រដ្ឋមន្ត្រីក្រសួងការបរទេសបារាំងនៅប៉េកាំងលើកពីបញ្ហាឧបសគ្គនានានៅក្នុងការវិនិយោគបរទេស
រដ្ឋមន្ត្រីក្រសួងការបរទេសបារាំង លោក Jean-Marc Ayrault នៅឱកាសដំណើរទស្សនៈកិច្ចនៅទីក្រុងប៉េកាំងកាលពីថ្ងៃអាទិត្យម្សិលមិញ បានរំលឹកអំពីបញ្ហាឧបសគ្គនានាដែលជារបាំងវិនិយោគនៅក្នុងប្រទេសចិន។ ការលើកឡើងពីបញ្ហានេះ គឺ ធ្វើឡើងនៅខណៈពេលដែលវិនិយោគរបស់ចិននៅអឺរ៉ុប បានបង្កឲ្យមានការភ័យព្រួយជាច្រើន។
ចុះផ្សាយនៅថ្ងៃ៖
ស្តាប់ - ០២:០៩
“ការធ្វើវិនិយោគរបស់ចិន នៅអឺរ៉ុប បានបង្កឲ្យមានការជជែកពិភាក្សាជាច្រើនជាពិសេសនៅក្នុងប្រទេសអាល្លឺម៉ង់”-នេះជាការកត់សម្គាល់របស់រដ្ឋមន្ត្រីក្រសួងការបរទេសបារាំងលោក Jean-Marc Ayrault នៅនាឱកាសជំនួបប្រាស្រ័យជាមួយក្រុមសហគ្រិនបារាំងដែលទើបបានចាប់ផ្តើមដាក់ទីតាំងសហគ្រាសរបស់ខ្លួននៅក្នុងប្រទេសចិន។
លោក Ayrault បាន គូសបញ្ជាក់ទៀតថា “យើងពុំត្រូវព្រួយបារម្ភអ្វីទេនៅលើការធ្វើវិនិយោគនៅបរទេស ក៏ប៉ុន្តែទន្ទឹមគ្នានេះ យើងក៏ពុំបណ្តោយឲ្យវិនិយោគរបស់យើងជួបនឹងឧបសគ្គនោះដែរនៅក្នុងប្រទេសចិន។ លោកAyrault ដែលត្រូវជួបប្រាស្រ័យជាមួយថ្នាក់ដឹកនាំជាន់ខ្ពស់របស់ចិននៅប៉េកាំងក្នុងថ្ងៃចន្ទនេះ បានធានាអះអាងដែរថា “បញ្ហាវិនិយោគបរទេស គឺជាបញ្ហាមួយដ៏សំខាន់បំផុតនៅក្នុងជំនួបពិភាក្សារវាងចិននិងបារាំង។
រដ្ឋមន្ត្រីការបរទេសបារាំង បានកត់សម្គាល់ដែរថា “នៅលើបញ្ហាការិយាល័យធិបតេយ្យដែលជាឧបសគ្គនៅក្នុងវិនិយោគ យើងអាចនឹងដោះស្រាយបាននៅលើបញ្ហានេះ ប៉ុន្តែយើងក៏នៅមានបញ្ហាជាច្រើនផ្សេងទៀតដែលបារាំងត្រូវតែជជែកដោះស្រាយជាមួយចិនជាអាទិ៍នៅលើនយោបាយការពារផលិតផលជាតិទល់នឹងការប្រណាំងប្រជែងបរទេសដោយការប្រើវិធានការរបាំងពន្ធគយជាដើម។
ចំពោះបញ្ហាទាំងនេះ យើងអាចជជែកដោះស្រាយដោយភាពស្មោះសរជាមួយភាគីចិនដែលជាដៃគូរបស់បារាំង។ ម្យ៉ាងទៀត សង្គ្រាមប៉ាកានៅលើដំណើរវក់នឹងវិនិយោគទុនរបស់ចិននៅអ៊ឺរ៉ុប បានស្ទុះខ្លាំងកាលពីសប្តាហ៍មុន ដោយក្រុមហ៊ុនចិនឈ្មោះ Grand Chip Investment បានលើកផ្អាកការទិញឧស្សហកម្មអាល្លឺម៉ង់ Aixtron។
រីឯលោក Sigmar Gabriel ឧបនាយករដ្ឋមន្ត្រីនិងជារដ្ឋមន្ត្រីសេដ្ឋកិច្ចអាល្លឺម៉ង់វិញ ក៏ប្រហែលជានឹងលើកឡើងពីបញ្ហានេះនៅនាឧកាសដំណើរទស្សនៈកិច្ចរបស់លោកនៅប្រទេសចិននៅថ្ងៃអង្គារស្អែក។
គួរបញ្ជាក់ថា ការធ្វើវិនិយោគរបស់ចិនមកកាន់អឺរ៉ុប បានហក់ស្ទុះយ៉ាងលឿនរហូតដល់៤៤%នៅក្នុងឆ្នាំ២០១៥ក្នុងចំនួនទឹកប្រាក់រហូតដល់ ២ម៉ឺនលានអឹរ៉ូ ឬស្មើនឹងការធ្វើវិនិយោគពីរដងរបស់អឺរ៉ុបទៅកាន់ប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ