អាមេនី៖នាយករដ្ឋមន្រ្តីថ្មីបង្ហាញទិសដៅនៃនយោបាយការបរទេស និងប្តេជ្ញាបំបាត់អំពើពុករលួយ
នៅក្នុងប្រទេសអាមេនី លោកនាយករដ្ឋមន្រ្តីថ្មី Nikol Pachinian បានផ្តល់សម្ភាសន៍ផ្តាច់មុខឲ្យវិទ្យុបារាំងអន្តរជាតិនាថ្ងៃព្រហស្បតិ៍ ទី១៤ មិថុនា។ នៅក្នុងបទសម្ភាសន៍នោះ លោក Nikol បានប្រាប់ឲ្យដឹងពីគម្រោងរៀបចំការបោះឆ្នោតសភានៅឆ្នាំ ២០១៩ គោលនយោបាយការទូតថ្មី និងការបន្តបដិវត្តដើម្បីប្រយោជន៍ប្រជាជន។ គួររម្លឹកជូនថា មានអាយុ ៤៣ឆ្នាំ និងជាអតីតអ្នកកាសែត លោក Nikol បានក្លាយជានាយករដ្ឋមន្រ្តីថ្មី ក្រោយពីមានចលនាបះបោររបស់មហាជនជិត ៣សប្តាហ៍ប្រឆាំងនឹងអំពើពុករលួយ និងភាពក្រីក្រ។
ចុះផ្សាយនៅថ្ងៃ៖
ស្តាប់ - ០១:៣៩
« ដំណើរការនយោបាយដែលនាំឲ្យមានការផ្លាស់ប្តូរអំណាចនៅក្នុងប្រទេសអាមេនីមិនមានពាក់ព័ន្ធនឹងបរិបទអន្តរជាតិទេ។ ទាំងនេះជាលក្ខខណ្ឌនយោបាយការបរទេសដែលយើងបានអនុម័ត។ យើងចង់បញ្ជាក់ថា វាគ្មានការផ្លាស់ប្តូរភូមិសាស្រ្តឡើយ មានន័យថា ទិសដៅនឹងស្ថិតនៅដដែល តែអ្វីដែលខុសគ្នា រួមទាំងការផ្លាស់ប្តូរនឹងត្រូវធ្វើឡើងនៅក្នុងគោលនយោបាយផ្ទៃក្នុងរបស់ប្រទេសអាមេនី។
កម្មវត្ថុរបស់យើង គឺការពារផលប្រយោជន៍ជាតិ អធិបតេយ្យភាព និងឯករាជ្យភាពរបស់ប្រទេសយើង។ គោលនយោបាយការបរទេសរបស់យើងនឹងមិននិយមបស្ចិមលោក មិននិយមរុស្ស៊ី ឬនិយមប្រទេសណាមួយទេ។ យើងជាអ្នកនិយមពលរដ្ឋអាមេនី។
ជាលក្ខណៈទូទៅ គ្រប់បដិវត្តទាំងអស់សុទ្ធតែបានផ្អែកលើជម្រើសមួយដែលត្រូវធ្វើ។ ឬមួយយើងត្រូវឈប់នៅចំណុចណាមួយ ឬមួយយើងត្រូវបន្តបដិវត្តទៅមុខទៀត។ នៅក្នុងករណីប្រទេសអាមេនី គឺពលរដ្ឋជាអ្នកសម្រេចលើអ្វីដែលខ្ញុំត្រូវធ្វើ។ ខ្ញុំបានយល់ច្បាស់ណាស់ថា ប្រសិនបើខ្ញុំសម្រេចចិត្តធ្វើអ្វីដោយចិត្តឯងនាពេលខាងមុខ ខ្ញុំនឹងក្បត់ឆន្ទៈ និងការចង់បានរបស់ពលរដ្ឋ។
ថ្ងៃនេះ យើងនឹងបន្តបដិវត្ត។ យើងបានលើកឡើងនូវបញ្ហាជាច្រើននៅទីធ្លាសាធារណៈ ហើយយើងកំពុងស្ថិតនៅទីនេះដើម្បីដោះស្រាយបញ្ហា »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ