ជប៉ុនទាញសញ្ញាអាសន្នពិសេសប្រឈមនឹងព្យុះកំណាច នៅហ្វូគូស្ហ៊ីម៉ា
ព្យុះ Man-yi ព្យុះវស្សាដ៏កំណាចប្រចាំរដូវ បានវាយបោកបក់មកលើភាគខាងត្បូង និងភាគខាងកើតជប៉ុននៅព្រឹកមិញ ជាមួយនឹងទឹកភ្លៀងយ៉ាងខ្ជោកខ្ជាំ មិនធ្លាប់ជួបប្រទះពីមុនមកទេ។ ខេត្តជាច្រើន រួមទាំងតំបន់ហ្វ៊ូគូស្ហ៊ីម៉ា ផង ត្រូវប្រកាសដាក់ក្នុងភាពអាសន្នពិសេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
បរិមាណទឹកភ្លៀង បង្កឡើងព្យុះកំណាច មែនយី ធ្លាក់មកដូចគេចាក់ទឹក ! ត្រឹមតែមួយព្រឹកថ្ងៃចន្ទ មនុស្សបួននាក់បានបាត់ខ្លួន ៦៥នាក់បានរងរបួសព្រោះកម្លាំងខ្យល់និងទឹកភ្លៀង។ ផ្ទះរាប់សិបរយខ្នងត្រូវជន់លិចនិងខូចខាត ដោយការហូរបាក់ដី ទឹកស្ទឹងទឹកទន្លេឡើងជោរជន់ក្នុងពេលតែមួយប៉ប្រិចភ្នែក។ បណ្តាជន នៅក្យូតូ និងអូសាកា ជាងកន្លះលាននាក់ត្រូវជម្លៀសចេញ។
នៅរសៀលនេះ ព្យុះកំណាច ដែលល្បឿនបោកបក់ ១៦០គ.ម.ក្នុងម៉ោង ត្រូវធ្វើដំណើរទៅដល់តំបន់ហ្វ៊ូគូស្ហ៊ីម៉ា ទីដែលមជ្ឈមណ្ឌលនុយក្លេអ៊ែរធ្លាប់រងគ្រោះមហន្តរាយរលកស៊ូណាមីកាលពីពីរឆ្នាំមុន។ ក្រុមហ៊ុនតិបកូម្ចាស់មជ្ឈមណ្ឌល បានពង្រឹងកម្លាំង បង្កើនការត្បាត ការពារសម្ភារៈបរិក្ខាសំខាន់ៗសម្រាប់បង្ហូរទឹកទៅបញ្ចុះកម្តៅប្រតិករនុយក្លេអ៊ែរផង ម៉ាស៊ីនបូមផង និងត្រូវធ្វើយ៉ាងណា ទប់ទឹកកុំឱ្យជន់ជោរផង ទៅបន្ថែមលើគ្រោះធ្លាយទឹកមានសារធាតុវិទ្យុសកម្ម។
ថ្វីបើមានការខូចខាត និងការលុបជើងហោះហើរ ព្រមទាំងការធ្វើដំណើរតាមផ្លូវគោកនិងផ្លូវដែកក៏ពិតមែននៅថ្ងៃនេះ ប៉ុន្តែរដូវវស្សាឆ្នាំ២០១៣នេះ ព្យុះភ្លៀងហាក់ដូចជាមិនសូវកំណាចខ្លាំងដាក់ជប៉ុន មានតែភ្លៀងខ្លាំងធ្វើឱ្យខូចខាតជាសម្ភារៈខ្លាំងកាលពីខែសីហានៅភាគខាងលិចប្រទេស តែនៅភាគខាងកើតវិញបែរជាមានគ្រោះរាំងស្ងួត ក្តៅខ្លាំងរហូតស្លាប់មនុស្សអស់ប្រមាណជាង៣៥០នាក់ ឯនៅតូក្យូគេនាំគ្នាព្រួយបារម្ភពីកង្វះទឹកបំរុងទុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ