អ៊ីស្រាអែល៖ ប៉ូលិសសួរចម្លើយនាយករដ្ឋមន្ត្រីរឿងទទួលកាដូពីអ្នកជំនួញ
ប៉ូលិសអ៊ីស្រាអែល ត្រូវកោះហៅលោកនាយករដ្ឋមន្ត្រី នេតាន់យ៉ាហ៊ូ ទៅសួរចម្លើយនៅថ្ងៃចន្ទនេះ ពីបទសង្ស័យថាលោកបានទទួលកាដូ ខុសច្បាប់ ពីអ្នកជំនួញជាតិនិងអន្តរជាតិ។ ប្រសិនបើពិតដូចជាការសង្ស័យមែន នោះលោកនាយករដ្ឋមន្ត្រីអ៊ីស្រាអែល អាចនឹងត្រូវជាប់ចោទពីបទល្មោភអំណាច ឬប្រព្រឹត្តអំពើពុករលួយ។
ចុះផ្សាយនៅថ្ងៃ៖
ស្តាប់ - ០២:០១
ការកោះហៅនាយករដ្ឋមន្ត្រីទៅសួរចម្លើយ បានទទួលការអនុញ្ញាតរួចរាល់ហើយពីមេធាវី និងបន្ទាប់ពីការអង្កេតបឋម រយៈពេល៨ខែ និងដោយសម្ងាត់ បានរកឃើញភាពសង្ស័យឈានទៅបើកអង្កេតព្រហ្មទណ្ឌ។ នេះបើតាមប្រព័ន្ធឃោសនាមួយរបស់អ៊ីស្រាអែល ដែលអះអាងបន្ថែមទៀតថា នេះសំណុំរឿងចោទប្រកាន់ទីពីរប្រឆាំងនឹងលោកនាយករដ្ឋមន្ត្រី តែមិនបានផ្តល់ព័ត៌មានលម្អិតអ្វីទាំងអស់។
លោកនាយករដ្ឋមន្ត្រីអ៊ីស្រាអែល ត្រូវជាប់សង្ស័យថាបានទទួលកាដូជាច្រើនពីក្រុមអ្នកជំនួញជាតិអ៊ីស្រាអែល និងបរទេសជាច្រើននាក់។ កាដូនោះអាចមានតម្លៃជាទឹកប្រាក់ដល់ទៅរាប់សិបពាន់ដុល្លារអាមេរិក។ ប្រសិនបើពិតជាមានការទទួលកាដូមែន នោះមានន័យថា លោកនេតាន់យ៉ាហ៊ូ នឹងអាចជាប់ចោទប្រព្រឹត្តអំពើពុករលួយដ៏ធ្ងន់ធ្ងរ។
វិទ្យុជាតិអ៊ីស្រាអែល បានគូសបញ្ជាក់ការសួរចម្លើយនាយករដ្ឋមន្ត្រីត្រូវប្រព្រឹត្តទៅនៅម៉ោង១៥ ម៉ោងសកល ហើយលោកនាយករដ្ឋមន្ត្រីបានយល់ព្រមឱ្យប៉ូលិសសួរប៉ុន្មានលើកក៏បាន។ ប៉ុន្តែអ្នកនាំពាក្យប៉ូលិស ក៏ដូចជាអ្នកនាំពាក្យរដ្ឋាភិបាលបដិសេធមិនធ្វើអត្ថាធិប្បាយអ្វីទាំងអស់ បញ្ជាក់ក៏មិនបញ្ជាក់ បដិសេធក៏មិនបដិសេធ។
លោកនេតាន់យ៉ាហ៊ូ បានបង្ហោះសារនៅក្នុងប្រព័ន្ធសង្គម បដិសេធរាល់គ្រប់បទចោទប្រកាន់ ដោយវាយបកបក្សប្រឆាំងថាមិនអាចទម្លាក់លោកបាននៅពេលបោះឆ្នោត ទើបបានជាប្រឌិតរឿងអាស្រូវដើម្បីកម្ចាយលោកពីតំណែង។
កាន់តំណែងជានាយករដ្ឋមន្ត្រី តាំងពី២០០៩ លោកនេតាន់យ៉ាហ៊ូ ជាឥស្សរជននយោបាយអ៊ីស្រាអែល ដែលគេមើលឃើញថានឹងអាចបន្តអាណត្តិបានទៀត ព្រោះគ្មានគូប្រជែងច្បាស់លាស់ឡើយ។ ប៉ុន្តែបើតាមច្បាប់រដ្ឋធម្មនុញ្ញ សមាជិករដ្ឋាភិបាលណាដែលមានជាប់ចោទពុករលួយ ដាច់ខាតត្រូវតែលាលែងចេញពីតំណែង។ តុលាការអ៊ីស្រាអែលមិនអនុគ្រោះឡើយដល់ជនពុករលួយ។ នាយករដ្ឋមន្ត្រីអ៊ីស្រាអែលមុន Elhud Olmert ទើបបញ្ចប់ទោសជាប់ពន្ធនាគារ១៨ខែ កាលពីខែកុម្ភៈឆ្នាំ២០១៦ ពីបទបានទទួលសំណូក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ