ដំណើរទស្សនកិច្ចនាយករដ្ឋមន្រ្តីចិននៅឥណ្ឌាផ្តោតលើវិស័យពាណិជ្ជកម្ម
នៅថ្ងៃពុធ ១៥ ធ្នូ ២០១០នេះ លោកវេន ជាប៉ាវ (Wen Jiabao) នាយករដ្ឋមន្រ្តីចិន ចាប់ផ្តើមដំណើរទស្សនកិច្ចចំនួន ៣ថ្ងៃ ទៅកាន់ប្រទេសឥណ្ឌា មុននឹងចេញទៅប្រទេសប៉ាគីស្តង់។ នៅក្នុងដំណើរទស្សនកិច្ចនេះ ប្រមុខដឹកនាំចិន និងឥណ្ឌា គ្រោងស្វះស្វែងរកមធ្យោបាយពង្រឹងទំនាក់ទំនងពាណិជ្ជកម្មជាមួយគ្នា។ កិច្ចសន្យាពាណិជ្ជកម្មមួយចំនួនក៏នឹងត្រូវចុះហត្ថលេខាផងដែរក្នុង ឱកាសនោះ។
ចុះផ្សាយនៅថ្ងៃ៖
បទវិភាគរបស់ សេង ឌីណា
ទស្សនកិច្ចរបស់លោកវេន ជាប៉ាវ នៅឥណ្ឌា នៅពេលនេះ គឺជាទស្សនកិច្ចលើកទី១ ក្នុងរយៈពេល ៤ឆ្នាំចុងក្រោយនេះ។ នៅក្នុងដំណើរទស្សនកិច្ចនេះ លោកវេន ជាប៉ាវ នឹងត្រូវអមដំណើរដោយអ្នកជំនួញចិនជាង ៤០០នាក់។
មន្រ្តីអ្នកនាំពាក្យក្រសួងការបរទេសឥណ្ឌាបានលើកឡើងថា សេដ្ឋកិច្ច គឺជាចំណុចគន្លឹះនៃទំនាក់ទំនងរវាងចិន និងឥណ្ឌា។ ប្រទេសទាំងពីរសុទ្ធតែទទួលបានផលប្រយោជន៍អំពីការផ្តោះប្តូរ ពាណិជ្ជកម្មរវាងគ្នាទៅវិញទៅមក។
ចិន និងឥណ្ឌា សុទ្ធសឹងជាប្រទេសកំពុងមានសេដ្ឋកិច្ចលូតលាស់ខ្លាំង និងមានប្រជាជនច្រើនជាងគេបង្អស់ នៅលើពិភពលោក (ចិនលេខ១ ឥណ្ឌាលេខ២) ដែលជាទីផ្សារដ៏មានសក្តានុពលសម្រាប់គ្នាទៅវិញទៅមក។ ការផ្តោះប្តូរពាណិជ្ជកម្មរវាងចិន និងឥណ្ឌា បានកើនឡើងរហូតដល់ ៦០ពាន់លានដុល្លារហើយ នៅឆ្នាំនេះ។ ក៏ប៉ុន្តែ ជញ្ជីងពាណិជ្ជកម្មកំពុងលម្អៀងខ្លាំងទៅខាងចិន (១៦ពាន់លានដុល្លារ កាលពីឆ្នាំ២០០៧-២០០៨) ដែលជាហេតុធ្វើឲ្យឥណ្ឌាទទូចទាមទារឲ្យចិនបន្តបើកចំហរទីផ្សារ បន្ថែមទៀត ដើម្បីទទួលទំនិញឥណ្ឌា។
កាលពីថ្ងៃចន្ទ កន្លងទៅនេះ ឯកអគ្គរដ្ឋទូតចិនប្រចាំប្រទេសឥណ្ឌាបានថ្លែងប្រាប់អ្នកសារព័ត៌មាន ថា ទំនាក់ទំនងរវាងចិន និងឥណ្ឌា ជាទំនាក់ទំនងដែលផុយស្រួយ ងាយនឹងបាក់បែក ប៉ុន្តែ ពិបាកនឹងផ្សះផ្សារ។
បើនិយាយអំពីភូមិសាស្រ្តនយោបាយ ទំនាក់ទំនងរវាងចិន និងឥណ្ឌា គឺពោរពេញទៅដោយភាពចម្រូងចម្រាស។ បញ្ហាព្រំដែន គឺជាប្រធានបទជម្លោះដ៏ធំបំផុតរវាងប្រទេសទាំងពីរ។ ម្យ៉ាងទៀត ឥណ្ឌាមិនសប្បាយចិត្តនឹងចិន ដែលមានទំនាក់ទំនងជិតស្និទ្ធជាមួយប៉ាគីស្តង់ ដែលជាគូសត្រូវដ៏ធំបំផុតរបស់ឥណ្ឌា។ ចំណែកចិនវិញក៏មិនសប្បាយចិត្តដែរ ដែលឥណ្ឌាមានទំនាក់ទំនងកាន់តែជិតស្និទ្ធជាមួយអាមេរិក។
តាំងពីសង្រ្គាមឆ្នាំ១៩៦២មក ឥណ្ឌានៅតែសម្លឹងឃើញចិនថា ជាការគំរាមកំហែងដ៏ធំខាងផ្នែកយោធា។ ឥណ្ឌាក៏មានការបារម្ភផងដែរ ខ្លាចចិនបង្កឧបសគ្គ រារាំងឥណ្ឌាមិនឲ្យទទួលបានអាសនៈជាសមាជិកអចិន្រ្តៃយ៍ នៃក្រុមប្រឹក្សាសន្តិសុខអ.ស.ប. ដែលឥណ្ឌាកំពុងតែទទូចសុំ។
នៅមុនពេល លោកវេន ជាប៉ាវ ចេញដំណើរទៅឥណ្ឌា ឯកអគ្គរដ្ឋទូតចិនប្រចាំប្រទេសឥណ្ឌាបានថ្លែងថា ប្រមុខដឹកនាំចិន និងឥណ្ឌា នឹងជជែកគ្នាទៅលើគ្រប់សំណុំរឿងទាំងអស់។
ក្រោយពីបញ្ចប់ទស្សនកិច្ច នៅឥណ្ឌា លោកវេន ជាប៉ាវ នឹងបន្តដំណើរទៅបំពេញទស្សនកិច្ច នៅប្រទេសប៉ាគីស្តង់ គូសត្រូវរបស់ឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ