ស្លាប់យ៉ាងតិច៣០នាក់ក្នុងការប៉ះទង្គិចនៅកាស្មៀរឥណ្ឌា
មនុស្សយ៉ាងតិច ៣០នាក់ ត្រូវបាត់បង់ជីវិត និងរាប់រយនាក់ផ្សេងទៀតត្រូវរងរបួស នៅក្នុងការប៉ះទង្គិចគ្នា រវាងក្រុមបាតុករ និងប៉ូលិស នៅក្នុងតំបន់កាស្មៀររបស់ឥណ្ឌា។ ចលនាបាតុកម្មដែលបានចាប់ផ្តើមផ្ទុះឡើង កាលពីថ្ងៃសៅរ៍ ក្រោយពីមេដឹកនាំក្រុមឧទ្ទាមកាស្មៀរម្នាក់ត្រូវស្លាប់ ក្នុងការវាយប្រហាររបស់កងកម្លាំងរដ្ឋាភិបាល។
ចុះផ្សាយនៅថ្ងៃ៖
មេដឹកនាំក្រុមឧទ្ទាមអ៊ីស្លាមប្រចាំតំបន់កាស្មៀរត្រូវបានកងកម្លាំងរដ្ឋាភិបាលឥណ្ឌាបាញ់សម្លាប់ នៅក្នុងការវាយប្រយុទ្ធគ្នា កាលពីយប់ថ្ងៃសុក្រ។ ដំណឹងស្តីពីការស្លាប់មេដឹកនាំឧទ្ទាមនេះបានធ្វើឲ្យក្រុមអ្នកគាំទ្រផ្ទុះកំហឹង នាំគ្នាចេញធ្វើបាតុកម្មតវ៉ាតាមដងផ្លូវទាំងរំលោភលើបម្រាមគោចរដែលដាក់ចេញដោយរដ្ឋាភិបាល។
បាតុកម្មនេះបានរាលដាលទៅជាអំពើហិង្សា ដោយក្រុមបាតុកររាប់ពាន់នាក់ ក្រោយពីបានចូលរួមក្នុងពិធីបុណ្យសពមេដឹកនាំឧទ្ទាម បាននាំគ្នាធ្វើការវាយប្រហារទៅលើស្ថានីយ៍ប៉ូលិស និងបន្ទាយទាហាន ព្រមទាំងបានដុតបំផ្លាញអគាររដ្ឋជាច្រើនកន្លែង។ ចំណែកឯកងកម្លាំងរដ្ឋាភិបាលវិញបានធ្វើការតបតទៅវិញដោយប្រើឧស្ម័នបង្ហូរទឹកភ្នែក ហើយរហូតឈានទៅធ្វើការបាញ់ប្រហារទៅលើហ្វូងបាតុករ។
ការប៉ះទង្គិចគ្នានេះបានបន្តកើតមានឡើងរហូតមកដល់ថ្ងៃចន្ទ ដោយបានបណ្តាលឲ្យមានអ្នកស្លាប់យ៉ាងតិច ៣០នាក់ និងរបួសប្រមាណជាជិត៣០០នាក់ ដោយក្នុងចំណោមអ្នករងរបួសនោះ ប្រមាណជា ១០០នាក់ គឺជាប៉ូលិស។
គួរបញ្ជាក់ឡើងវិញថា តំបន់កាស្មៀរគឺជាតំបន់ជាប់ជម្លោះ រវាងឥណ្ឌា និងប៉ាគីស្ថានចាប់តាំងពីប្រទេសទាំងពីរត្រូវបែកចេញពីគ្នាក្រោយទទួលឯករាជ្យពីអង់គ្លេស កាលពីឆ្នាំ១៩៤៧។ បច្ចុប្បន្ន តំបន់កាស្មៀរនេះត្រូវបានឥណ្ឌា និងប៉ាគីស្ថាន ពុះចែកគ្នាកាន់កាប់ ក៏ប៉ុន្តែ ភាគីម្ខាងៗនៅតែបន្តទាមទារយកតំបន់កាស្មៀរទាំងមូលមកធ្វើជាកម្មសិទ្ធិ។
នៅក្នុងតំបន់កាស្មៀរដែលស្ថិតក្រោមការគ្រប់គ្រងរបស់ឥណ្ឌា គេឃើញមានក្រុមឧទ្ទាមជាច្រើនក្រុម ជាពិសេស ក្រុមឧទ្ទាមអ៊ីស្លាមបាននាំគ្នាធ្វើការតស៊ូដោយប្រដាប់អាវុធ ទាមទារផ្តាច់តំបន់កាស្មៀរពីប្រទេសឥណ្ឌា ដើម្បីយកទៅដាក់បញ្ចូលក្នុងប្រទេសប៉ាគីស្ថាន។ ក្រុមឧទ្ទាមអ៊ីស្លាម ដែលមេដឹកនាំត្រូវបានកងកម្លាំងរដ្ឋាភិបាលឥណ្ឌាបាញ់សម្លាប់ កាលពីយប់ថ្ងៃសុក្រ ហើយដែលនាំឲ្យផ្ទុះទៅជាអំពើហិង្សានៅពេលនេះ គឺជាផ្នែកមួយនៃចលនាឧទ្ទាមទាមទារឯករាជ្យនៅកាស្មៀរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ