សាក្សី៖ មនុស្សជិត២០នាក់ទៀតអាចនៅកប់ក្នុងគំនរបាក់បែកនៃអាគារដែលដួលរលំនៅកំពង់សោម
នៅគ្រាដែលគេរកឃើញថាមនុស្សយ៉ាងហោចណាស់ចំនួន២៥នាក់បានស្លាប់ និង២៤នាក់រងរបួសដែលបានសង្រ្គោះចេញពីអាគារដែលរលំបាក់នៅខេត្តព្រះសីហនុ សាក្សីនៅជិតកន្លែងកើតហេតុអះអាងថា អាចនៅសល់មនុស្សជិត២០នាក់ទៀត កំពុងជាប់ក្នុងគំនរនោះ។ តែជាមួយគ្នានោះ ក្លិនស្អុយដូចជាសាកសពមនុស្សកំពុងសាយភាយចេញពីគំនរខ្មោចអគាររបស់ចិនដែលដួលរលំគ្រាំង កាលពីម៉ោងជិត៥ទៀបភ្លឺថ្ងៃសៅរ៍ចុងសប្តាហ៍មុន។
ចុះផ្សាយនៅថ្ងៃ៖
ស្តាប់ - ០១:៤៦
សាក្សីបាននិយាយថា នៅល្ងាចថ្ងៃទី២២ខែមិថុនា ពោលមុនពេលអាគាររលំបាក់តែប៉ុន្មានម៉ោង គេឃើញមានរថយន្តដឹកកម្មករចូលចំនួន២គ្រឿង ដែលមានមនុស្សជិត២០នាក់ រួមទាំងរថយន្តរបស់ជនជាតិចិនមួយគ្រឿងមានគ្នាជិត១០នាក់។ មកដល់ព្រឹកថ្ងៃចន្ទនេះ គេនៅមិនទាន់រកឃើញមនុស្សទាំងនោះនៅឡើយ ខណៈគេជឿថា អ្នកទាំងនោះអាចជាប់ក្នុងទូរកុងទឺន័រដែលជាបន្ទប់ស្នាក់នៅពិសេសជាងកម្មករដទៃទៀត ដែលបានរកឃើញកន្លងមក។ នេះបើតាម លោក សេង រាជ បុគ្គលិក មជ្ឈមណ្ឌលសម្ព័ន្ធភាពការងារនិងសិទ្ធិមនុស្ស ហៅកាត់ថា សង់ត្រាល់ដែលកំពុងស្ថិតក្បែរកន្លែងកើតហេតុ។
ចំណែកសាក្សីមួយរូបទៀត ក៏បានឲ្យដឹងប្រហាក់ប្រហែលគ្នាថា កម្មកររៀបឥដ្ឋការ៉ូមួយក្រុមជាង១០នាក់ដែលទើបដឹកចូលមុនកើតហេតុនោះ នៅមិនទាន់រកសាកសពឃើញឬចេញមកក្រៅនៅឡើយ ខណៈក្លិនស្អុយបានភាយចេញពីគំនរអាគារបាក់បែកកម្ពស់៧ជាន់នោះ។
បើតាមសាក្សីដដែលគេពិបាកនឹងដឹងពីចំនួនមនុស្សដែលស្នាក់នៅក្នុងអគារសំណង់នោះ ដោយសារតែមេការម្នាក់ដែលកាន់បញ្ជីឈ្មោះកម្មករ បានស្លាប់ភ្លាមៗកាលពីព្រឹកថ្ងៃសៅរ៍។
យោងតាម លោក សុខ សុវណ្ណសាប៊ុង ប្រធានគណបក្សខ្មែរក្រោក ដែលចុះទៅដល់កន្លែងកើតហេតុ បានប៉ាន់ប្រមាណថា មានកម្មករស្នាក់នៅចន្លោះពី៤០ទៅ៦០នាក់ ខណៈគេបានឲ្យដឹងថា សំណង់នេះប្រើកម្មករសរុប១៣០នាក់។
លោក អ៊ី សុខឡេង អភិបាលក្រុងព្រះសីហនុបានប្រាប់វិទ្យុបារាំងអន្តរជាតិRFIនៅថ្ងៃចន្ទថា អាជ្ញាធរ ជឿថានៅមានមនុស្សជាប់ក្នុងអាគារបាក់រលំនោះពី៦ទៅ៨នាក់ទៀតគឺជាជនជាតិចិន ខណៈលោកមិនច្បាស់ពីចំនួនកម្មករជាជនខ្មែរដែលកំពុងជាប់នៅក្នុងនោះនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ