បូស្ន៊ី-អ៊ែរហ្សេហ្គោវីន ៖សម្តេចប៉ាបហ្រ្វង់ស័របន់ស្រន់ឲ្យមានសន្តិភាពនៅសារ៉ាយ៉េវ៉ូ
នៅក្នុងដំណើរបំពេញទស្សនកិច្ចរយៈពេល ១២ម៉ោងក្នុងទីក្រុងសារ៉ាយ៉េវ៉ូ ប្រទេសបូស្ន៊ី-អ៊ែរហ្សេហ្គោវីននាថ្ងៃសៅរ៍ ៦ មិថុនា សម្តេចប៉ាបហ្រ្វង់ស័របានជួបសន្ទនាជាមួយថ្នាក់ដឹកនំាបូស្ន៊ី-អ៊ែរហ្សេហ្គោវីន ព្រមទំាងចូលរួមនៅក្នុងមហាពិធីសូត្រធម៌មួយដែលមានមនុស្សចូលរួមជាង ៥០ ០០០នាក់។ នាឱកាសនោះ សម្តេចប៉ាបបានអំពាវនាវឲ្យមានសន្តិភាពនៅបូស្ន៊ី-អ៊ែរហ្សេហ្គោវីន ដោយជម្រុញឲ្យមានកិច្ចចរចា និងការអត់ឱន ព្រមទំាងព្រមានប្រឆំាងនឹងក្រុមដែលបន្តញុះញង់ឲ្យមានសង្រ្គាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ថ្លែងពីវិមានប្រធានាធិបតីក្នុងទីក្រុងសារ៉ាយ៉េវ៉ូ ប្រមុខសង្ឃកាតូលិកសម្តេចប៉ាបហ្រ្វង់ស័របានអំពាវនាវប្រទេសបូស្ន៊ី-អ៊ែរហ្សេហ្គោវីន និងសហគមន៍អន្តរជាតិឲ្យចាប់ដៃគ្នាដើម្បីប្រឆំាងទល់នឹងអំពើឃោរឃៅ អមនុស្សធម៌ ក៏ដូចជាអំពើហិង្សាគ្រប់រូបភាពដែលបាន និងកំពុងបន្តកើតមាននៅក្នុងទឹកដីបូស្ន៊ី-អ៊ែរហ្សេហ្គោវីន។ ក្នុងន័យនេះ សម្តេចប៉ាបហ្រ្វង់ស័របានស្នើឲ្យយកតម្លៃមនុស្សជាតិជាសារវន្តធ្វើជាមូលដ្ឋានដើម្បីស្ថាបនា និងការអត់ឱនឲ្យគ្នាទៅវិញ ទៅមក។
នៅក្នុងសុន្ទរកថាលើកទី១ របស់ព្រះអង្គលើទឹកដីបូស្ន៊ី-អ៊ែរហ្សេហ្គោវីនចំពោះមុខវត្តមានក្រុមអង្គការសង្គមស៊ីវិល និងអ្នកការទូតនានា សម្តេចប៉ាបបានទាមទារឲ្យសិទ្ធិស្មើគ្នាសម្រាប់ពលរដ្ឋគ្រប់ជាន់ថ្នាក់ ដោយមិនប្រកាន់និន្នាការនយោបាយ ឬសាសនា។ អ្វីដែលព្រះអង្គចង់ផ្តោតសំខាន់នោះ គឺសុំឲ្យប្រជាជនបូស្ន៊ី-អ៊ែរហ្សេហ្គោវីន អ្នកកាន់សាសនាអ៊ីស្លាម ប្រជាជនស៊ែប៊ី អ្នកកាន់សាសនាអ័រតូដុក និងប្រជាជនក្រូអាស៊ី អ្នកកាន់សាសនាកាតូលិកចេះរួមរស់ជាមួយគ្នាដោយមិនត្រូវប្រកាន់និន្នាការសាសនា។ ទន្ទឹមគ្នានេះ សម្តេចប៉ាបបានផ្តល់ការគំាទ្រចំពោះប្រទេសបូស្ន៊ី-អ៊ែរហ្សេហ្គោវីនដែលព្រះអង្គយល់ថា ជាប្រទេសក្នុងទឹកដីអឺរ៉ុប តែបែរជានៅមិនទាន់បានចូលជាសមាជិកសហភាពអឺរ៉ុបទៅវិញ។
បន្ទាប់មក សម្តេចប៉ាបបានចូលរួមនៅក្នុងមហាពិធីសូត្រធម៌រៀបចំនៅក្នុងពហុកីឡាដ្ឋានជាតិអូឡំាពិកក្នុងទីក្រុងសារ៉ាយ៉េវ៉ូដែលមានមនុស្សចូលរួមជាង ៥ម៉ឺននាក់។ សូមបញ្ជាក់ជូនថា គឺនៅក្នុងពហុកីឡាដ្ឋានជាតិអូឡំាពិកនោះឯងដែលអតីតសម្តេចប៉ាប Jean-Paul ទី២ បានចូលរួមពិធីសូត្រធម៌ដូចគ្នានេះកាលពី ១៨ឆ្នំាមុន។ អ្វីជាការកត់សម្គាល់ វត្តមានរបស់ប្រមុខសង្ឃកាតូលិកជាលើកទី២ ថ្ងៃនេះបានធ្វើឡើង ចំពេលដែលភាពតានតឹងរវាងសហគមន៍សាសនាកំពុងបន្តមានយ៉ាងក្តៅគគុក។
អ៊ីចឹងហើយបានសម្តេចប៉ាបហ្រ្វង់ស័របានថ្លែងបរិហារ និងដៀលត្មះចំពោះក្រុម ឬចលនាដែលកំពុងបន្តចិញ្ចឹម និងបង្កើតឲ្យមានបរិយាកាសសង្រ្គាម ដោយយកវប្បធម៌ និងអារ្យធម៌ឲ្យប្រឈមមុខដាក់គ្នា។ ទន្ទឹមគ្នានេះ សម្តេចប៉ាបហ្រ្វង់ស័រក៏ឆ្លៀតវាយប្រហារចំពោះអ្នកខ្លះដែលបន្តញុះញង់ឲ្យមានសង្រ្គាមដើម្បីលក់អាវុធរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ