អារ៉ាប៊ី សាអ៊ូឌីត នឹងអនុញ្ញាតឲ្យស្រ្តី មានសិទ្ធិបើកបរដូចជាបរុសចាប់ពីខែមិថុនាឆ្នាំ ២០១៨
ព្រះមហាក្សត្រ Salman នៃរាជាណាចក្រអារ៉ាប៊ី សាអ៊ូឌីត ទើបបានចុះហត្ថលេខាលើក្រឹត្យមួយ អនុញ្ញាតឲ្យស្តី្រ មានសិទ្ធបើកបររថយន្តដូចបុរសដែរ នេះបើយោងតាមសាព័ត៌មានផ្លូវការណ៍មួយចុះផ្សាយកាលពីថ្ងៃអង្គារម្សិលមិញ។ គឺជាបដិវត្តន៍មួយដ៏ពិតៗនៅអារ៉ាប៊ីសាអ៊ូឌីត ប្រទេសតែមួយគត់នៅលើលោក ដែលស្រ្តីគ្មានសិទ្ធបើកបររថយន្ត។ សហគមន៍អន្តរជាតិ បានអបអរសាទរចំពោះសេចក្តីសម្រេចចិត្តជាប្រវត្តិសាស្រ្តមួយនេះរបស់អារ៉ាប៊ីសាអ៊ូឌីត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
បន្ទាប់ពីព្រះចៅសាលម៉ាននៃរាជាណាចក្រអារ៉ាប៊ី សាអ៊ូឌីត បានចុះហត្ថលេខាលើក្រឹត្យមួយដែលអនុញ្ញាតឲ្យស្រ្តីអារ៉ាប៊ីសាអ៊ូឌីត មានសិទ្ធនៅក្នុងការបើកបររថយន្តដូចជាបុរសដែរ សហគមន៍អន្តរជាតិសម្តែងការអបអរសាទរជាពន់ពេក ចំពោះសេចក្តីសម្រេចចិត្តជាប្រវត្តិសាស្រ្ត របស់ប្រទេសតែមួយគត់នៅលើលោកនេះ ពុំអនុញ្ញាតអោយស្ត្រីមានសិទ្ធិបើកបររថយន្ត។
លោក Antonio Guterres អគ្គលេខាធិការអ.ស.ប. បានថ្លែងអបអរសាទរដោយគូសបញ្ជាក់ថា គឺជាជំហានដ៏សំខាន់មួយនិងស្ថិតនៅលើម៌ាគាដ៏ល្អ។ ចំណែកលោកប្រធានាធិបតីអាមេរិកលោក Donald Trump វិញ បានកត់សម្គាល់ថា” ជាការវិវឌ្ឈ៍មួយប្រកបដោយវិជ្ជមាននៅលើការលើកតម្កើងសិទ្ធិនារីនៅក្នុងប្រទេសនេះ ដែលក៏ជាសម្ព័ន្ធមិត្តមួយរបស់សហរដ្ឋអាមេរិកនិងដែលជាញឹកញាប់ ត្រូវទទួលរងនូវការទិះតៀនពីសំណាក់សហគមន៍អន្តរជាតិនៅលើ បញ្ហាសិទ្ធិនារី។
គួរបញ្ជាក់ថា កាលពីយប់ថ្ងៃអង្គារម្សិលមិញ ព្រះចៅ Salmane បានចេញបញ្ជាឲ្យក្រសួងពាក់ព័ន្ធនានា ផ្តល់សិទ្ធិចេញអាជ្ញាប័ណបើកបរអោយទាំងបុរសនិងទាំងស្រី្ត នេះបើយោងតាមក្រឹត្យមួយដែលលាន់រន្ទឺ បីដូចជាការរំជួយព្រះធរណីអញ្ជឹង នៅក្នុងប្រទេសមួយនេះដែលជាប្រទេសប្រកាន់អភិរក្សនិយមអ៊ីស្លាមដ៏ហួសហេតុ។
គួររំលឹកថា តាំងពីជាច្រើនទស្សវត្ស៍កន្លងមកហើយ ក្រុមស្ត្រីសកម្មជនអារ៉ាប៊ីសាអ៊ូឌីត បានទាមទារវិធានការនេះ ដើម្បីអោយស្រ្តី អារ៉ាប៊ីសាអ៊ូឌីត មានសិទ្ធិបើកបររថយន្តក៏ដូចជាបុរសនៅក្នុងប្រទេស តែពួកគេខ្លះៗ ត្រូវបានអាជ្ញាធរឃាត់ខ្លួន ព្រោះតែពួកគេហ៊ានផ្គើនដាក់អាជ្ញាធរដោយមិនគោរពបំរាម។
ការផ្សព្វផ្សាយវិធានការខាងលើនេះដែលនឹងចូលជាធរមានគិតចាប់ពីខែមិថុនាឆ្នាំ២០១៨ខាងមុខនេះទៅ បានធ្វើអោយស្រ្តីអារ៉ាប៊ីសាអ៊ូឌីត មានក្តីរន្ធត់និងរីករាយឥតឧបមា មិននឹកស្មានថាពួកខ្លួននឹងមានសិទ្ធបើកបររថយន្តនៅលើផ្លូវសាធារណៈដូចគេដូចឯង នៅក្នុងអំឡុងពេលដ៏ឆាប់ៗខាងមុខនេះទេ។
សូមបញ្ជាក់ថា សេចក្តីសម្រេចចិត្តលើកបំរាមមិនអោយស្រ្តីបើកបរនេះ ត្រូវបានប្រព្រឹត្តទៅបន្ទាប់ពី ពួកស្រ្តីអារ៉ាប៊ីសាអ៊ូឌីត ត្រូវបានគេអនុញ្ញាត ឲ្យចូលរួមក្នុងការប្រារព្វពិធីបុណ្យជាតិកាលពីថ្ងៃសៅរ៍មុននេះ នៅក្នុងកីឡាស្ថានមួយ ដែលនេះ ក៏ជាព្រឹត្តិការណ៍លើកទីមួយដែរនៅក្នុងប្រទេសអារ៉ាប៊ី សាអ៊ូឌីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ