លោកពូទីន ប្រគល់រង្វាន់ជូន ពួកអ្នកកីឡារុស្ស៊ី ដែលបានមេដាយអូឡាំពិក
ក្នុងពិធីដ៏ឧឡារឹកនៅវិមានក្រេមឡាំងរសៀលម្សិលមិញ លោកប្រធានាធិបតី ពូទីន បានបំពាក់គ្រឿងឥស្សរិយយសបានប្រគល់រង្វាន់និងបានធ្វើកាដូជូនក្រុមអ្នកកីឡារុស្ស៊ី ដែលចេះដណ្តើមបានមេដាយក្នុងល្បែងកីឡាអូឡាំពិកនៅក្រុងឡុងដ៏ ពេលថ្មីៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
គួររំលឹកថាក្នុងល្បែងកីឡាអូឡាំពិកនោះប្រទេសរុស្ស៊ីជាប់បានលេខ៤គឺស្ថិតនៅពីក្រោយ ស.រ.អា.ចិនអង់គ្លេសដោយចេះដណ្តើមបានមេដាយសរុបទៅចំនួន៨២ក្នុងនោះគឺ ២៤មេដាយមាស២៥មេដាយប្រាក់និង៣៣មេដាយសំរឹទ្ធ។ប៉ុន្តែចំនួនអ្នកកីឡាដែលត្រូវបាន បំពាក់ទៅដោយគ្រឿងឥស្សរិយយសនិងទទួលរង្វាន់គឺដល់ទៅ១២០នាក់។
មូលហេតុមកពីខាងមុខកីឡាខ្លះបែបយ៉ាងខាងប្រកួតបាល់ទះដែលរុស្ស៊ី ជាប់បានលេខ១មេដាយមាសដែលគណៈកម្មាធិការអូឡាំពិកអន្តរជាតិប្រគល់ឲ្យមិនមែនសម្រាប់តែម្នាក់ទេ តែគឺសម្រាប់ពួកអ្នកកីឡាបាល់ទះទាំង១២នាក់ដែលផ្លាស់វេនគ្នាប្រកួតក្នុងអំឡុងពេលទាំង ១៧ថ្ងៃនៃកីឡាអូឡាំពិកកន្លងទៅ។ខាងសិល្បៈរាំស៊ីចង្វាក់គ្នាលើទឹកនិងក្នុងទឹកដែលរុស្ស៊ី ជាប់លេខ១ដែរមេដាយមាសមានបំពាក់ជូនគ្រប់តែកីឡាការិនីទាំង៩នាក់ រាំនៅក្នុងក្រុមនោះ
បើនិយាយពីគ្រឿងឥស្សរិយយសរបស់រដ្ឋរុស្ស៊ីផ្ទាល់ គឺថា ៖
-អ្នកកីឡាដែលបានមេដាយមាស ត្រូវលោកពូទីន បំពាក់ជូន គឺ លំដាប់សក្តិ ក្រោមឈ្មោះ ថា
“ ចំពោះគុណូបការ ដែលគេមាននៅពីមុខ មាតុប្រទេស”។
-ចំពោះមេដាយប្រាក់ គឺលំដាប់សក្តិ “កិត្តិយស”។
-ចំពោះមេដាយសំរឺទ្ធ គឺលំដាប់សក្តិ “មិត្តភាព”។
ចំណែករង្វាន់ជាប្រាក់រំលែកចេញពីថវិការដ្ឋ គឺដូចតទៅ ៖
-ចំពោះមេដាយមាស គឺរង្វាន់៤លានរូប្ល ឫ ប្រមាណ ១២ម៉ឺន៥ពាន់ដុល្លារអាមេរិក។
-ចំពោះមេដាយប្រាក់ គឺរង្វាន់២លាន៥សែនរូប្ល ឫ ប្រមាណ ៧ម៉ឺន៨ពាន់ដុល្លារ។
-ចំពោះមេដាយសំរឹទ្ធ គឺរង្វាន់១លាន៧សែនរូប្ល ឫ ប្រមាណ ៥ម៉ឺន៣ពាន់ដុល្លារ។
ជាការកត់សម្គាល់ លុយរូប្លរុស្ស៊ីសព្វថ្ងៃ មានអត្រាដូចលុយ Bath របស់ថៃអ៊ីចឹង គឺថា ១ដុល្លារ ស្មើនឹង ៣២ Rouble ឫ ៣២ Bath។
មិនតែប៉ុណ្ណោះ នៅមានកាដូ ពីខាងរដ្ឋាភិបាលរុស្ស៊ី គឺឡានម៉ាកAudi ចំនួន១២០គ្រឿង ដែល ចតជាស្រេច នៅពីមុខវិមានក្រេមឡាំង សម្រាប់ប្រគល់ជូន អ្នកកីឡារុស្ស៊ីសរុបទៅ១២០នាក់ ដែលចេះដណ្តើមបានមេដាយ ក្នុងល្បែងកីឡាអូឡាំពិកកន្លងទៅ គឺថា ៖
អាធុន Audi-8 ចំនួន ៤៨គ្រឿង សម្រាប់អ្នកដែលបានមេដាយមាស។
អាធុន Audi-7 Sporback ចំនួន ២៥ គ្រឿង សម្រាប់អ្នកដែលបានមេដាយប្រាក់។
អាធុន Audi-6 ចំនួន ៤៧គ្រឿង សម្រាប់អ្នកដែលបានមេដាយសំរឹទ្ធ។
លោកប្រធានាធិបតីពូទីន ក្នុងសុន្ទរកថាគាក់ សង្កត់ធ្ងន់ថា ជោគជ័យសម្រេចបានដោយ ពួក អ្នកកីឡាទាំងនោះ ញ៉ាំងឲ្យបេះដូងប្រជាពលរដ្ឋរុស្ស៊ី បំពេញទៅដោយមោទនភាព ចំពោះ មាតុប្រទេសខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ