ភេរវកម្មឥណ្ឌូណេស៊ី៖អង្គការរដ្ឋអ៊ីស្លាមបានចេញមុខសារភាពជាស្នាដៃរបស់ខ្លួន
នៅក្នុងប្រទេសឥណ្ឌូណេស៊ី ជនប្រដាប់អាវុធមួយក្រុមបានបើកការវាយប្រហារក្រោមទ្រង់ទ្រាយធំមួយក្នុងទីក្រុងហ្សាការតានាព្រឹកថ្ងៃព្រហស្បតិ៍ ទី១៤ មករានេះ។ ប៉ូលិសឥណ្ឌូណេស៊ីបានប្រកាសឲ្យដឹងថា មានមនុស្សស្លាប់សរុបយ៉ាងតិច ៧នាក់ និងការបិទបញ្ចប់ប្រតិបត្តិការវាយបង្រ្កាបលើពួកភេរវជន។ ចំណែកលោកប្រធានាធិបតីឥណ្ឌូណេស៊ីយ៉ូកូ វីដូដូបានចាត់ការវាយប្រហាររបស់ជនប្រដាប់អាវុធថា ជាទង្វើភេរវនិយម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៥៤
គឺនៅចន្លោះម៉ោង ១០ និង៣០នាទីដល់ម៉ោង ១១ ព្រឹកម៉ោងក្នុងប្រទេសឥណ្ឌូណេស៊ីដែលមានជនប្រដាប់អាវុធមួយក្រុមបានបើកការវាយប្រហារក្រោមទ្រង់ទ្រាយធំនៅក្បែរមជ្ឈមណ្ឌលពាណិជ្ជកម្មមួយ ពិសេសនៅទល់មុខហាងកាហ្វេឈ្មោះ Starbucks ចំកណ្តាលទីក្រុងហ្សការតា។ ប្រភពសាក្សីជាច្រើនឲ្យដឹងថា ការវាយប្រហារបានចាប់ផ្តើមពីការបំផ្ទុះគ្រាប់បែកជាច្រើនគ្រាប់ និងបន្តដោយការបាញ់រះយ៉ាងគំហុក។ ភ្លាមៗនោះ កម្លំាងប៉ូលិសក៏បានចុះអន្តរាគមន៍ ហើយក៏មានការបាញ់តគ្នាអស់រយៈពេលជាច្រើនម៉ោងរវាងប៉ូលិស និងជនប្រដាប់អាវុធ។
នៅថ្ងៃរសៀលនេះ ប៉ូលិសឥណ្ឌូណេស៊ីបានប្រកាសជាផ្លូវការថា ប្រតិបត្តិការវាយបង្រ្កាបបានបិទបញ្ចប់ ដោយប៉ូលិសសម្លាប់បានជនខ្មាន់កាំភ្លើងទាំងអស់គ្មានសល់ម្នាក់។ តុល្យការសរុបចុងក្រោយត្រូវបានអ្នកនាំពាក្យប៉ូលិសប្រាប់ឲ្យដឹងថា មានមនុស្សស្លាប់យ៉ាងតិច ៧នាក់ ក្នុងនោះមានជនខ្មាន់កាំភ្លើងចំនួន ៥នាក់ ព្រមទាំងមានអ្នករងរបួសចំនួន ១០នាក់ គឺប៉ូលិស ៥នាក់ ជនបរទេសម្នាក់ និងជនជាតិឥណ្ឌូណេស៊ីចំនួន ៤នាក់។ រូបអ្នកនាំពាក្យប៉ូលិសក៏បានប្រកាសឲ្យដឹងពីការគ្រប់គ្រងស្ថានការណ៌បានទាំងស្រុងនៅពេលនេះ។
ដំណើរការវាយប្រហាររបស់ជនប្រដាប់អាវុធត្រូវបានសាក្សីខ្លះឲ្យដឹងថា ជាភេរវកម្មអត្តឃាតដោយពួកភេរវជនបានទាញបំផ្ទុះគ្រាប់បែកជាប់នឹងខ្លួនគេ និងបានឮសម្លេងផ្ទុះយ៉ាងតិច ៦ដង តែសាក្សីខ្លះទៀតអះអាងថា ជាការគប់គ្រាប់បែករបស់ជនខ្មាន់កាំភ្លើង។ រីឯប៉ូលិសនៅមិនទាន់បានអះអាងយ៉ាងម៉េចទេ ដោយរងចាំលទ្ធផលនៃការស៊ើបអង្កេត។
បង្ការទុកមុនដែរ តែនៅគេចមិនផុត
គេអាចនិយាយបានទេថា អំពើភេរវកម្មក្នុងទីក្រុងហ្សាការតា ប្រទេសឥណ្ឌូណេស៊ីថ្ងៃនេះ ជាអ្វីដែលរដ្ឋអំណាចឥណ្ឌូណេស៊ីធ្លាប់បានបារម្ភ និងរង់ចាំ ពិសេសនៅក្នុងថ្ងៃឆ្លងឆ្នាំចាស់ចូលឆ្នាំថ្មី ២០១៦។ ប៉ូលិសឥណ្ឌូណេស៊ីកំចាត់បានទាន់ពេលនូវគម្រោងរៀបចំអំពើភេរវកម្មក្នុងទីក្រុងហ្សការតាចំថ្ងៃចូលឆ្នាំសកល ហើយពីថ្ងៃទី២៤ ធ្នូ ឆ្នាំ ២០១៥ ដល់ថ្ងៃទី២ មករា ឆ្នាំ ២០១៦ រដ្ឋអំណាចបានដាក់កម្លំាងប៉ូលិស និងទាហានឲ្យប្រុងជើងការកម្រិតខ្ពស់ ដោយពង្រាយកម្លាំងជិត ១៥ម៉ឺននាក់ដើម្បីការពារទីកន្លែងសំខាន់ ពិសេសតំបន់ទេសចរណ៍។
ក្នុងខែធ្នូ ឆ្នាំ ២០១៥ ប៉ូលិសបានឃាត់ខ្លួនមនុស្សសង្ស័យចំនួន ៥នាក់ដែលជាប់ពាក់ព័ន្ធនឹងអង្គការរដ្ឋអ៊ីស្លាម ព្រមទាំង ៤នាក់ផ្សេងទៀតដែលជាប់សង្ស័យនឹងចលនាអ៊ីស្លាមនិយមជ្រុលក្នុងស្រុកឈ្មោះ Jemaah Islamiyah។ ទន្ទឹមគ្នានោះ កម្លាំងប៉ូលិសក៏រឹបអូសបាននូវសម្ភារៈជាច្រើនដែលប្រើសម្រាប់ផលិតជាតិផ្ទុះ ព្រមទាំងទង់មួយរបស់អង្គការរដ្ឋអ៊ីស្លាម។ ផ្ទាំងស៊ីបរបស់ក្រុមអ៊ីស្លាមនិយមជ្រុល គឺប៉ូស្តិ៍ប៉ូលិស មជ្ឈមណ្ឌលពាណិជ្ជកម្ម ក្រុមនិកាយស្ហ៊ីអ៊ីតភាគតិចរស់ក្នុងទឹកដីឥណ្ឌូណេស៊ី និងកងឯកភាពប្រឆាំងភេរវនិយម។
គួររម្លឹកជូនថា ឥណ្ឌូណេស៊ីជាប្រទេសដែលសម្បូរអ្នកកាន់សាសនាអ៊ីស្លាមរស់នៅច្រើនជាងគេក្នុងលោក។ តែតាំងពីក្រោយភេរវកម្មនៅកោះបាលីក្នុងឆ្នាំ ២០០២ ដែលបានផ្តាច់ជីវិតមនុស្សអស់ ២០២នាក់មក រដ្ឋាភិបាលទីក្រុងហ្សាការតាក៏បានប្រញិបប្រញាប់ធ្វើសង្រ្គាមប្រឆាំងនឹងភេរវនិយមដោយខ្លួនឯង។ ៧ឆ្នាំក្រោយមក ពោលក្នុងខែកក្កដា ឆ្នាំ ២០០៩ ការវាយប្រហារលើសណ្ធាគារទំនើបមួយក្នុងទីក្រុងហ្សាការតាបានបណ្តាលឲ្យស្លាប់ ៩នាក់។ ៧ឆ្នាំក្រោយមកទៀត ពោលក្នុងខែមករា ឆ្នាំ ២០១៦ អំពើភេរវកម្មចំកណ្តាលបេះដូងហ្សាការតាបានសម្លាប់មនុស្សយ៉ាងតិច ៧នាក់ ក្នុងនោះមានភេរវជន ៥នាក់។
អង្គការរដ្ឋអ៊ីស្លាមចេញមុខសារភាពជាស្នាដៃរបស់ខ្លួន
បើគេជឿលើទីភ្នាក់ងារសារព័ត៌មានមួយឈ្មោះ Aamaaq ដែលស្និតនឹងអង្គការរដ្ឋអ៊ីស្លាមឲ្យដឹងថា ក្រុមយុទ្ធជនអង្គការរដ្ឋអ៊ីស្លាមបានបើកការវាយប្រហារក្នុងទីក្រុងហ្សាការតានៅព្រឹកមិញដោយសំដៅលើជនបរទេស និងកម្លាំងសន្តិសុខដែលទទួលបន្ទុកជាអ្នកការពារសន្តិសុខក្នុងទីក្រុងហ្សាការតា។ គួរជម្រាបជូនថា នៅមុនការប្រកាសទទួលសារភាពរបស់អង្គការរដ្ឋអ៊ីស្លាម ប៉ូលិសឥណ្ឌូណេស៊ីក៏បានទម្លាក់ការសង្ស័យលើក្រុមមួយដែលមានជាប់ពាក់ព័ន្ធនឹងអង្គការរដ្ឋអ៊ីស្លាម។
លោក Tito Karnavian មេប៉ូលិសក្រុងហ្សាការតាបានយល់ឃើញថា គឺក្រុមនិកាយស៊ុយនីតនិយមជ្រុលដែលជាអ្នកទទួលខុសត្រូវនៅក្នុងអំពើភេរវកម្មកាលពីព្រឹកមិញក្នុងទីក្រុងហ្សាការតា។ លោក Tito បានលើកឡើងពីជនជាតិឥណ្ឌូណេស៊ីម្នាក់ឈ្មោះ Bahrun Naiml ដែលកំពុងស្ថិតក្នុងទឹកដីស៊ីរី និងជាអ្នកដែលបានរៀបចំអំពើភេរវកម្មនេះតាំងពីយូរមកហើយ។ គួរជម្រាបជូនថា នៅក្នុងចំណោមភេរវជនស្លាប់ទាំង ៥នាក់ គឺគ្មានជនបរទេសណាម្នាក់ទេ នេះបើតាមលោក Tito។
ការសង្ស័យ ឬមួយក៏ការទម្លាក់កំហុសលើអង្គការរដ្ឋអ៊ីស្លាមមិនមែនជាការយល់ច្រឡំទេ ព្រោះចូរកុំភ្លេចថា មានប្រជាជនឥណ្ឌូណេស៊ីប្រមានពី ៥០០ ទៅ ៧០០នាក់បានទៅចូលរួមជាមួយអង្គការរដ្ឋអ៊ីស្លាមក្នុងទឹកដីស៊ីរី និងអ៊ីរ៉ាក់ ហើយដែលភាគច្រើនបានវិលត្រឡប់ចូលស្រុកវិញ។ សម្រាប់ឥណ្ឌូណេស៊ី ពួកនេះគឺជាដង្កូវចេញពីសាច់ឯងដែលត្រូវកំចាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ