បូកូអារ៉ាម ស្វាគមន៍ជំនួបស្តីពីសន្តិសុខនីហ្សេរីយ៉ា ដោយវាយប្រហាររោងចក្រចិននៅកាមេរូន
សកម្មជនអង្គការភេរវនិយមអ៊ីស្លាមប្រដាប់អាវុធបូកូអារ៉ាម បានបើកយុទ្ធនាការវាយប្រហារមជ្ឈមណ្ឌលឧស្សាហកម្មចិនមួយ ដែលស្ថិតនៅភាគខាងជើងប្រទេសកាមេរូន។ មានស្លាប់ម្នាក់ និងជាង១០នាក់ផ្សេងទៀតទំនងត្រូវបានពួកភេរវជនចាប់ជាចំណាប់ថ្នូរ។ ការវាយប្រហារភេរវកម្មនេះធ្វើឡើងក្នុងខណៈដែលជំនួបកំពូលអន្តរជាតិស្តីពីសន្តិសុខប្រឆាំងនឹងបូកូអារ៉ាម កំពុងប្រព្រឹត្តទៅនៅទីក្រុងប៉ារីស។
ចុះផ្សាយនៅថ្ងៃ៖
ស្តាប់ - ០១:៤០
ស្ថានទូតចិនប្រចាំទីក្រុង Yaoundé បានបញ្ជាក់ព័ត៌មាន ថាពិតជាមានការវាយប្រហារនៅក្រុង វ៉ាហ្សា ចម្ងាយប្រមាណ២០គីឡូម៉ែត្រពីព្រំប្រទល់ជាមួយនីហ្សេរីយ៉ា។ ហេតុការណ៍នេះបានបង្កឱ្យមាន បុគ្គលិកម្នាក់រងរបួស។ នេះបើតាមភ្នាក់ងារព័ត៌មានផ្លូវការចិន Chine Nouvelle។
សូមបញ្ជាក់ថា មានក្រុមហ៊ុនចិនចំនួនពីរកំពុងធ្វើប្រតិបត្តិការនៅតំបន់វ៉ាហ្សា កាមេរូន មួយជាក្រុមហ៊ុនសាងសង់ផ្លូវ និងមួយទៀតជាក្រុមហ៊ុនរុករកប្រេង។ ស្ថានទូតចិន ក៏បានចេញសេចក្តីប្រកាសព័ត៌មានភ្លាមមួយរំពេច ស្តីអំពីវិធានការការពារសន្តិសុខនៅប៉ែកខាងជើងប្រទេសកាមេរូន។ តំបន់ដែលពួកបូកូអារ៉ាម បានដឹកនាំធ្វើភេរវកម្មជាញឹកញយ ប្រឆាំងនឹងបរទេស ៖ កាលពីខែកុម្ភៈឆ្នាំ២០១៣ គ្រួសារបារាំងមួយគ្រួរ មានគ្នា៧នាក់ រាប់ទាំងកូនតូចៗផង ត្រូវបានចាប់ជាចំណាប់ថ្នូរអស់ពីរខែ មុននឹងដោះលែងមកវិញ។ ហើយ គឺ ក្នុងតំបន់ព្រំប្រទល់នេះតែមួយ ដែល ក្រុមបូកូអារ៉ាម បានចាប់ជំរិត សិស្សសាលាស្រីៗជាង២០០នាក់ កាលពីខែមុន ដែលបំផុសសហគមន៍អន្តរជាតិមួយភាគឱ្យរំជើបរំជួល។
សកម្មភាពវាយប្រហាររបស់បូកូអារ៉ាមនេះ បានកើតឡើងក្នុងខណៈដែលនៅទីក្រុងប៉ារីស មានរៀបចំជំនួបកំពូលតូចមួយស្តីពីសន្តិសុខនៅនីហ្សេរីយ៉ា។ ជំនួបកំពូលដែលប្រធានាធិបតីបារាំង នីហ្សេរីយ៉ា នីហ្សេ កាមេរូន ឆាដ និងបេណាំង ព្រមទាំងតំណាងសហរដ្ឋអាមេរិក អង់គ្លេស សហភាពអឺរ៉ុប កំពុងស្វែងរក “ផែនការរួម” សម្រាប់ប្រយុទ្ធប្រឆាំងនឹងក្រុមអ៊ីស្លាមជ្រុលនិយមបូកូអារ៉ាម។ សហរដ្ឋអាមេរិកបានចាត់បញ្ចូលក្រុមនេះ ក្នុងបញ្ជីខ្មៅភេរវនិយមតាំងពីឆ្នាំ២០១៣ ហើយបើតាមប្រធានាធិបតីបារាំង បូកូអារ៉ាម ជាតំណាងការគំរាមកំហែងសន្តិសុខ អាហ្វ្រិកខាងលិច និងអាហ្វ្រិកកណ្តាល យ៉ាងខ្លាំងព្រោះមានទំនាក់ទំនងជាមួយក្រុមភេរវនិយមអាល់កៃដា ម៉ាក្រេប Aqmi៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ