ចិនបោសសម្អាតសកម្មជនការពារសិទ្ធិកម្មករ នៅមុនទិវាសិទ្ធិមនុស្សអន្តរជាតិ
អាជ្ញាធរចិនមិនស្វាគមសហជីពការពារសិទ្ធិកម្មករ។ តាម អង្គការការពារសិទ្ធិមនុស្ស និងកាសែតក្នុងស្រុកចិន ដែលចុះផ្សាយនៅថ្ងៃអាទិត្យនេះ យ៉ាងហោច សកម្មជនការពារសិទ្ធិកម្មករ ចំនួន៣នាក់ត្រូវបានអាជ្ញាធរចាប់ឃុំខ្លួន ក្នុងបទបង្កអសណ្តាប់ធ្នាប់សាធារណៈ។ បទចោទប្រកាន់ដែលអាជ្ញាធរចិនតែងតែប្រើដើម្បីបង្ក្រាបសកម្មជនឯករាជ្យ ដែលប្រឆាំងរដ្ឋអំណាចចិន។
ចុះផ្សាយនៅថ្ងៃ៖
ស្តាប់ - ០២:២៩
អាជ្ញាធរចិន នៅខេត្តក្វាងទុង បានបើកប្រតិបត្តិការបង្រ្កាប សកម្មជនការពារសិទ្ធិមនុស្ស ក្នុងទ្រង់ទ្រាយធំ ដែលមិនធ្លាប់មានពីមុន មក។ នៅថ្ងៃអាទិត្យ អង្គការការពារសិទ្ធិមនុស្ស និងបណ្តាញសង្គម ក្នុងប្រទេសចិនបានបរិហារការចាប់ឃុំខ្លួនលោកហ្សេង ហ្វៃយ៉ាង ប្រធានសមាគមដើម្បីការពារសិទ្ធិពលករអន្តោប្រវេសន៍។ តាមបណ្តាញការពារសិទ្ធិមនុស្ស ចិន វៃគ័រវ៉ាង លោកហ្សេង ហ្វៃយ៉ាង ហើយនិងសកម្មជនជាស្រ្តីម្នាក់ទៀត ត្រូវបានអាជ្ញាធរចិន ចោទប្រកាន់ថា បានប្រមូលផ្តុំមនុស្សដោយខុសច្បាប់ និងរំខានដល់សណ្តាប់ធ្នាប់សង្គម។ បទចោទប្រកាន់ដែលរដ្ឋអំណាចចិនលើកយកមកប្រើដើម្បីប្រឆាំងនឹងក្រុមបាតុករ ដែលរិះគន់របបគ្រប់គ្រងរបស់បក្សកុម្មុយនិស្តចិន។
នៅខេត្តក្វាងទុង លោកហ្សេង និងបណ្តាញរបស់ខ្លួន បានធ្វើការងារយ៉ាងសកម្ម ដើម្បីជួយទាមទារឲ្យកម្មករអាចទទួលបានប្រាក់ខែសមរម្យ និងប្រាក់លើកទឹកចិត្តដែលថៅកែរោងចក្រកិកកុក មិនចង់បើកឲ្យ។ នៅក្នុងសេចក្តីថ្លែងការណ៍របស់ខ្លួន បណ្តាញការពារសិទ្ធិមនុស្សចិន បានបង្ហាញផងដែរ ពីការចាប់ខ្លួន សកម្មជនម្នាក់ទៀត គឺលោកហេ ស៊ាវបូ អ្នកទទួលខុសត្រូវសមាគមជួយកម្មករដែលរងរបួស ក្នុងពេលធ្វើការ។ តាមទស្សនាវដ្តីក្នុងស្រុក លោកហេ ស៊ាវបូ ត្រូវបានអាជ្ញាធរចិនក្នុងខេត្តក្វាងទុងចាប់ខ្លួន នៅក្នុងបទលួចលុយ នៅក្នុងពេលកាន់តំណែង។
វាមិនមែនចៃដន្យទេ ដែលអាជ្ញាធរបើកការបង្រ្កាបសកម្មជនការពារសិទ្ធិកម្មករនៅខេត្តក្វាងទុង។ ខេត្តក្វាងទុង ជាជង្រុករោងចក្រកាត់ដេរ និងរោងចក្រផលិតទូរស័ព្ទ ដែលប្រើកម្មករចិន រាប់លាននាក់។ ដោយខ្លាចមានការងើបរើបំរះ តវ៉ាពីកម្មករ រាប់រយលាននាក់នៅប្រទេសចិន បក្សកុម្មុយនិស្តបានហាមដាច់ខាត មិនឲ្យសហជីពឯករាជ្យ។ នៅប្រទេសចិន មានតែសហជីពរដ្ឋតែមួយប៉ុណ្ណោះ ដែលធ្វើការដើម្បីកម្មករ។ សហជីពនេះស្ថិតនៅក្រោមការគ្រប់គ្រង និងត្រួតពិនិត្យយ៉ាងតឹងរ៉ឹងបំផុត ពីអាជ្ញាធរ។ តាមសកម្មជនការពារសិទ្ធិមនុស្ស សហជីពរដ្ឋមិនដែលជួយរកយុត្តិធម៌ដល់កម្មករទេ ផ្ទុយទៅវិញ គឺមាននិន្នាការ និងសម្រេចផ្តល់ប្រយោជន៍ទៅឲ្យថៅកែរោងចក្រ។
សម្រាប់China Labour Bulletin ដែលជាអង្គការមានមូលដ្ឋាននៅទីក្រុងហុងកុង វិធានការរបស់អាជ្ញាធរចិន កំពុងធ្វើឲ្យគេព្រួយបារម្ភព្រោះ វាបានធ្វើឡើងនៅក្នុងបរិបទមួយ ដែលសង្គមចិនកំពុងស្គាល់ភាពតានតឹង ដោយសារតែការដើរយឺតៗនៃសេដ្ឋកិច្ចចិន។ “ការចាប់សកម្មជនការពារសិទ្ធិកម្មករនៅពេលនេះ មិនមែនជាដំណោះស្រាយនោះទេ។ គឺវាមានតែធ្វើឲ្យស្ថានភាពធ្លាក់ធ្ងន់ធ្ងរ ធ្វើឲ្យកម្មករមិនសប្បាយចិត្ត កាន់តែខ្លាំងតែប៉ុណ្ណោះ” នេះជាការលើកឡើងរបស់លោកGeoffrey Crothall អ្នកនាំពាក្យរបស់អង្គការ China Labour Bulletin៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ