របួស៦នាក់ ក្នុងការវាយប្រហារនៅស្ថានីយរថភ្លើងចិនភាគខាងត្បូង
អំពើហិង្សាដោយកាំបិតបានកើតឡើង នៅស្ថានីយរថភ្លើងចិនមួយកន្លែងទៀតហើយ។ នៅថ្ងៃអង្គារនេះ ក្រុមមនុស្ស៤នាក់ បានចូលទៅវាយប្រហារអ្នកដំណើរ នៅស្ថានីយរថភ្លើងមួយកន្លែង ស្ថិតនៅខេត្តGuangdong កង់តុង ភាគខាងត្បូង ធ្វើអោយមនុស្ស៦នាក់រងរបួស។ ជនល្មើស២នាក់បានរត់គេចខ្លួន កងកម្លាំងចិនបានកំចាត់បានជនល្មើសម្នាក់ និងចាប់ខ្លួនបានម្នាក់ទៀត។
ចុះផ្សាយនៅថ្ងៃ៖
ស្តាប់ - ០១:៤៥
នៅស្ថានីយរថភ្លើង ក្នុងខេត្តGuangdong កង់តុង ភាគខាងត្បូងប្រទេសចិន នៅថ្ងៃអង្គារនេះ កងកម្លាំងចិនបានចូលមកអន្តរាគមន៍ចាប់ក្រុមជនពាល៤នាក់ ដែលបានប្រើកាំបិត វាយប្រហារអ្នកដំណើរ។ ក្រុមប៉ូលិសបានបាញ់លើក្រុមជនល្មើស ធ្វើអោយមានជនល្មើសម្នាក់ស្លាប់។ ជនល្មើសម្នាក់ត្រូវបានចាប់ខ្លួន តែ២នាក់ទៀតរត់រួចខ្លួនបាត់។ យោងតាមប៉ូលិស ជនល្មើសទាំងនោះមិនបានស្តាប់ប៉ូលិសនោះទេ ហេតុនេះហើយទើបប៉ូលិសបានបាញ់លើពួកគេ។
សារព័ត៌មានប្រចាំថ្ងៃរបស់គណបក្សកុម្មុយនិស្តចិន បានចុះផ្សាយថា កាំបិតដែលក្រុមជនពាលបានប្រើវាយប្រហារលើអ្នកដំណើរនោះ ជាកាំបិតដែលអ្នកកាន់សាសនាអ៊ីស្លាមតែងតែប្រើ។ ការវាយប្រហារនេះកើតឡើង ក្រោយពេលរថភ្លើងមួយគ្រឿងធ្វើដំណើរមកពីខេត្តគុនមីង ភាគនិរតី បានចូលមកដល់ស្ថានីយ។ ស្ថានីយរថភ្លើងខេត្តគុនមីង ក៏រងការវាយប្រហារដោយក្រុមបិទមុខ កាលពីខែមិនាដែរ។ កាលណោះ ក្រុមបិទមុខបានប្រើកាំបិតចាក់សម្លាប់អ្នកដំណើរ ធ្វើអោយមានមនុស្ស២៩នាក់ ស្លាប់ និង១៤០នាក់ទៀតរងរបួស។
ការវាយប្រហារដោយកាំបិត នៅស្ថានីយរថភ្លើងខេត្តកង់តុង Guangdong ថ្ងៃអង្គារនេះ កើតឡើងតែមួយសប្តាហ៍ប៉ុណ្ណោះ ក្រោយហេតុការណ៍ផ្ទុះគ្រាប់បែក នៅពីមុខស្ថានីយរថភ្លើងមួយកន្លែង នៅក្រុងអ៊ូលូអ៊ូមឈី ក្នុងខេត្តស៊ីនជាំងភាគខាងលិច។ អំពើហិង្សានៅស្ថានីយរថភ្លើងខេត្តស៊ីនជាំងនេះ បានសម្លាប់មនុស្ស៣នាក់ ២នាក់ក្នុងនោះ ជាភេរវជន។ យោងតាមសារព័ត៌មានចិននានា ក្រុមភេរវជនទាំងនេះ គឺជាក្រុមជ្រុលនិយមសាសនា។ ខេត្តស៊ីនជាំងសំបូរជនជាតិអ៊ុយហ្គួ កាន់សាសនាអ៊ីស្លាមរស់នៅ។ ជនជាតិអ៊ុយហ្កួ តែងបរិហាររដ្ឋអំណាចចិនថា គាបសង្កត់វប្បធម៌ ប្រពៃណី និងសាសនារបស់ពួកគេ។ រដ្ឋអំណាចចិនវិញ បានទំលាក់កំហុសនៃអំពើហិង្សាក្នុងតំបន់ ទៅលើជនជាតិអ៊ុយហ្កួ។
ហេតុការណ៍វាយប្រហារញឹកញាប់នៅស្ថានីយរថភ្លើងចិន ក្នុងរយៈពេលចុងក្រោយនេះ បានធ្វើអោយប្រជាជនភ័យខ្លាចក្នុងការធ្វើដំណើរ។ ប្រធានាធិបតីចិន ដែលបានចុះទៅខេត្តស៊ីនជាំង ចំពេលមានអំពើហិង្សានៅស្ថានីយរថភ្លើង កាលពី១សប្តាហ៍មុននេះ បានអំពាវនាវអោយក្រុមប៉ូលិសចាត់វិធានការខ្លាំងក្លា ប្រឆាំងអំពើភេរវកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ