អង្គររងការបំពុលបរិយាកាស តែមិនទាន់ដល់ស្ថានភាពប្រកាសអាសន្ន
អង្គររងការបំពុលបរិយាកាស តែមិនទាន់ដល់ស្ថានភាពប្រកាសអាសន្ន។ នេះជាការស្រាយបំភ្លឺរបស់អាជ្ញាធរអប្សរា ឆ្លើយតបនឹងអត្ថបទនៅលើកាសែត ខេមបូឌៀ ដេលី ចុះផ្សាយកាលពីថ្ងៃទី២១កក្កដាកន្លងទៅ។ អាជ្ញាធរអប្សរាបានឲ្យដឹងថា ខ្លួនបានធ្វើកិច្ចការជាច្រើន ដើម្បីដោះស្រាយបញ្ហាបំពុលបរិយាកាសនៅអង្គរនេះ ដោយសហការជាមួយអង្គការយូណេស្កូ និងប្រទេសម្ចាស់ជំនួយច្រើនទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
ចំនួនភ្ញៀវទេសចរមកកាន់អង្គរកើនឡើង ចំនួនយានយន្តកើនឡើង ការបញ្ចេញផ្សែងពុលតាមរយៈចំហេះយានយន្តក៏កើនឡើងដែរ។ នេះជាស្ថានភាពបច្ចុប្បន្ននៃការបំពុលបរិស្ថាននៅអង្គរ ដែលអាជ្ញាធរអប្សរាលើកឡើង ឆ្លើយតបនឹងអត្ថបទចុះផ្សាយនៅលើកាសែត ខេមបូឌៀ ដេលី ចុះផ្សាយកាលពីថ្ងៃទី២១កក្កដាកន្លងទៅ។
ហេតុផលផ្សេងទៀតដែលនាំឲ្យមានការបំពុលបរិយាកាសដែរនោះ គឺទម្លាប់ដុតស្លឹកឈើ កំទេចកំទីមែកឈើ និងសម្រាម របស់ប្រជាពលរដ្ឋនៅសហគមន៍។ សម្រាម ដែលបច្ចុប្បន្ននេះសម្បូរទៅដោយថង់ផ្លាស្ទិច និងទុយោជ័រមានសារធាតុពុល នាំឲ្យមានគ្រោះថ្នាក់ដល់សុខភាពមនុស្ស សត្វ និងបរិស្ថានផងដែរ។
ក្រៅពីនេះ ការបំពុលបរិយាកាស ធ្វើឲ្យកើតភ្លៀងអាស៊ីត ដែលបង្កការខូចខាតដល់សារធាតុបន្សំនៃថ្ម ធ្វើឲ្យថ្មមានពណ៌ស្រអាប់ ងាយស្រួលបាក់បែក ព្រមទាំងសឹករេចរិលក្បាច់ចម្លាក់។ បើតាមអាជ្ញាធរអប្សរា ការបំពុលបរិស្ថាននៅអង្គរ មិនទាន់ដល់ស្ថានភាពប្រកាសអាសន្ននៅឡើយទេ ព្រោះថា គេនៅប្រទះឃើញស្លែ និងសារធាតុសរីរាង្គផ្សេងទៀត នៅលើថ្មនិងដើមឈើនៅអង្គរនៅឡើយ។ ប្រសិនបើការបំពុលបរិយាកាសមានកម្រិតខ្លាំង នោះស្លែនិងសារធាតុសរីរាង្គផ្សេងទៀតនឹងផុតពូជ។
យ៉ាងណាក៏ដោយ អង្គរក៏មិនមែនជាបេតិកភណ្ឌពិភពលោកតែមួយ ដែលរងការបំពុលបរិយាកាសនោះទេ។ បេតិកភណ្ឌពិភពលោកដទៃទៀត ដូចជាប្រាសាទ Taj Mahal នៅឥណ្ឌា និង Seville Cathedral នៅអេស្ប៉ាញជាដើម គឺសុទ្ធសឹងតែរងការបំពុលបរិស្ថានទាំងអស់។
ប្រឈមមុខនឹងបញ្ហាបំពុលបរិយាកាសនេះ អាជ្ញាធរអប្សរាបានគូសបញ្ជាក់ថា ខ្លួនបានតម្លើងស្ថានីយ៍អាកាសធាតុ ដែលបច្ចុប្បន្នកំពុងតែធ្វើការកត់ត្រាទុកនូវទិន្នន័យអាកាសធាតុ ដូចជាល្បឿនខ្យល់ និងចំនួនទឹកភ្លៀងជាដើម។ ជាមួយគ្នានោះ អាជ្ញាធរអប្សរា ក៏បានសហការជាមួយអង្គការយូណេស្កូ និងប្រទេសម្ចាស់ជំនួយច្រើនទៀត ធ្វើការរួមគ្នាដើម្បីដោះស្រាយផលប៉ះពាល់ជាអវិជ្ជមាន ដោយជម្រុញនិងលើកទឹកចិត្តការប្រើប្រាស់ផលិតផលធម្មជាតិ ដូចជាស្លឹកឈូក ស្លឹកចេក កាត់បន្ថយការប្រើប្រាស់ថង់ប្លាស្ទិក និងពិនិត្យលទ្ធភាពក្នុងការធ្វើទំនើបកម្មប្រព័ន្ធដឹកជញ្ជូនទេសចរ ធ្វើឲ្យណាឲ្យមានផលប៉ះពាល់តិចបំផុតដល់បរិស្ថាន និងមិនប៉ះពាល់ចំណូលប្រជាពលរដ្ឋ ដែលកំពុងប្រកបរបរដឹកជញ្ជូននេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ