ពិព័រណ៍សៀវភៅថ្នាក់ជាតិឆ្នាំនេះ មានដាក់តាំងសៀវភៅច្រើនជាងឆ្នាំមុន
ពិព័រណ៍សៀវភៅថ្នាក់ជាតិឆ្នាំ២០១៤ ដែលមានរយៈពេលបីថ្ងៃ បានបើកជាផ្លូវការហើយនៅរសៀលថ្ងៃសុក្រ ទី២៨វិច្ឆិកានេះ។ ក្រោមប្រធានបទ “ អានខ្ញុំ យល់ពីពិភពលោក” ពិព័រណ៍សៀវភៅថ្នាក់ជាតិឆ្នាំនេះ មានការចូលរួមដាក់តាំងសៀវភៅច្រើនជាងឆ្នាំ២០១៣ កន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
នេះគឺជាពិព័រណ៍សៀវភៅថ្នាក់ជាតិលើកទីបីហើយក្រោមការរៀបចំឡើងដោយសមាគមបណ្ណារក្សនិងឯកសារវិទូកម្ពុជា សហការជាមួយក្រសួងអប់រំ ក្រសួងវប្បធម៌ និង ស្ថាប័នពាក់ព័ន្ធមួយចំនួនទៀត។ ពិព័រណ៍នេះរៀបចំធ្វើរយៈពេលបីថ្ងៃ គឺចាប់ពីថ្ងៃទី២៨ វិច្ឆិកានិងបញ្ចប់នៅថ្ងៃទី៣០ វិច្ឆិកានៅបរិវេណបណ្ណាល័យជាតិក្បែររមនីយដ្ឋានវត្តភ្នំ។
លោកហុក សុទ្ធិ ប្រធានសមាគមបណ្ណារក្សនិងឯកសារវិទូកម្ពុជា បានដឹងថា ការរៀបចំពិព័រណ៍ថ្នាក់ជាតិនេះឡើង គឺដើម្បីឲ្យប្រជាពលរដ្ឋខ្មែរគ្រប់ស្រទាប់វណ្ណៈទាំងអស់យល់ដឹងពីអត្ថប្រយោជន៍របស់សៀវភៅ និងការអានសៀវភៅ។ លោកពិត ចំណាន រដ្ឋលេខាធិការក្រសួងអប់រំដែលបានចូលរួមបើកសម្ពោធពិព័រណ៍សៀវភៅនេះ បានបញ្ជាក់ថា អំណានមានតួនាទីសំខាន់ណាស់ក្នុងការអភិវឌ្ឈន៍ខ្លួនឯង និង សង្គម ដោយអាចឲ្យអ្នកអានយល់ដឹងបានច្រើនពីព្រឹត្តិការណ៍ដែលមាននៅក្នុងសង្គម និង នៅជុំវិញពិភពលោក។ ជាមួយគ្នានេះ លោក ថៃ នរៈសត្យា រដ្ឋលេខាធិការក្រសួងវប្បធម៌ដែលបានចូលរួមសម្ពោធដែរនោះ បានបន្ថែមថា ចំណេះដឹងគ្រប់យ៉ាងគឺកើតចេញពីការអាននេះតែម្តង ហើយបានជំរុញឲ្យប្រជាពលរដ្ឋខ្មែរទាំងអស់បង្កើនការអានរបស់ខ្លួន។
ក្រៅតែពីការដាក់តាំងសៀវភៅគ្រប់ប្រភេទ សមាគមបណ្ណារក្ស និងឯកសារវិទូកម្ពុជាក៏បានរៀបចំកម្មវិធីផ្សេងៗ ដើម្បីផ្សព្វផ្សាយពីសារៈសំខាន់នៃការអានសៀវភៅដល់អ្នកចូលរួមផងដែរ។ ក្នុងនោះមានដូចជា ធ្វើសកម្មភាពនិទានរឿងដល់កុមារកុមារី កម្មវិធីសំណួរចម្លើយទាក់ទងនឹងចំណេះដឹងទូទៅ ការប្រគុំតន្ត្រី និង មានវាលគ្មិនជំនាញៗផ្នែកអក្សរសាស្ត្របកស្រាយអំពីអក្សរសិល្បិ៍ និងកំណាព្យជាដើម។
បើតាមការបញ្ជាក់ពីអ្នករៀបចំកម្មវិធី ពិព័រណ៍សៀវភៅថ្នាក់ជាតិនៅឆ្នាំនេះ មានស្តង់ដាក់តាំងសៀវភៅចំនួន៣៩កន្លែង គឺមានការកើនឡើងចំនួន១៣កន្លែងបើប្រៀបធៀបនឹងឆ្នាំ២០១៣កន្លងទៅ។ លោកហុក សុទ្ធិ បានបញ្ជាក់ថា ពិព័រណ៍សៀវភៅនេះចាប់ផ្តើមពីម៉ោង៨ ព្រឹកដល់ម៉ោង៧ យប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ