ហុងកុងបោះឆ្នោតសភាក្រោមក្រសែភ្នែករបស់ប៉េកាំង
ប្រជាជនហុងកុងបោះឆ្នោតនៅថ្ងៃអាទិត្យនេះ ដើម្បីជ្រើសរើសសមាជិកក្រុមប្រឹក្សានីតិបញ្ញត្តិរបស់ខ្លួន។ ជាការបោះឆ្នោតសភាលើកដំបូងបង្អស់ ចាប់តាំងពីមានចលនាបាតុកម្មទាមទារលទ្ធិប្រជាធិបតេយ្យ កាលពីឆ្នាំ២០១៤កន្លងទៅ ហើយជាការបោះឆ្នោត ដែលមានការចូលរួមពីសំណាក់ចលនាទាមទារឯករាជ្យផ្តាច់ខ្លួនពីចិនដីគោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ការបោះឆ្នោតសភាហុងកុងនៅថ្ងៃអាទិត្យនេះ គឺជាការប្រកួតប្រជែងគ្នា រវាងចរន្តនយោបាយធំៗចំនួន៣ គឺក្រុមអ្នកនយោបាយស្និទ្ធនឹងក្រុងប៉េកាំង ក្រុមអ្នកនិយមប្រជាធិបតេយ្យតែមិនទាមទារឯករាជ្យ និងក្រុមអ្នកទាមទារឯករាជ្យ ឬស្វ័យតភាពកាន់តែច្រើនពីប៉េកាំង។
ក្រុមឯករាជ្យនិយមនេះ គឺជាចលនាដែលទើបនឹងរីកដុះដាលខ្លាំងនៅក្នុងរយៈពេលប៉ុន្មានឆ្នាំចុងក្រោយនេះ ជាពិសេស គឺចាប់តាំងពីមានការផ្ទុះចលនាទាមទារលទ្ធិប្រជាធិបតេយ្យ កាលពីឆ្នាំ២០១៤។
អ្នកជំនាញជាច្រើនយល់ឃើញថា បើយោងទៅតាមទិដ្ឋភាពនយោបាយហុងកុងបច្ចុប្បន្ននេះ ក្រុមឯករាជ្យនិយមមិនសង្ឃឹមថានឹងអាចទទួលជោគជ័យនៅក្នុងការបោះឆ្នោតនៅថ្ងៃអាទិត្យនេះទេ។ ការធ្វើការសន្និដ្ឋានបែបនេះ ដោយមើលទៅលើកត្តាសំខាន់ចំនួនពីរ។ ទីមួយ គេឃើញថា ប្រជាជនហុងកុងភាគច្រើននៅតែជឿថា ការទាមទារឯករាជ្យដាច់ចេញពីចិនដីគោក មិនមែនជាជម្រើសល្អសម្រាប់ហុងកុង ហើយវាក៏ជារឿងដែលមិនអាចធ្វើទៅរួចដែរ នៅក្នុងការអនុវត្តជាក់ស្តែង។ កត្តាដ៏សំខាន់មួយទៀត គឺប្រព័ន្ធបោះឆ្នោត ដែលផ្តល់អំណោយផលខ្លាំងទៅលើក្រុមអ្នកស្និទ្ធនឹងក្រុងប៉េកាំង។
គួរបញ្ជាក់ថា នៅក្នុងចំណោមអាសនៈទាំង ៧០ នៅក្នុងក្រុមប្រឹក្សានីតិបញ្ញត្តិហុងកុង មានតែពាក់កណ្តាលប៉ុណ្ណោះ ដែលត្រូវឆ្លងកាត់ការបោះឆ្នោតជាសកល ចំណែកឯពាក់កណ្តាលទៀត កើតចេញពីការជ្រើសតាំងដោយមនុស្សមួយក្រុម ដែលភាគច្រើនមាននិន្នាការលម្អៀងទៅខាងរដ្ឋាភិបាលក្រុងប៉េកាំង។
ក៏ប៉ុន្តែ បើទោះបីជាក្រុមឯករាជ្យនិយមមិនមានសង្ឃឹមថានឹងអាចយកឈ្នះ នៅក្នុងការបោះឆ្នោតនេះក៏ពិតមែន តែទំហំនៃសំឡេងឆ្នោតដែលពួកគេទទួលបានអាចនឹងកំណត់នូវទិដ្ឋភាពថ្មីមួយ ក្នុងឆាកនយោបាយហុងកុង ដែលតាំងពីដើមរៀងមក បែងចែកចេញតែពីរក្រុម គឺក្រុមស្និទ្ធិនឹងប៉េកាំង និងក្រុមអ្នកប្រជាធិបតេយ្យនិយមដែលមិនចង់បានឯករាជ្យ។
អ្វីដែលគួរឲ្យកត់សម្គាល់ ការស្ទាបស្ទង់មតិមួយចំនួនបង្ហាញថា ប្រជាជនហុងកុងរហូតដល់ទៅ ១៧% គាំទ្រក្រុមអ្នកឯករាជ្យនិយម។
ការិយាល័យបោះឆ្នោតនៅទូទាំងហុងកុងត្រូវបិទទ្វារនៅម៉ោង ១០និង៣០នាទីយប់ម៉ោងក្នុងស្រុក (ត្រូវនឹងម៉ោង ៨និង៣០នាទីយប់នៅកម្ពុជា) ហើយការរាប់សន្លឹកឆ្នោតនឹងត្រូវធ្វើ នៅយប់ថ្ងៃចន្ទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ