សេចក្ដីសម្រេចស្ដីពីសមុទ្រចិនខាងត្បូង៖ ហ្វីលីពីនអំពាវនាវឲ្យភាគីពាក់ព័ន្ធអត់ធ្មត់ ដើម្បីរក្សាសន្តិភាពនិងស្ថិរភាពក្នុងតំបន់
ហ្វីលីពីន កាលពីម្សិលមិញបានអំពាវនាវឲ្យភាគីពាក់ព័ន្ធក្នុងសំណុំរឿងសមុទ្រចិនខាងត្បូងបន្តអត់ធ្មត់ ដើម្បីរក្សាសន្តិភាពនិងស្ថិរភាពនៅក្នុងតំបន់។ ការអំពាវនាវនេះ ធ្វើឡើងភ្លាមៗបន្ទាប់ពីតុលាការអចិន្ត្រៃយ៍នៃអាជ្ញាកណ្ដាលក្រុងឡាអេ ចេញសេចក្ដីសម្រេចឲ្យហ្វីលីពីនឈ្នះចិន ជុំវិញជម្លោះនៅសមុទ្រចិនខាងត្បូង។
ចុះផ្សាយនៅថ្ងៃ៖
ស្តាប់ - ០១:៥៥
ហ្វីលីពីនស្វាគមន៍ចំពោះសេចក្ដីសម្រេចរបស់តុលាការអចិន្ត្រៃយ៍នៃអាជ្ញាកណ្ដាលក្រុងឡាអេ ដែលបានបញ្ជាក់យ៉ាងច្បាស់ថា ចិនគ្មានសិទ្ធិជាប្រវត្តិសាស្ត្រនៅសមុទ្រចិនខាងត្បូង ដូចដែលបានលើកឡើងឡើយ។ នេះគឺជាសេចក្ដីថ្លែងការណ៍របស់រដ្ឋមន្ដ្រីការប្រទេសហ្វីលីពីន លោក Perfecto Yasay កាលពីថ្ងៃអង្គារ។ សម្រាប់លោក Perfecto Yasay សេចក្ដីសម្រេចរបស់តុលាការដូច្នេះ គឺជាជំហានប្រវត្តិសាស្ត្រ ដែលរួមចំណែកដោះស្រាយជម្លោះសមុទ្រចិនខាងត្បូង។ លោក Perfecto Yasay បានអះអាងពីការតាំងចិត្តនិងសេចក្ដីគោរពយ៉ាងមុតមាំរបស់ហ្វីលីពីន ក្នុងការអនុវត្តសេចក្ដីសម្រេចនេះ។ ហើយបើតាមប្រមុខការទូតដដែល ហ្វីលីពីនក៏សូមអំពាវនាវឲ្យគ្រប់ភាគីពាក់ព័ន្ធទាំងអស់ក្នុងសំណុំរឿងសមុទ្រចិនខាងត្បូង បន្តអត់ធ្មត់ ដើម្បីរក្សាសន្តិភាពនិងស្ថិរភាពនៅក្នុងតំបន់។
សូមជម្រាបជូនថា ការអំពាវនាវឲ្យហ្វីលីពីនដូច្នេះ ធ្វើឡើងចំពេលដែលភាគីជម្លោះម្ខាងទៀតគឺចិន បន្តច្រានចោល មិនទទួលស្គាល់សេចក្ដីសម្រេចរបស់តុលាការក្រុងឡាអេ។ ទន្ទឹមនឹងប្រតិកម្មមិនទទួលស្គាល់សេចក្តីសម្រេចរបស់តុលាការ ចិនក៏បានបញ្ជាក់ជាថ្មីពីសិទ្ធិជាប្រវត្តិសាស្រ្តរបស់ខ្លួននៅសមុទ្រចិនខាងត្បូងដែលចិនបានរកឃើញ និងបានធ្វើអាជីវកម្មតាំងពីប៉ុន្មានសតវត្សមកហើយ។ ជំហរបស់ចិន តាំងពីដើមមកហើយនៅក្នុងបញ្ហាជម្លោះសមុទ្រចិនខាងត្បូងនេះគឺ ចង់បន្តដោះស្រាយបញ្ហាដោយសន្តិវិធីជាមួយប្រទេសពាក់ព័ន្ធ និងដោយមិនចាំបាច់មានអាជ្ញាកណ្ដាល។
ជាការពិត ជំហរនេះមិនមែនជារឿងថ្មីសម្រាប់ពិភពលោកឡើយ។ ប៉ុន្តែយ៉ាងណាក៏ដោយ សហគមន៍អន្ដរជាតិបាននាំគ្នាចេញមុខអន្តរាគមន៍ ដោយស្នើឲ្យចិនក៏ដូចជាហ្វីលីពីន គោរពតាមសេចក្ដីសម្រេចរបស់តុលាការអចិន្ត្រៃយ៍នៃអាជ្ញាកណ្ដាលក្រុងឡាអេ។ ការមិនអើពើ មិនទទួលស្គាល់ ឬមិនគោរពចំពោះសេចក្ដីសម្រេចនេះ ត្រូវបានសហគមន៍អន្ដរជាតិ ចាត់ទុកថា ជាការរំលោភលើច្បាប់និងនីតិវិធីអន្ដរជាតិយ៉ាងធ្ងន់ធ្ងរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ