ឥណ្ឌូនេស៊ី៖ សញ្ញានៃក្តីសង្ឃឹមក្នុងការរក្សាព្រៃឈើ
កាលពីថ្ងៃព្រហស្បតិ៍ ៣០ធ្នូ ២០១០នេះ មន្រ្តីរដ្ឋាភិបាលឥណ្ឌូនេស៊ីបានឲ្យដឹងថា ឥណ្ឌូនេស៊ីបានសម្រេចជ្រើសរើសយកកោះបរនេអូ (Borneo) ដើម្បីធ្វើជាកន្លែង សម្រាប់សាកល្បងយន្តការកាត់បន្ថយការបញ្ចេញឧស្ម័នកាបូនិក តាមរយៈការរក្សាព្រៃឈើ។ តាមរយៈយន្តការនេះ ឥណ្ឌូនេស៊ីនឹងទទួលបានជំនួយពីប្រទេសន័រវែស រហូតដល់ ១ពាន់លានដុល្លារ ជាថ្នូរនឹងការរក្សាព្រៃឈើ។
ចុះផ្សាយនៅថ្ងៃ៖
សេចក្តីរាយការណ៍របស់ សេង ឌីណា
គ្រប់គ្នាពិតជាដឹងថា ព្រៃឈើមានតួនាទីដ៏សំខាន់ក្នុងការទប់ស្កាត់នឹងការឡើងកម្តៅនៃភពផែនដី ពីព្រោះ ព្រៃឈើស្រូបយកឧស្ម័នកាបូនិក មិនឲ្យបញ្ចេញទៅក្នុងបរិយាកាស។ យោងតាមអ.ស.ប. ការបញ្ចេញឧស្ម័នកាបូនិកទៅក្នុងបរិយាកាស ប្រមាណជា ១៧% បង្កឡើងដោយការកាប់បំផ្លាញព្រៃឈើ។ ហេតុដូច្នេះហើយបានជាគេបង្កើតយន្តការមួយឡើង គឺការកាត់បន្ថយការបញ្ចេញឧស្ម័នកាបូនិកបង្កឡើងដោយការកាប់ព្រៃឈើ ហៅកាត់តាមភាសាបារាំងថា REDD ។
តាមរយៈយន្តការនេះ ប្រទេសអ្នកមាននឹងសុខចិត្តផ្តល់លុយដល់ប្រទេសកំពុងអភិវឌ្ឍ ដើម្បីបញ្ឈប់ការកាប់បំផ្លាញព្រៃឈើ ហើយបែរមកអភិរក្សព្រៃឈើវិញ។ កាលពីខែឧសភាកន្លងទៅនេះ រដ្ឋាភិបាលន័រវែសបានព្រមព្រៀងផ្តល់លុយរហូតដល់ ១ពាន់លានដុល្លារ ដើម្បីអភិរក្សព្រៃឈើ នៅឥណ្ឌូនេស៊ី ក្នុងក្របខ័ណ្ឌ REDD។
រដ្ឋាភិបាលឥណ្ឌូនេស៊ីបានសម្រេចជ្រើសរើសយកកោះបរនេអូ មកធ្វើជាទីតាំងសាកល្បង ដើម្បីអនុវត្តយន្តការនេះ។ មន្រ្តីឥណ្ឌូនេស៊ីបានឲ្យដឹងថា នៅក្នុងការសាកល្បងគម្រោងនេះ ឥណ្ឌូនេស៊ីនឹងរៀបចំផែនការអភិរក្សដែនព្រៃឈើប្រកបដោយតម្លាភាព ទប់ស្កាត់អំពើពុករលួយ និងរឹតបន្តឹងការអនុវត្តច្បាប់ ប្រឆាំងនឹងការកាប់ឈើដោយខុសច្បាប់។
ក៏ប៉ុន្តែ កាលពីខែមុន អង្គការ Greenpeace បានព្រមានថា គម្រោងនេះអាចនឹងត្រូវរំខានដោយក្រុមហ៊ុនដូងប្រេង និងក្រុមហ៊ុនធ្វើអាជីវកម្មព្រៃឈើ ពីព្រោះថា និយមន័យនៃដែនព្រៃឈើ ដែលត្រូវអភិរក្ស កំណត់ដោយរដ្ឋាភិបាលឥណ្ឌូនេស៊ី នៅមានភាពស្រពិចស្រពិលច្រើន។
គួរបញ្ជាក់ថា ឥណ្ឌូនេស៊ី គឺជាប្រទេសមានព្រៃឈើច្រើនជាងគេលំដាប់ទី៣ នៅលើពិភពលោក បន្ទាប់ពីប្រេស៊ីល និងសាធារណរដ្ឋប្រជាធិបតេយ្យកុងហ្គោ (នៅទ្វីបអាហ្វ្រិក)។ ក៏ប៉ុន្តែ ព្រៃឈើឥណ្ឌូនេស៊ីក៏ត្រូវទទួលរងការកាប់បំផ្លាញយ៉ាងខ្លាំងផងដែរ តាមរយៈឧស្សាហកម្មផលិតក្រដាស និងការកាប់ឆ្ការដីដាំដូងប្រេង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ