ឥណ្ឌូណេស៊ី៖ យន្តហោះAir Asia ហោះឡើងក្នុងល្បឿនលឿនខុសពីធម្មតា
ដំណើរការស៊ើបអង្កេតរកមូលហេតុធ្វើឲ្យយន្តហោះឥណ្ឌូណេស៊ី Air Asia ធ្លាក់កាលពីបីសប្តាហ៍មុន កំពុងផ្តោតសំខាន់លើបញ្ហាបចេ្ចកទេស និងកំហុសរបស់អ្នកបើកបរ។ កាលពីល្ងាចថ្ងៃអង្គារ នៅក្រោយថ្លែងទៅកាន់អង្គសភា ពីដំណើរការស៊ើបអង្កេត រដ្ឋមន្រ្តីក្រសួងដឹកជញ្ជូនឥណ្ឌូណេស៊ីបាននិយាយប្រាប់អ្នកកាសែត ថាយន្តហោះAir Asia ដែលមានដឹកមនុស្ស១៦២នាក់ បានដោះឡើង ក្នុងល្បឿនមួយយ៉ាងលឿន ខុសពីធម្មតា មុននឹងធ្លាក់ចុះមកវិញ ទៅក្នុងទឹកសមុទ្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ជាមួយនឹងប្រអប់ខ្មៅទាំងពីរដែលស្រង់បានពីក្នុងទឹកសមុទ្រ អាជ្ញាធរឥណ្ឌូណេស៊ីកំពុងផ្តល់តម្រុយបន្តិចម្តងៗពីមូលហេតុដែលអាចបណ្តាលឲ្យយន្តហោះ ឥណ្ឌូណេស៊ី Air Asia ធ្លាក់ចូលទៅក្នុងសមុទ្រ។
កាលពីថ្ងៃអង្គារ រដ្ឋមន្រ្តីក្រសួងដឹកជញ្ជូនឥណ្ឌូណេស៊ី បាននិយាយថា យន្តហោះAir Asia បានហោះឡើង ក្នុងល្បឿនមួយលឿនខ្លាំង ខុសពីធម្មតា។ តាមលោក Ignasius Jonan ទិន្នន័យរបស់រ៉ាដាបង្ហាញថា នៅក្នុងប៉ុន្មាននាទីចុងក្រោយ មុននឹងធ្លាក់ចូលទៅក្នុងទឹកសមុទ្រ យន្តហោះ Air Asia បានហោះឡើងទៅលើ ក្នុងល្បឿន ២០០០ម៉ែត្រក្នុងមួយនាទី។ លោកជឿថា សូម្បីយន្តហោះចម្បាំងក៏កម្រនឹងប្រើល្បឿនដ៏លឿននេះ ដើម្បីហោះឡើងដែរ។
អាជ្ញាធរឥណ្ឌូណេស៊ីបានពន្លយដឹងរួចហើយថា គេកំពុងផ្តោត ស៊ើបអង្កេតទៅលើកំហុសជាយថាហេតុរបស់មនុស្ស ឬបញ្ហារបស់យន្តហោះ ដែលធ្វើឲ្យយន្តហោះA 320ធ្លាក់ និងសម្លាប់អ្នកដំណើរទាំងអស់ កាលពីថ្ងៃទី ២៨ធ្នូកន្លងទៅ។
កាលពីដើមខែមករានេះ ទីភ្នាក់ងារឧតុនិយមរបស់ឥណ្ឌូណេស៊ីធ្លាប់បានលើកឡើងថា អាកាសធាតុជាកត្តាដែលជំរុញឲ្យមានគ្រោះថ្នាក់ធ្លាក់យន្តហោះ Air Asia ដែលចេញដំណើរពីឥណ្ឌូណេស៊ី ទៅប្រទេសសិង្ហបុរី។ តាមអាជ្ញាធរឥណ្ឌូណេស៊ី អ្នកបើកបរយន្តហោះ Air Asia បានសុំសិទ្ធិបង្កើនកំពស់ហោះហើរ ដើម្បីគេចពីដុំពពក និងព្យុះភ្លៀង ប៉ុន្តែ អ្នកបើកបរយន្តហោះមិនបានទទួលចម្លើយភ្លាមៗពីអ្នកត្រួតពិនិត្យដែនអាកាស ដោយសារតែផ្លូវហោះហើរផ្សេងទៀត ត្រូវជាប់រវល់ដោយក្រុមហ៊ុនហោះហើរផ្សេងទៀត។
សូមបញ្ជាក់ដែរថា កាលពី៤ឆ្នាំមុន (ឆ្នាំ ២០០៩) ក្នុងពេលជួបព្យុះភ្លៀង ដូចគ្នា យន្តហោះAir France បានធ្លាក់ចូលទៅក្នុងមហាសមុទ្រអាត្លង់ទិក ដោយសារតែបញ្ហាល្បឿននេះដែរ។ ចំណុចខុសគ្នានៅត្រង់ថា យន្តហោះ Air France ធ្លាក់ចុះក្នុងទឹកសមុទ្រ ដោយសារហោះឡើង ក្នុងល្បឿនទាបពេក ចំណែកយន្តហោះ Air Asia ហោះឡើង ក្នុងល្បឿនខ្ពស់ ជាងការកំណត់សម្រាប់យន្តហោះដឹកអ្នកដំណើរ។ ក្នុងករណីរបស់Air France ឧបករណ៍ស្ទង់ល្បឿនរបស់យន្តហោះ បានផ្តល់ព័ត៌មានខុស ទាក់ទងនឹងល្បឿនរបស់យន្តហោះ។ ប៉ុន្តែ ក្នុងករណីរបស់ Air Asia តើអ្នកបើកបរយន្តហោះមានបានដឹងថា តើខ្លួនកំពុងហោះឡើង ក្នុងល្បឿន លឿន ហួសការកំណត់ដែរឬទេ?
នៅសប្តាហ៍ក្រោយនេះ អាជ្ញាធរឥណ្ឌូណេស៊ីដែលកំពុងសិក្សាលើព័ត៌មាននៅក្នុងប្រអប់ខ្មៅទាំងពីររបស់យន្តហោះ Air Asiaនឹងចេញផ្សាយរបាយការណ៍ ដែលអាចបង្ហាញពីមូលហេតុធ្វើឲ្យយន្តហោះ Air Asiaធ្លាក់សមុទ្រ។ នៅដើមសប្តាហ៍នេះ អាជ្ញាធរបានទាត់ចោលពាក្យព័ត៌មានដែលថា ការធ្លាក់យន្តហោះ Air Asia មានជាប់ទាក់ទងនឹងអំពើភេរវកម្ម។
ថ្លែងនៅមុខអ្នកតំណាងរាស្រ្តសភា នៅថ្ងៃអង្គា រដ្ឋមន្រ្តីក្រសួងដឹកជញ្ជូនឥណ្ឌូណេស៊ីបានលើកឡើងថា នៅក្រោយធ្លាក់យន្តហោះ Air Asia រដ្ឋាភិបាលបានចេញវិធានការថ្មី ដើម្បីត្រួតពិនិត្យលើអាជ្ញាប័ណ្ណហោះហើរ និងសន្តិសុខហោះហើរ។ ការត្រួតពិនិត្យសុខភាពរបស់អ្នកបើកបរយន្តហោះ និងអ្នកត្រួតពិនិត្យអាកាសចរណ៍ក៏ត្រូវគេពង្រឹងផងដែរ។ ម្យ៉ាងទៀត អាកាសចរណ៍ស៊ីវិលឥណ្ឌូណេស៊ីបានហាមឃាត់មិនឲ្យក្រុមហ៊ុន Air Asia ហោះនៅថ្ងៃអាទិត្យ នៅលើផ្លូវដែលយន្តហោះ Air Asiaបានធ្លាក់ កន្លងមក ព្រោះតាមឥណ្ឌូណេស៊ី Air Asiaមិនបានសុំការអនុញ្ញាតិសម្រាប់ហោះហើរលើផ្លូវនេះ នៅថ្ងៃអាទិត្យទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ