រដ្ឋាភិបាលភូមា៖គ្មានការធ្វើបាបជនជាតិរ៉ូហ៊ីងយ៉ាដូចការចោទប្រកាន់របស់អ.ស.ប.ទេ
គណៈកម្មការស៊ើបអង្កេតរបស់រដ្ឋាភិបាលភូមាបានចេញរបាយការណ៍ នៅថ្ងៃអាទិត្យនេះ សន្និដ្ឋានថា កងកម្លាំងសន្តិសុខជាតិភូមាមិនបានធ្វើបាប កាប់សម្លាប់ រឺក៏ចាប់រំលោភជនជាតិរ៉ូហ៊ីងយ៉ា ដូចដែលរបាយការណ៍អង្គការសហប្រជាជាតិបានលើកឡើង កាលពីខែកុម្ភៈនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
កាលពីខែកុម្ភៈ អង្គការសហប្រជាជាតិបានចុះផ្សាយរបាយការណ៍បង្ហាញពីការធ្វើបាបរបស់កងទ័ពភូមាប្រឆាំងនឹងជនជាតិរ៉ូហ៊ីងយ៉ា។ របាយការណ៍កាលនោះ មានសាក្សីជាជនជាតិរ៉ូហ៊ីងយ៉ាដែលបានភៀសខ្លួនទៅបង់ក្លាដែស។ ជនជាតិរ៉ូហ៊ីងយ៉ាទាំងនេះប្រាប់ថា កងទ័ពភូមាបានធ្វើទារុណកម្ម រំលោភភេទ ដុតផ្ទះ សម្លាប់ជនជាតិរ៉ូហ៊ីងយ៉ា មានទាំងកុមារ ទារក ស្ត្រីនិងមនុស្សចាស់ជនជាតិរ៉ូហ៊ីងយ៉ា។
ថ្ងៃអាទិត្យនេះ គណៈកម្មការស៊ើបអង្កេតរបស់រដ្ឋាភិបាលភូមាបានចុះផ្សាយរបាយការណ៍សន្និដ្ឋានថា គ្មានភស្តុតាងបញ្ជាក់ពីការធ្វើបាប រឺកាប់សម្លាប់ អ្នកកាន់សាសនាអ៊ីស្លាមរ៉ូហ៊ីងយ៉ា នៅភូមាទេ។ គណៈកម្មការស៊ើបអង្កេតភូមា ថែមទាំងចោទទៅអង្គការសហប្រជាជាតិវិញថា ធ្វើអោយអន្តរជាតិយល់ច្រឡំលើភូមា ដោយលំអៀងការសន្និដ្ឋាន មិនបានគិតពីការវាយប្រហារដែលបង្កឡើងដោយភាគីជាសកម្មជនរ៉ូហ៊ីងយ៉ា។
គណៈកម្មការស៊ើបអង្កេតរបស់រដ្ឋាភិបាលភូមា បានធ្វើការអង្កេតលើហិង្សានៅរដ្ឋរ៉ាក់ឃីន ភាគពាយព្យ តាំងតែពីមានហេតុការណ៍ជនជាតិរ៉ូហ៊ីងយ៉ា វាយប្រហារទីស្នាក់ការប៉ូលិសភូមាច្រើនកន្លែង ជិតព្រំដែនបង់ក្លាដែស ក្នុងខែតុលាឆ្នាំ២០១៦។ ក្រោយការវាយប្រហារប្រឆាំងប៉ូលិសភូមា កងទ័ពបានចេញយុទ្ធនាការបង្ក្រាបហិង្សា អស់រយៈពេលច្រើនខែ។ ជនជាតិរ៉ូហ៊ីងយ៉ាជាង៧ម៉ឺន៥ពាន់នាក់បានភៀសខ្លួនទៅបង់ក្លាដែស។
អង្គការសហប្រជាជាតិបានវាយតម្លៃថា យុទ្ធនាការបង្ក្រាបរបស់កងទ័ព ឈានទៅដល់ការបោសសម្អាតជនជាតិភាគតិច ហើយអាចដល់ថ្នាក់ថាជាឧក្រិដ្ឋកម្មប្រឆាំងមនុស្សជាតិទៀតផង។ អង្គការសហប្រជាជាតិ បានសុំចុះទៅស៊ើបអង្កេតហេតុការណ៍ធ្វើបាបជនជាតិរ៉ូហ៊ីងយ៉ា នៅភូមា ប៉ុន្តែ រដ្ឋាភិបាលដឹកនាំដោយលោកស្រី អ៊ុងសាន ស៊ូជី បានជំទាស់សំណើនេះ។ រដ្ឋាភិបាលភូមាប្រាប់ថា ការស៊ើបអង្កេតរបស់គណៈកម្មការរដ្ឋាភិបាលគឺជាចម្លើយគ្រប់គ្រាន់ណាស់ទៅហើយ។
របាយការណ៍ស៊ើបអង្កេតរបស់គណៈកម្មការភូមាចុះផ្សាយថ្ងៃអាទិត្យនេះលើកឡើងទៀតថា សកម្មភាពហួសហេតុក្នុងយុទ្ធនាការកងទ័ពប្រហែលជាបង្កឡើងដោយកងទ័ពថ្នាក់ក្រោមប៉ុណ្ណោះ។ ប៉ុន្តែ ហេតុការណ៍ទាំងនេះហាក់ដូចជាត្រូវបានគេប្រឌិតឡើងទៅវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ