ចិន៖ មានស្លាប់ ១១នាក់នៅក្នុងការវាយប្រហារលើស្នងការដ្ឋានប៉ូលិសក្នុងតំបន់ស៊ីងជំាង
នៅថ្ងៃសៅរ៍ ទី១៦ វិច្ឆិកាម្សិលមិញ ជនមួយក្រុមមានគ្នា ៩នាក់ដែលប្រដាប់ដោយពូថៅ និងកំាបិតបាននំាគ្នាចូលវាយប្រហារលើស្នងការដ្ឋានប៉ូលិសក្នុងតំបន់ស្វ័យយ័តស៊ីងជំាង។ ពួកគេបានសម្លាប់ប៉ូលិស ២នាក់ ធ្វើឲ្យរបួសពីរនាក់ តែក៏ត្រូវបានកងប៉ូលិសធ្វើការតបតវិញដោយបានបាញ់សម្លាប់ចោលទំាង ៩នាក់នោះ នេះបើតាមប្រកាសរបស់កាសែតចិនស៊ីនហួរចេញផ្សាយថ្ងៃនេះ។
ចុះផ្សាយនៅថ្ងៃ៖
ស្តាប់ - ០១:៥៤
នេះមិនមែនជាលើកទីមួយទេ ដែលអំពើហិង្សាបានកើតមាននៅក្នុងតំបន់ស្វ័យយ័តស៊ីងជំាងដែលសម្បូរដោយអ្នកកាន់សាសនាអ៊ីស្លាមរស់នៅ ពិសេសជនជាតិភាគតិចអ៊ុយហ្គួរ។ អង្គការការពារជនជាតិភាគតិចអ៊ុយហ្គួរដែលមានទីស្នាក់ការក្នុងប្រទេសអាល្លឺម៉ង់បានបញ្ជាក់ថា មនុស្សចំនួន ៩នាក់ដែលក្រុមប៉ូលិសបានបាញ់សម្លាប់នោះ មិនមែនជាភេរវជនដូចដែលរដ្ឋអំណាចចិននិយាយនោះទេ តែគឺជាបាតុករជនជាតិភាគតិចអ៊ុយហ្គួរ។ អ៊ីចឹងហើយបានជាអង្គការមួយនេះបានអំពាវនាវឲ្យសហគមន៍អន្តរជាតិចាត់វិធានការជាបន្ទាន់ដើម្បីដាក់គំនាបលើរដ្ឋាភិបាលចិនឲ្យឈប់ធ្វើការបាញ់ប្រហារលើហ្វូងបាតុករអ៊ុយហ្គួរ។
សូមជម្រាបជូនថា អំពើហិង្សានៅក្នុងតំបន់ស្វ័យយ័តស៊ីងជំាងត្រូវបានរដ្ឋអំណាចចិនចោទប្រកាន់លើពួកភេរវជន និងពួកអ្នកទាមទារផ្តាច់ទឹកដីនិយម។ តែអង្គការការពារជនជាតិភាគតិចអ៊ុយហ្គួរបានចាត់ទុកអំណះអំណាងរបស់ទីក្រុងប៉េកំាងនេះថា ជាលេសមួយដើម្បីបន្តធ្វើទុក្ខបុកម្នេញលើក្រុមជនជាតិភាគតិចអ៊ុយហ្គួរតែប៉ុណ្ណោះ។ កាលពីខែមេសា មិថុនា និងសីហាកន្លងទៅ អំពើហិង្សារវាងក្រុមប៉ូលិស និងបាតុករអ៊ុយហ្គួរបានបណ្តាលឲ្យមានមនុស្សស្លាប់ប្រមាណជា ១០នាក់។ ធ្ងន់ធ្ងរជាងគេគឺនៅថ្ងៃទី ២៦ មិថុនា ក្រុមបាតុករបានបើកការវាយប្រហារលើប៉ុស្តិ៍ប៉ូលិស និងអាគាររដ្ឋបាលក្នុងស្រុក Lukqun ស្ថិតចម្ងាយ ២៥០គីឡូម៉ែត្រពីក្រុង Urumdi ដែលបណ្តាលឲ្យមានមនុស្សស្លាប់យ៉ាងតិច ៣៥នាក់នាក់។ កាលណោះ រដ្ឋអំណាចចិនបានចាត់ទុកជាទង្វើរបស់កងកម្ម៉ង់ដូភេរវជន។
ជាការកត់សម្គាល់ អំពើហិង្សានៅស៊ីងជំាងនាថ្ងៃម្សិលមិញបានកើតមានឡើង ២សប្តាហ៍បន្ទាប់ពីមានការវាយប្រហារដោយបំផ្ទុះរថយន្តមួយគ្រឿងនៅទីលាន Tiananmen កាលពីថ្ងៃទី៣០ តុលា ដោយបណ្តាលឲ្យមានស្លាប់មនុស្ស ៥នាក់ និងរបួសប្រមាណជា ៤០នាក់ផ្សេងទៀត។ ព្រឹត្តិការណ៍កាលណោះមិនត្រូវបានក្រុមណាមួយប្រកាសថាជាស្នាដៃរបស់ខ្លួនទេ តែប៉ូលិសបានទម្លាក់កំហុសលើជនជាតិភាគតិចអ៊ុយហ្គួរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ