ប្រជាជនជប៉ុនចាយវាយតិចជាងមុនក្នុងខែមេសា ដោយសារពន្ធលើការលក់ទំនិញកើនឡើងខ្ពស់
នៅថ្ងៃសុក្រនេះ រដ្ឋាភិបាលជប៉ុនបានចុះផ្សាយស្ថិតិបង្ហាញថាប្រជាជនជប៉ុនបានចាយវាយតិចជាងមុន ដោយសារតែពន្ធលើការលក់ទំនិញបានកើនឡើង ធ្វើអោយថ្លៃទំនិញឡើងខ្ពស់ជាងមុនច្រើន។ នេះជាផលវិបាកធ្វើអោយឧស្សាហកម្មជប៉ុនធ្វើការផលិតតិចជាងមុនដល់២,៥ភាគរយផងដែរ គិតសម្រាប់រយៈពេលមួយខែ។ ការធ្លាក់ចុះនៃការចាយវាយក្នុងស្រុក អាចនឹងរាំងស្ទះដល់គម្រោងសំទុះសេដ្ឋកិច្ចរបស់នាយករដ្ឋមន្ត្រីស្ហ៊ីនសូ អាបេ។
ចុះផ្សាយនៅថ្ងៃ៖
ស្តាប់ - ០១:៤២
យោងតាមស្ថិតិរបស់រដ្ឋាភិបាលជប៉ុន ចុះផ្សាយថ្ងៃសុក្រនេះ ប្រជាជនជប៉ុនបានចាយវាយតិចជាងមុន កាលពីខែមេសាកន្លងទៅ ដោយសារតែពន្ធលើការលក់ទំនិញបានកើនឡើងខ្ពស់ជាងមុន គឺកើនពី៥ភាគរយ ទៅ៨ភាគរយ នៅថ្ងៃ១មេសា។ ដូច្នេះ ថ្លៃទំនិញក៏បានកើនដល់៣,២ភាគរយផងដែរ គិតសម្រាប់រយៈពេលមួយឆ្នាំ។ គិតជាង២០ឆ្នាំមកនេះ នេះជាលើកទី១ហើយ ដែលពន្ធលើការលក់ទំនិញកើនឡើងខ្ពស់បែបនេះ។ នយោបាយបង្កើនពន្ធលើការលក់ទំនិញនេះ មានទិសដៅកាត់បន្ថយបំណុលរបស់រដ្ឋ។
ដោយសារនយោបាយនេះ ក្នុងខែមេសាកន្លងទៅ ជនជាតិជប៉ុនបានចាយវាយតិចជាងមុន ៤,៦ភាគរយ គិតសម្រាប់រយៈពេលមួយឆ្នាំ។ បើគិតសម្រាប់រយៈពេលមួយខែវិញ រោងចក្រនានាក៏បន្ថយការផលិតរបស់ខ្លួន តិចជាងមុន ដល់២,៥ភាគរយផងដែរ។ ដោយសារបញ្ហានេះ គម្រោងជំរុញសំទុះសេដ្ឋកិច្ចរបស់នាយករដ្ឋមន្ត្រីជប៉ុន ស្ហ៊ីនសូ អាបេ អាចនឹងជួបការរាំងស្ទះ។ ពេលនេះ រដ្ឋាភិបាលកំពុងរង់ចាំមើលថា តើទីផ្សារការងារដែលកំពុងជួបភាពប្រសើរឡើងវិញនោះ អាចនឹងជួយអោយអ្នកដែលមានការងារធ្វើនិងមានប្រាក់ខែ អាចទប់ទល់នឹងការកើនឡើងនៃពន្ធ និងតម្លៃទំនិញបានទេ។
រដ្ឋាភិបាលលោកអាបេ បានចេញផែនការសាងសង់ហេដ្ឋារចនាសម្ព័ន្ធជាច្រើន នៅភាគខាងជើងប្រទេស ដែលធ្លាប់រងគ្រោះដោយរលកយក្សស៊ូណាមី ក្នុងឆ្នាំ ២០១១។ ផែនការសេដ្ឋកិច្ចនេះ បានចូលរួមជួយអោយអត្រាអ្នកគ្មានការងារធ្វើក្នុងស្រុក ស្ថិតក្នុងកម្រិត៣,៦ភាគរយ ជាតួលេខទាបបំផុត គិតរយៈពេល៧ឆ្នាំមកនេះ។ រដ្ឋាភិបាលជប៉ុនបានចេញកញ្ចប់ថវិកាជាងមួយរយពាន់លានអឺរ៉ូ ដើម្បីដោះស្រាយសេដ្ឋកិច្ចជាតិ។ ធនាគារកណ្តាលនិងទីផ្សារបានជំរុញអោយលោកអាបេ សម្រេចអោយឃើញជាក់ស្តែងនូវកំណែទម្រង់រចនាសម្ព័ន្ធ។ មូលនិធិរូបិយវត្ថុអន្តរជាតិវិញ ក៏ជម្រុញអោយជប៉ុនធ្វើកំណែទម្រង់ថវិកាផងដែរ ដើម្បីចៀសវាងវិបត្តិបរិត្តផរណា និងធានាអោយបាននូវទំនុកចិត្តថា ជប៉ុនមានលទ្ធភាពសងបំណុលខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ