ប៉ាឡេស្ទីនសុំឲ្យអាមេរិកជួយស្ថាបនាលក្ខន្តិកដើមនៅទីលានវិហារអ៊ីស្លាមអាល់ អាក្សា
២ថ្ងៃ ក្រោយពីបានទទួលជួបលោកនាយករដ្ឋមន្រ្តីអ៊ីស្រាអែលបិនយ៉ាមីន នេតាន់យ៉ាហ៊ូក្នុងទីក្រុងប៊ែរឡាំង ប្រទេសអាល្លឺម៉ង់មក លោកប្រមុខការទូតអាមេរិកចន ឃ៊ែរីបានទទួលជួបលោកប្រធានរដ្ឋអំណាចប៉ាឡេស្ទីនម៉ាមូដ អាបាស់ក្នុងទីក្រុងអាម៉ាន់ ប្រទេសហ្សកដានីនាថ្ងៃសៅរ៍ ទី២៤ តុលា។ នៅក្នុងជំនួបជាមួយលោកឃ៊ែរី លោកអាបាស់បានស្នើលោកឃ៊ែរីឲ្យជួយអន្តរាគមន៍ដើម្បីរក្សាស្ថានភាពដើមនៅទីលានវិហារសាសនាអ៊ីស្លាមក្នុងទីក្រុងហ្សេរុយសាឡិមខាងកើត។ បន្ទាប់ពីជួបលោកអាបាស់ លោកឃ៊ែរីក៏បានជួបសន្ទនាជាមួយស្តេចហ្សកដានីអាប់ដាឡាទី២ ដែរ។
ចុះផ្សាយនៅថ្ងៃ៖
ស្តាប់ - ០២:២០
ជំនួបដាច់ដោយឡែកពីគ្នារវាងប្រមុខការទូតអាមេរិក និងប្រមុខរដ្ឋាភិបាលអ៊ីស្រាអែល ព្រមទំាងរវាងប្រមុខការទូតអាមេរិក និងប្រធានរដ្ឋអំណាចប៉ាឡេស្ទីនបានធ្វើឡើង គឺក្នុងគោលដៅស្វែងរកដំណោះស្រាយបិទបញ្ចប់អំពើហិង្សារវាងអ៊ីស្រាអែល និងប៉ាឡេស្ទីនដែលបានផ្ទុះតំាងពី ៣សប្តាហ៍នៅលើទីលានវិហារសាសនាអ៊ីស្លាមអាល់ អាក្សា (Al-Aqsa) ស្ថិតក្នុងទីក្រុងហ្សេរុយសាឡិមខាងកើត។ នៅក្នុងជំនួបជាមួយលោកប្រមុខការទូតអាមេរិកចន ឃ៊ែរី លោកម៉ាមូដ អាបាស់បានស្នើលោកឃ៊ែរីឲ្យជួយអន្តរាគមន៍ក្នុងការរក្សាលក្ខន្តិកដើមរបស់វិហារអាល់ អាក្សាដែលបានកំណត់ក្នុងឆ្នំា ១៩៦៧។
សំណើរបស់ប្រមុខរដ្ឋអំណាចប៉ាឡេស្ទីនយ៉ាងដូចនេះមកពីលោកអាបាស់បានយល់ឃើញថា លោកនាយករដ្ឋមន្រ្តីអ៊ីស្រាអែលបិនយ៉ាមីន នេតាន់យ៉ាហ៊ូបានផ្លាស់ប្តូរច្បាប់ដើមស្តីពីការកាន់កាប់ និងត្រួតពិនិត្យនៅវិហារអាល់ អាក្សាដែលជាកន្លែងសាសនាជាទីសក្ការៈទី៣ របស់អ្នកកាន់សាសនាអ៊ីស្លាម។ គួរជម្រាបជូនថា បើផ្អែកតាមកិច្ចព្រមព្រៀងដែលអ៊ីស្រាអែលបានចុះហត្ថលេខាជាមួយប្រទេសហ្សកដានីក្នុងឆ្នំា ១៩៩៤ ហ្សកដានីជាអ្នកគ្រប់គ្រងថែរក្សា ក៏ដូចជាត្រួតពិនិត្យការចេញ ចូលនៅក្នុងវិហារអាល់ អាក្សា។ តែនៅជាង ១០ឆ្នំាចុងក្រោយនេះ អ៊ីស្រាអែលបានបញ្ជូនកម្លំាងប៉ូលិសរបស់ខ្លួនទៅឲ្យត្រួតពិនិត្យ និងឆែកឆេរការចេញទៅក្នុងវិហារនោះ។
នៅថ្ងៃសុក្រ ទី២៣ តុលា កិច្ចប្រជុំចតុភាគី រួមមានអាមេរិក រុស្ស៊ី សហភាពអឺរ៉ុប និងអង្គការសហប្រជាជាតិក៏បានអំពាវនាវនៅក្នុងសេចក្តីថ្លែងការណ៍មួយដោយបានស្នើឲ្យអ៊ីស្រាអែលសហការណ៍ជាមួយហ្សកដានីក្នុងការរក្សាលក្ខន្តិកដើមឲ្យវិហារអាល់ អាក្សាដែរ។ ទន្ទឹមគ្នានេះ ចតុភាគីក៏បានអំពាវនាវឲ្យភាគីជម្លោះនីមួយៗព្យាយាមរក្សាភាពអត់ធ្មត់ដើម្បីបញ្ឈៀសរាល់ទង្វើបង្ករឿងគ្រប់រូបភាព។
បន្ទាប់ពីបានជួបសន្ទនាជាមួយលោកអាបាស់ និងមិនបានថ្លែងអ្វីមួយម៉ាត់សោះនៅក្រោយជំនួបមក លោកចន ឃ៊ែរីក៏បានចូលជួបសន្ទនាជាមួយស្តេចហ្សកដានីអាប់ដាឡាទី២។ ក្រៅពីសំណុំរឿងអ៊ីស្រាអែល និងប៉ាឡេស្ទីន លោកឃ៊ែរី និងស្តេចអាប់ដាឡាទី២ ក៏បានលើកសំណុំរឿងស៊ីរីទៅនិយាយដែរ ពិសេសទាក់ទងនឹងកិច្ចព្រមព្រៀងរវាងហ្សកដានី និងរុស្ស៊ីស្តីពីការរួមសហការណ៍គ្នានៅក្នុងប្រតិបត្តិការផ្លូវអាកាសលើប្រទេសស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ