តុលាការបង់ក្លាដែសចេញដីកាចាប់ខ្លួនមេគណបក្សប្រឆាំង
តុលាការបង់ក្លាដែស នៅថ្ងៃពុធនេះ បានចេញដីកាចាប់ខ្លួនលោកស្រី ខាលីដា ហ្ស៊ីយ៉ា (Khaleda Zia) មេគណបក្សប្រឆាំងដ៏សំខាន់នៅក្នុងប្រទេស ពីបទបានប្រព្រឹត្តអំពើពុករលួយក្នុងពេលដែលលោកស្រីកាន់អំណាចនៅក្នុងប្រទេស។ ការសម្រេចចិត្តរបស់តុលាការនេះ អាចនឹងជំរុញឲ្យស្ថានភាពនយោបាយនៅក្នុងប្រទេសដែលកំពុងតែវឹកវរស្រាប់ហើយនោះ កាន់តែធ្លាក់ចុះដុនដាបថែមទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
លោកស្រី ខាលីដា ហ្ស៊ីយ៉ា ប្រធានគណបក្សជាតិនិយម (BNP)ដែលជាបក្សប្រឆាំងដ៏សំខាន់នៅបង់ក្លាដែស ជាច្រើនលើកមកហើយ មិនព្រមចូលខ្លួនតាមការកោះហៅរបស់តុលាការ ដើម្បីឆ្លើយបំភ្លឺនៅជុំវិញសំណុំរឿងពុករលួយនោះទេ។ មូលហេតុនេះហើយបានជាតុលាការ ចេញដីកាចាប់ខ្លួនមេបក្សប្រឆាំង-នេះបើតាមការជូនដំណឹងរបស់មេធាវីរបស់លោកស្រីខាលីដា ហ្ស៊ីយ៉ា។
មេធាវីរបស់លោកស្រីហ្ស៊ីយ៉ា បាននិយាយសង្កត់ថា “នៅក្នុងប្រទេសនេះ ពុំមានទេយុត្តិធម៌” ពីព្រោះដីកាចាប់ខ្លួននេះ ត្រូវបានសម្រេចឡើងដោយតុលាការពិសេសមួយទទួលបន្ទុកសំណុំរឿងពុករលួយ ថ្វីបើកូនក្តីរបស់គាត់ កំពុងតែស្ថិតនៅក្រោមការឃុំឃាំងរបស់អាជ្ញាធរតាំងពីដើមខែមករាក្តី ។
ក្នុងអាយុ៦៩ឆ្នាំ លោកស្រី ហ្ស៊ីយ៉ា បានរងការចោទប្រកាន់ពីបទលួចបន្លំយកលុយប្រមាណជា៥៨ម៉ឺនអឺរ៉ូ នៅក្នុងសំណុំរឿងពីរផ្សេងគ្នា។ ការលួចបន្លំយកលុយនៅខណៈពេលដែលលោកស្រីហ្សីយ៉ា នៅកាន់តំណែងជានាយករដ្ឋមន្ត្រីបង់ក្លាដែសពីឆ្នាំ ២០០១ដល់ ២០០៦។ ប្រឈមនឹងការចោទប្រកាន់នេះ លោកស្រីហ្ស៊ីយ៉ា អាចនឹងជាប់ពន្ធនាគារអស់មួយជីវិត។
គួររំលឹកថាមេគណបក្សប្រឆាំងបង់ក្លាដែសនេះ ត្រូវបានអាជ្ញាធរ ចាប់ដាក់ឃុំឃាំងនៅក្នុងការិយាល័យរបស់គាត់តាំងពីថ្ងៃទី៣មករាមកម៉្លេះ។ នៅថ្ងៃនោះហើយ ដែលមេបក្សប្រឆាំងនេះ បានអំពាវនាវឲ្យអ្នកគាំទ្រខ្លួនរៀបចំធ្វើបាតុកម្មដើម្បីបិទខ្ទប់ការធ្វើដំណើរចរាចរណ៍នៅទូទាំងប្រទេសក្នុងគោលដៅប៉ុនប៉ងផ្តួលរំលំរដ្ឋាភិបាលរបស់លោកស្រីនាយករដ្ឋមន្ត្រី Sheikh Hasina ដែលជាគូប្រជែងរបស់លោកស្រីខាលីដាហ្ស៊ីយ៉ា។
គួររំលឹកថា ការជាប់ឆ្នោតជាថ្មីរបស់លោកស្រីនាយករដ្ឋមន្ត្រីSheikh Hasina កាលពីថ្ងៃទី៥មករាឆ្នាំ២០១៤នោះ ត្រូវបានលោកស្រី ហ្ស៊ីយ៉ា វាយតម្លៃថាជារឿងកំប្លែង។ ហើយការបោះឆ្នោតជំនាន់នោះត្រូវបានប្រព្រឹត្តទៅក្រោមអំពើហិង្សា ជាហេតុបណ្តាលឲ្យមានមនុស្សជាង១០០នាក់ បាត់បង់ជីវិត។ មិនតែប៉ុណ្ណោះ អ្នកគាំទ្របក្សប្រឆាំងជាង១ម៉ឺននាក់ ត្រូវបានអាជ្ញាធរចាប់ខ្លួនរួមទាំងអ្នកដឹកនាំគណបក្សជាតិនិយម(BNP) ជាច្រើនរូបផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ