ការហាមពុំឲ្យនាំទំនិញចូលសហរដ្ឋអាមេរិកនឹងធ្វើឲ្យប៉ះពាល់ដល់សេដ្ឋកិច្ចភូមា
បំរ៉ាមហាមពុំឲ្យនាំផលិតផលភូមាចូលសហរដ្ឋអាមេរិកគឺពិតជាកត្តាធ្វើឲ្យប៉ះពាល់ដល់សេដ្ឋកិច្ចភូមា ជាពិសេសក្នុងវិស័យឧស្សាហកម្មវាយនភ័ណ្ឌ ដែលជាវិស័យបង្កើតការងារដ៏ច្រើនជូនប្រជាជន។ បំរ៉ាមអាមេរិកាំងនេះនឹងពុំធ្វើឲ្យប៉ះពាល់ដល់ផលប្រយោជន៍របស់អ្នកជំនិតនៃអតីតមេដឹកនាំផ្តាច់ការភូមាឡើយ។ នេះជាការបរិហារនៅថ្ងៃសុក្រនេះដោយក្រុមវិភាគពិចារណាវិបត្តិអន្តរជាតិ International Crises Group។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
នៅដើមខែកក្កដាឆ្នាំ២០១២នេះ ទីក្រុងវ៉ាស៊ីនតោនបានអនុញ្ញាតឲ្យក្រុមហ៊ុនអាមេរិកាំងទៅបោះទុនធ្វើវិនិយោគនៅក្នុងប្រទេសភូមា ទាំងនៅក្នុងវិស័យដ៏ចម្រូងចម្រាសដូចជា វិស័យឧស្ម័ននិងប្រេងកាតជាដើម។
ក៏ប៉ុន្តែទណ្ឌកម្មអាមេរិកាំងពាក់ព័ន្ធនឹងការហាមពុំឲ្យនាំទំនិញភូមាចូលសហរដ្ឋអាមេរិកនៅតែរក្សាទុក។ គណៈកម្មការហិរញ្ញវត្ថុនៅព្រឹទ្ធសភាអាមេរិកបានបោះឆ្នោតកាលពីសប្តាហ៍មុន បន្តដាក់ទណ្ឌកម្ម ហាមពុំឲ្យនាំផលិតផលភូមាចូលសហរដ្ឋអាមេរិកបីឆ្នាំបន្តទៀត។
ប្រសិនបើសភាអ្នកតំណាងអាមេរិកសម្រេចបោះឆ្នោតដូចព្រឹទ្ធសភាមែន “នោះវាច្បាស់ជានឹងធ្វើឲ្យប៉ះបាល់ដល់សន្ទុះកំណើនសេដ្ឋកិច្ចភូមា ជាពិសេសក្នុងវិស័យឧស្សាហកម្មវាយនភ័ណ្ឌ ដែលជាវិស័យបង្កើតការងារដ៏ច្រើនជូនប្រជាជន ហើយវាក៏ជាកត្តាជំរុញឲ្យសេដ្ឋកិច្ចភូមាងាកទៅរកវិស័យរុករកវត្ថុធាតុរ៉ែ និងនាំចេញទៅលក់បរទេសនូវសម្បត្តិធម្មជាតិរបស់ខ្លួន”។ នេះជាការព្រមានរបស់ក្រុមវិភាគពិចារណាវិបត្តិអន្តរជាតិ International Crises Group នៅក្នុងរបាយការណ៍របស់ខ្លួននៅពេលថ្មីៗនេះ។
បើយោងតាម ក្រុមវិភាគពិចារណាវិបត្តិអន្តរជាតិ International Crises Group មុនការដាក់ណ្ឌកម្មរបស់ស.រ.អា. ហាមពុំឲ្យនាំផលិតផលភូមាចូល ការនាំផលិតផលភូមាចូលសហរដ្ឋអាមេរិកភាគច្រើនចេញពីវិស័យឧស្សាហកម្មវាយនភ័ណ្ឌ ដែលជាវិស័យបង្កើតបានការងារដ៏ច្រើនមហិមាជូនប្រជាជនភូមា។
ចំណែកឯឯកអគ្គរដ្ឋទូតអាមេរិកប្រចាំប្រទេសភូមា លោក Derek Mitchell បានថ្លែងកាលពីសប្តាហ៍មុនឲ្យដឹងថា “រក្សាទណ្ឌកម្មខ្លះទុកដាក់ទៅលើប្រទេសភូមាគឺជាការធានាសម្រាប់ពេលអនាគត នៅខណៈណាដែលភូមាចង់ងាកចេញពីកិច្ចសន្យាធ្វើកំណែទម្រង់របស់ខ្លួន”។
គួរកត់សម្គាល់ថា ចាប់តាំងពីរបបផ្តាច់ការយោធាភូមាបានត្រូវរំលាយនៅខែមីនាឆ្នាំ២០១១មក រដ្ឋាភិបាល “ស៊ីវិល” ភូមាដែលដឹកនាំដោយក្រុមអតីតឧត្តមសេនីយ៍បានធ្វើកំណែទម្រង់ជាច្រើន មានដូចជា ការដោះលែងអ្នកទោសនយោបាយរាប់រយនាក់ និងការអនុញ្ញាតឲ្យលោកស្រី អ៊ុងសានស៊ូជី ជ័យលាភីរង្វាន់ណូបែលសន្តិភាពក្លាយទៅជាអ្នកតំណាងរាស្ត្រជាដើម។
រីឯលោកប្រធានាធិបតីភូមា ថេន សេន បានធ្វើការធានាអះអាងឲ្យមានកំណែទម្រង់វគ្គទីពីរដែលសង្កត់ទៅលើវិស័យសេដ្ឋកិច្ច។ វិស័យសេដ្ឋកិច្ចដែលបានទទួលរងគ្រោះដោយរបបផ្តាច់ការយោធាភូមាអស់រយៈពេលជាច្រើនទសវត្សរ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ