Netanyahu ទទួលការគាំទ្រច្រើនក្នុងការបោះឆ្នោតសភាមុនអណត្តិនៅអ៊ីស្រាអែល
នៅថ្ងៃអង្គារនេះ ប្រជាជនអ៊ីស្រាអែលប្រហែលជា ៥លាន៦សែននាក់ បាននាំគ្នាទៅបោះឆ្នោត ជ្រើសរើសតំណាងរាស្ត្ររបស់ខ្លួន សំរាប់ដំណើរការលើកទី ១៩ របស់សភា Knesset។ យោងតាមការស្ទាបស្ទង់មតិ នាយករដ្ឋមន្ត្រី Benjamin Netanyahu មកពីគណបក្សស្តាំនិយម Likoud បានទទួលសំលេងគាំទ្រច្រើនជាងគេ ដែលអាចនឹងនាំលោក ឈានទៅកាន់តំណែងសំរាប់អណត្តិទីពីរទៀត។ គេរំពឹងថា គណបក្សស្តាំនិយម ដែលមានគណបក្ស Likoud និង គណបក្សជាតិនិយម Beiteinou របស់បេក្ខជន Avigdor Lieberman ប្រហែលជាអាចទទួលបាន ៣២ ទៅ ៣៥ កៅអី ក្នុងកៅអីទាំង ១២០ ក្នុងសភា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
នៅថ្ងៃអង្គារនេះ ទីស្នាក់ការបោះឆ្នោតប្រហែលជាមួយពាន់កន្លែង បានបើកទ្វាទទួលអ្នកបោះឆ្នោតក្នុងប្រទេស។ ក្នុងបញ្ជីបោះឆ្នោតសភាមុនអណត្តិនេះ គេឃើញមានបេក្ខភាពរបស់គណបក្សចំនួន ៣៤។ ដោយសារថា គ្មានគណបក្សអ៊ីស្រាអែលណាមួយ ដែលនឹងអាចគ្រប់គ្រងប្រទេសបានតែឯកឯងនោះ យោងតាមលទ្ធផលបោះឆ្នោត ដើម្បីរៀបចំសមាសភាពនៃសភា Knesset ប្រធានាធិបតីអ៊ីស្រាអែល លោក Shimon Peres នឹងសំរេចថា តើគួរជ្រើសរើសបេក្ខជនមួយណា នៅក្នុងចំណោមបេក្ខជនមកពីគណបក្សសំខាន់នានា ដែលទទួលបានសំលេងឆ្នោតច្រើន អោយកាន់កាប់អនាគតរដ្ឋាភិបាលចំរុះ។
យោងតាមការស្ទាបស្ទង់មតិ នាយករដ្ឋមន្ត្រី Benjamin Netanyahu មកពីគណបក្សស្តាំនិយម Likoud អាចនឹងជាប់ឆ្នោត ដើម្បីកាន់កាប់តំណែងសំរាប់អណត្តិទីពីរទៀត។ លើសពីនេះ គណបក្សស្តាំនិយមនានា នឹងទទួលបានកៅអីច្រើន នៅក្នុងសភា។
គណបក្ស Likoud របស់លោក Netanyahu និង គណបក្សជាតិនិយម Beiteinou របស់បេក្ខជន Avigdor Lieberman អាចនឹងទទួលបាន ៣២ ទៅ ៣៥ កៅអី ក្នុងចំណោមកៅអីទាំង ១២០ ក្នុងសភា។ បន្ទាប់មក គណបក្សការងារដែលជាគណបក្សកណ្តាលនិយម អាចនឹងទទួលបានកៅអី ពី ១៦ ទៅ ១៧ កៅអី។ គណបក្សកណ្តាលនិយមមួយនេះ បានលើកយកបញ្ហាសេដ្ឋកិច្ច និងសង្គមមកធ្វើជាប្រធានបទនៃការឃោសនាបោះឆ្នោត ហើយបានចៀសវៀង ប្រធានបទទាក់ទងបញ្ហារវាងអ៊ីស្រាអែល និងប៉ាឡេស្ទីន។
ដោយឡែក គេក៏សង្កេតឃើញមាន គណបក្សសាសនាជាតិហ្ស៊ីហ្វ ស្តាំនិយមជ្រុលមួយដែរ ដែលបានបដិសេធការបង្កើតអោយមានរដ្ឋប៉ាឡេស្ទីនឡើង។ ទោះយ៉ាងណា គណបក្សផ្សេងៗទៀត កំពុងតែរង់ចាំលទ្ធផលនៃការបោះឆ្នោត ដើម្បីមើលថាតើខ្លួនអាចមានវត្តមាន ក្នុងរដ្ឋាភិបាលចំរុះដែររឺទេ។
បើសិនជា លោក Netanyahu ជាប់ឆ្នោតមែននោះ លោកត្រូវប្រឈមមុខ នឹងឧនភាពថវិកាក្នុងប្រទេសនាពេលបច្ចុប្បន្ន ជាពិសេសទៅទៀតនោះ នៅលើឆាកអន្តរជាតិ លោកត្រូវរងសម្ពាធធ្ងន់ ដោយសារតែគោលនយោបាយ ចង់ដាក់អាណានិគមដែនដីអ៊ីស្រាអែល នៅក្នុងតំបន់ Cisjordanie៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ