អាជីវកម្មភ្លុកសត្វកើនឡើង ក្នុងទឹកដីថៃ អាចជំរុញការកាប់សម្លាប់សត្វនៅអាហ្វ្រិក
នៅថ្ងៃពុធនេះ អង្គការ Traffic ជាបណ្តាញត្រួតពិនិត្យលើអាជីវកម្មសត្វនិងរុក្ខជាតិព្រៃ បានបរិហារពីការកើនឡើងនៃអាជីវកម្មភ្លុកសត្វក្នុងទឹកដីថៃ ដែលសបង្ហាញពីការហូរចូលនៃភ្លុកសត្វ មកពីបណ្តាប្រទេសអាហ្វ្រិក។ យោងតាមរបាយការណ៍របស់អង្គការ Traffic ចន្លោះខែមករា ឆ្នាំ២០១៣ ដល់ខែឧសភាឆ្នាំ២០១៤នេះ ផលិតផលភ្លុកសត្វ លក់នៅតាមទីកន្លែងមួយចំនួននៅបាងកក មានការកើនឡើង១ជា៣។ ជាទូទៅ ការកើនឡើងអាជីវកម្មភ្លុកនេះ គឺដើម្បីបំពេញតំរូវការរបស់ភ្ញៀវទេសចរចិននៅបាងកក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
គួររំលឹកថា រដ្ឋាភិបាលក្រុងបាងកក បានអនុញ្ញាតអោយធ្វើអាជីវកម្មភ្លុកដំរីថៃខ្លួនឯង ក្នុងទឹកដីថៃខ្លួនឯង។ ប៉ុន្តែ យោងតាមការវាយតម្លៃរបស់អង្គការ Traffic ទទួលបន្ទុកត្រួតពិនិត្យអាជីវកម្មសត្វនិងរុក្ខជាតិព្រៃ ផលិតផលភ្លុកពី៧០ទៅ៨០ភាគរយ ដែលអង្គការសង្កេតឃើញនៅថៃ មានផលិតផលភ្លុកមួយចំនួន មានទំហំទ្រង់ទ្រាយធំហួសពីទំហំភ្លុកដំរីអាស៊ី។ នេះសបញ្ជាក់ថា ភ្លុកសត្វមួយចំនួន មិនមែនជាភ្លុកសត្វដែលរស់នៅអាស៊ីទេ អាចជាភ្លុកសត្វនាំមកពីអាហ្វ្រិក ដើម្បីលក់ក្នុងទឹកដីថៃ។
របាយការណ៍អង្គការ Traffic បង្ហាញថា ផលិតផលភ្លុកសត្វមានដូចជាគ្រឿងអលង្កា រឺគ្រឿងប្រើប្រាស់ផ្សេងៗ លក់តាមទីកន្លែងមួយចំនួន នៅក្រុងបាងកក បានកើនឡើងទ្វេដង ពីខែមករា ដល់ខែធ្នូ ឆ្នាំ២០១៣។ ហើយពីខែមករាឆ្នាំ២០១៣ ដល់ខែឧសភា ឆ្នាំ២០១៤ ផលិតផលភ្លុកសត្វ បានកើនឡើងរហូត១ជា៣ គឺមានផលិតផលកើនពី៥ពាន់ ដល់១ម៉ឺន៤ពាន់៥រយគ្រឿង។ ក្នុងចំណោមសត្វដំរីក្នុងស្រុកថៃ ប្រមាណ៤០០០ក្បាល ១២០០ក្បាល ជាដំរីឈ្មោលមានភ្លុក។ ដូច្នេះ បរិមាណភ្លុកសត្វកើនឡើង ក្នុងអាជីវកម្មនៅថៃ ពេលនេះ សបង្ហាញថា ភ្លុកភាគច្រើនជាភ្លុក បានមកដោយរំលោភច្បាប់អន្តរជាតិ។ អង្គការត្រាហ្វិកបានអំពាវនាវអោយរដ្ឋាភិបាលក្រុងបាងកក ចាត់វិធានការប្រឆាំងរាល់អាជីវកម្ម ដែលជំរុញអោយមានការកាប់សម្លាប់ដំរីនៅអាហ្វ្រិក។ យោងតាមអង្គការត្រាហ្វិក ថៃអាចព្យួរចោលអាជីវកម្មភ្លុកបណ្តោះអាសន្នបាន។
យោងតាមអនុសញ្ញាស្តីពីអាជីវកម្មអន្តរជាតិលើប្រភេទសត្វ ដែលរងការគំរាមកំហែង ដំរីអាហ្វ្រិកជាង២ម៉ឺនក្បាល ត្រូវបានគេសម្លាប់យកភ្លុក ក្នុងឆ្នាំ២០១៣។ កាលពីឆ្នាំ២០១២ មានជាង២ម៉ឺន២ពាន់ក្បាល ដែលគេសម្លាប់យកភ្លុក។ ថ្វីបើការសម្លាប់ដំរីអាហ្វ្រិកយកភ្លុកមានការថយចុះ ការសម្លាប់ដំរីយកភ្លុក នៅតែជាការគំរាមសត្វព្រៃដដែល។ ថៃធ្លាប់បានសន្យាកាលពីឆ្នាំ២០១៣ថា នឹងធ្វើសកម្មភាពបន្ថែមប្រឆាំងនឹងការជួញដូរភ្លុកសត្វ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ