក។ ទីក្រុងប៉េកាំងដែលបានទាមទារជាម្ចាស់ផ្តាច់មុខលើសមុទ្រចិនខាងត្បូងអះអាងហើយថា ខ្លួនគ្មានមហិច្ឆតាពង្រីកឥទ្ធិពលយោធា នោះទេ និងថា វត្តមានយោធារបស់ចិន នៅសមុទ្រចិនខាងត្បូង គឺដើម្បី ធានាសន្តិសុខ និងសុវត្ថិភាព ចរាចរណ៍ផ្លូវទឹកតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ