ជម្លោះដើមបូព៌ា ៖ អ៊ីស្រាអែលនិងប៉ាឡេស្ទីន គ្មានសុទិដ្ឋនិយមដូចអាមេរិក
លោកប្រមុខការទូតអាមេរិក ចន ឃែរី (John Kerry) បន្តបំពេញទស្សនកិច្ចនៅដើមបូព៌ា ដើម្បីសាកល្បងផ្តល់ដង្ហើមថ្មីដល់កិច្ចចរចាសន្តិភាពរវាងអ៊ីស្រាអែល និងប៉ាឡេស្ទីន។ ម្សិលមិញ លោករដ្ឋមន្ត្រីការបរទេស បានជួបពិភាក្សាជាមួយនាយករដ្ឋមន្ត្រីអ៊ីស្រាអែល នៅទីក្រុងJérusalem បន្ទាប់មកជាមួយនឹងប្រមុខដឹកនាំដែនដីប៉ាឡេស្ទីន នៅក្រុង Ramallah។ ទោះបីជាភាគីបក្សដិបក្សទាំងពីរមើលឃើញតែទុទ្ទិដ្ឋនិយមយ៉ាងណាក៏ដោយ ក៏លោកចន ឃែរី នៅតែមានទំនុកចិត្តនិងសុទិដ្ឋនិយមជានិច្ច ថានឹងអាចមានការចុះហត្ថលេខលើផែនទីចង្អុលផ្លូវ ឬកិច្ចព្រមព្រៀងអន្តរកាល ឆ្ពោះទៅរកការចរចាសន្តិភាព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ក្រៅអំពីបរិបទអាប់អួរ លោក ចន ឃែរី ត្រូវប្រឈមនឹងកំហឹងរបស់ប៉ាឡេស្ទីនទៀត ! មានគ្នារាប់សិបនាក់ បណ្តាជនប៉ាឡេស្ទីនបានប្រមូលផ្តុំគ្នា នៅទីក្រុង Ramallah ដើម្បី ប្រឆាំងនឹងទស្សនកិច្ចរបស់ប្រមុខការទូតអាមេរិក ព្រោះសម្រាប់ពួកគេ អាមេរិកចង់បានតែកិច្ចព្រមព្រៀង តែមិនទទួលគិតពីសំណើរបស់ប៉ាឡេស្ទីនសោះ។ ប៉ាឡេស្ទីនចង់បានការធានា ច្បាស់លាស់ ឈប់មានអាណានិគមកិច្ចអ៊ីស្រាអែល និងចង់ឱ្យជនភៀសខ្លួនប៉ាឡេស្ទីនអាចធ្វើមាតុភូមិនិវត្តន៍។
លោក ឃែរី ដែលបានគាស់កាយការចរចាឱ្យរស់ឡើងវិញ បន្ទាប់ពីជាប់គាំងជិតបីឆ្នាំ កាលពីខែកក្កដា បានជួបពិភាក្សាជាមួយលោក Mahmoud Abbas រយៈពេលជាង៥ម៉ោង នៅល្ងាចមិញ ដោយគ្មានព័ត៌មានអ្វីធ្លាយចេញមកក្រៅសោះ។ ប៉ុន្តែគេអាចដឹងបានថាពិតជានិយាយអំពី កិច្ចព្រមព្រៀងអន្តរកាល ដែលលោក ចន ឃែរី ចង់ឱ្យភាគីអ៊ីស្រាអែល និងប៉ាឡេស្ទីនចុះហត្ថលេខា។ ខ្លឹមសារនៃកិច្ចព្រមព្រៀង ដែលទំនងជាមានចោទពីបញ្ហាព្រំដែនក្រោយការបង្កើតរដ្ឋប៉ាឡេស្ទីន សន្តិសុខអ៊ីស្រាអែល និងលក្ខន្តិកៈក្រុង Jérusalem។
កិច្ចព្រមព្រៀងគ្មានប្រយោជន៍ នេះបើតាមថ្នាក់ដឹកនាំអង្គការរំដោះប៉ាឡេស្ទីន ដោយសំអាងថា សេចក្តីថ្លែងការណ៍ជាគោលការណ៍ គ្មានសារៈសំខាន់ទេ។ ក្នុងពេលរង់ចាំលទ្ធផលជាក់ស្តែង លោក ចន ឃែរី បន្តធ្វើដំណើរទៅ-មក រវាងក្រុង Jérusalem និងក្រុង Ramallah។ ល្ងាចនេះ លោកត្រូវជួបជាថ្មីជាមួយនឹងប្រមុខដឹកនាំដែនដីប៉ាឡេស្ទីន Mahmoud Abbas បន្ទាប់មកលោកនាយករដ្ឋមន្ត្រីអ៊ីស្រាអែល Benjamin Netanyahu ទៀត។ បើតាមអ្នកការទូតអាមេរិកផ្សេងៗទៀត ដែលសុំមិនបញ្ចេញឈ្មោះ ភាគីទាំងពីរមិនងាយទទួលយកសំណើរបស់អាមេរិកលើកនេះទេ។ លោកចនឃែរី ខ្លួនឯងក៏បានទទួលដែរ ថាត្រូវការប្រើពេលវេលាច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ