កងទ័ពហ្វីលីពីនព្យួរប្រតិបត្តិការល្បាតផ្លូវទឹកជាមួយអាមេរិក
កងទ័ពហ្វីលីពីនបានព្យួរសកម្មភាពល្បាតផ្លូវទឹករួមគ្នាជាមួយអាមេរិកនៅសមុទ្រចិន។ ថ្ងៃសុក្រនេះ រដ្ឋមន្ត្រីការពារជាតិហ្វីលីពីនលោកឌែលហ្វ៊ីន ឡូរេនហ្សាណា Delfin Lorenzana បានប្រកាសថា បានជូនដំណឹងនេះជាផ្លូវការទៅអាមេរិករួចហើយ ស្របតាមបញ្ជារបស់ប្រធានាធិបតីឌុយទែរតេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៧
ប្រមុខការពារជាតិហ្វីលីពីន លោកឌែលហ្វ៊ីន ឡូរេនហ្សាណា Delfin Lorenzana បានប្រកាសប្រាប់អ្នកសារព័ត៌មានថា សកម្មភាពល្បាតផ្លូវទឹកនៅសមុទ្រចិនខាងត្បូង ដែលហ្វីលីពីនត្រូវធ្វើរួមគ្នាជាមួយអាមេរិក ត្រូវបានព្យួរទុកសិន នៅពេលនេះ ហើយអាមេរិកក៏បានដឹងរឿងនេះដែរ។
ប្រមុខការពារជាតិហ្វីលីពីន ប្រាប់ទៀតថា លោកបានជូនដំណឹងនេះទៅមេបញ្ជាការកងទ័ពជើងទឹកអាមេរិក ប្រចាំនៅប៉ាស៊ីហ្វិករួចហើយ។
ប្រតិបត្តិការល្បាតជើងទឹករួមគ្នាជាមួយអាមេរិកនេះ ជាផែនការរបស់ហ្វីលីពីននិងអាមេរិក តាំងពីក្នុងអាណត្តិរដ្ឋាភិបាលរបស់លោកអាគីណូម្ល៉េះ។ ហ្វីលីពីនចង់ពង្រឹងវត្តមានយោធាអាមេរិក ក្នុងតំបន់ ដើម្បីប្រឈមនឹងចិន ដែលមានជម្លោះដែនទឹកជាមួយខ្លួន។
ប៉ុន្តែ តាំងពីលោកឌុយទែរតេឡើងកាន់អំណាចមក លោកបានប្រែហ្វីលីពីនអោយងាកទៅសហប្រតិបត្តិការជាមួយចិនវិញ។ ទំនាក់ទំនងរវាងអាមេរិកនិងហ្វីលីពីនវិញបានធ្លាក់ចុះជាលំដាប់ ពិសេសក្រោយពេលក្រុងវ៉ាស៊ីនតោនរិះគន់នយោបាយលោកឌុយទែរតេ ក្នុងការកំចាត់ឧក្រិដ្ឋជនគ្រឿងញៀន ដោយមិនឆ្លងកាត់ការកាត់ទោសតាមច្បាប់។ រហូតពេលនេះ នយោបាយកំចាត់ឧក្រិដ្ឋជនគ្រឿងញៀន បានសម្លាប់មនុស្សជាង៣៣០០នាក់ នៅហ្វីលីពីន។
កាលពីថ្ងៃអង្គារ លោកឌុយទែរតេ បានគំរាមកាត់ផ្តាច់ទាំងស្រុងនូវទំនាក់ទំនងជាមួយអាមេរិក។ លោកលើកឡើងថា លោកអស់មានការគោរពចំពោះអាមេរិកទៀតហើយ។ កាលពីចុងខែកញ្ញាកន្លងទៅ លោកឌុយទែរតេថែមទាំងចាត់ទុកលោកអូបាម៉ា ថាជាកូនស្ត្រីពេស្យាទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ