វិបត្តិសេដ្ឋកិច្ច៖ សហគ្រាសចិនចំនួន៦០០សុំជំនួយពីរដ្ឋាភិបាល
ដំណឹងមិនល្អមានកាន់តែច្រើនឡើងៗសម្រាប់សេដ្ឋកិច្ចចិន។ អត្រាកំណើនសេដ្ឋកិច្ចចិននៅត្រីមាសទី២ឆ្នាំ២០១២មានតែ៧,៦%ប៉ុណ្ណោះ ដែលជាអត្រាទាបបំផុតនារយៈកាលបីឆ្នាំចុងក្រោយនេះសម្រាប់ “រោងចក្រពិភពលោក” មួយនេះ។ នៅខែមិថុនាកន្លងទៅ ការបោះទុនធ្វើវិនិយោគបរទេសបានថុស្រុតចុះអស់៦,៩% ហើយនៅថ្ងៃអង្គារទី១៧កក្កដាម្សិលមិញទៀត សហគ្រាសចិនចំនួន៦០០បានសុំជំនួយពីអាជ្ញាធរនៃខេត្តជឹជាំង ដែលជាខេត្តសម្បូណ៌សប្បាយឋិតនៅប៉ែកខាងកើតនៃប្រទេសចិន។ សហគ្រាចិនទាំងនេះកំពុងឋិតនៅក្រោមគំនរប្រាក់បំណុល ហើយគ្មានលទ្ធភាពនឹងសងធនាគារដែលជាម្ចាស់បំណុលរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
វិបត្តិហិរញ្ញវត្ថុនៃសហគ្រាចិនដែលកំពុងឋិតនៅក្រោមគំនរប្រាក់បំណុលទាំងនេះធ្វើឲ្យគេនឹកដល់វិបត្តិប្រាក់បំណុលដ៏ច្រើនសន្ធឹកសន្ធាប់របស់សហគ្រាសចិនខ្នាតតូចនឹងមធ្យមនៅទីក្រុង វិន ចូវ នៅរដូវក្តៅឆ្នាំមុន។ ខុសគ្នាត្រង់លើកនេះ មិនមែនជាប់ទាក់ទិនតែ សហគ្រាសចិនខ្នាតតូចនឹងមធ្យមប៉ុណ្ណោះទេ វាជាប់ទាក់ទិនជាពិសេសតំបន់នៃទីក្រុង Hangzhou ដែលល្បីថា ជាទីក្រុងរបស់មហាសេដ្ឋីចិនដែលឋិតនៅខាងត្បូងនៃទីក្រុងសៀងហៃ។ ហើយមានសហគ្រាសចិនដល់ទៅចំនួន៦០០បានអំពាវនាវសុំ “ជំនួយបន្ទាន់” ពីអាជ្ញាធរនៃខេត្តជឹជាំង។ នេះបើយោងតាមការផ្សាយឲ្យដឹងដោយគេហទំព័រ 21 Shiji Jingji Baodao” ឬ “សេដ្ឋកិច្ចនៃសតវត្សរ៍ទី២១”។
ក្នុងចំណោម សហគ្រាចិនកំពុងឋិតនៅក្រោមគំនរប្រាក់បំណុលទាំង៦០០នេះ មាន៥០០សហគ្រាសដែលមានទំហំធំជាងគេនៅក្នុងប្រទេសចិន៖ មានជាអាទិ៍ មហាក្រុមហ៊ុនឈ្មោះ Jiayi ឬក្រុម Rongshi ដែលជំនាញខាងផលិតក្តារបន្ទះសម្រាប់សំណង់សាងសង់។ ក្រុមហ៊ុនចិនធំៗទាំងនេះ គ្មានលទ្ធភាពនឹងសងប្រាក់បំណុលរបស់ខ្លួនដែលបានធ្វើឲ្យធនាគារជាម្ចាស់បំណុលភ័យស្លន់ស្លោ។
គួរកត់សម្គាល់ថា កាលពីថ្ងៃទី១៤មិថុនាកន្លងទៅ នគរបាលនៃទីក្រុងហាងចូវបានកោះហៅជនឈ្មោះ Yu Zhongjiang ប្រធានអគ្គនាយកនៃក្រុមហ៊ុនអចលនទ្រព្យ Zhongjiang ។ ជននេះគ្មានប្រាក់គ្រប់គ្រាន់សម្រាប់សងបំណុលរបស់ខ្លួន ប្រាក់បំណុលដែលមានដល់ទៅរាប់រយពាន់លានយ័ន ដែលបានបណ្តាលឲ្យធនាគារជាម្ចាស់បំណុលភ័យឆោឡោ។
ចំណែកឯក្រុមហ៊ុនផលិតខ្សែភ្លើងអគ្គិសនីឈ្មោះ ហ៊ូប៉ៃ គ្មានប្រាក់៨០លានយ័នសម្រាប់សងធនាគារចិននិងធនាគារឈ្មោះ Huaxia ។
សហគ្រាចិនកំពុងឋិតនៅក្រោមគំនរប្រាក់បំណុលទាំងនេះ បានអំពាវនាវសុំអន្តរាគមន៍ពីរដ្ឋាភិបាលចិន សុំឲ្យមានការយល់ព្រម “ព្យួរផ្អាកសងប្រាក់បំណុល” សម្រាប់រយៈកាលបីឆ្នាំ។
ការអំពាវនាវសុំអន្តរាគមន៍បែបនេះជាសញ្ញាមួយបង្ហាញឲ្យឃើញថា ការបញ្ចុះអត្រាការប្រាក់នាំមុខដោយធនាគារកណ្តាលចិន ពុំមានលក្ខណៈគ្រប់គ្រាន់សម្រាប់ជួយជំរុញឲ្យមានការផ្តល់ឥណទានឲ្យសហគ្រាសឡើយ។ ហើយក៏ដូចវិបត្តិសេដ្ឋកិច្ចកាលពីឆ្នាំទៅនៅទីក្រុង វិនចូវ រដ្ឋាភិបាលចិនច្បាស់ជាចូលធ្វើអន្តរាគមន៍ជាពុំខាន ដើម្បីជួយបញ្ចៀសសហគ្រាសចិនធំៗទាំងនោះធ្លាក់ទៅក្នុងសភាពធនក្ស័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ