អេហ្ស៊ីប៖លោកអាល់ស៊ីស៊ីសន្យាជាថ្មីថានឹងរៀបចំបោះឆ្នោតសភានៅមុនដំណាច់ឆ្នំា ២០១៥
នៅក្នុងប្រទេសអេហ្ស៊ីប លោកប្រធានាធិបតីអាប់ដែល ហ្វាតាអាល់ស៊ីស៊ីបានសន្យាជាថ្មីក្នុងថ្ងៃពុធ ទី២៩ មេសាថា លោកនឹងរៀបចំការបោះឆ្នោតសភាឲ្យបានមុនដំណាច់ឆ្នំា ២០១៥ នេះ។ ការលើកពេលបោះឆ្នោតជាថ្មីពេលនេះត្រូវបានលោកអាល់ស៊ីស៊ីលើកយកហេតុផលបញ្ជាក់ថា កំពុងជាប់ដៃគិតគូរពីជីវភាពរស់នៅ និងសន្តិសុខរបស់ប្រជាជន ពិសេសប្រឈមទប់នឹងការគំរាមកំហែងរបស់ពួកភេរវជន។ គួរជម្រាបជូនថា ការរៀបចំបោះឆ្នោតសភាត្រូវបានគ្រោងធ្វើតំាងពីខែមីនាមកម្ល៉េះ តែត្រូវលើកពេលម្តងជាពីរដង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
គឺនៅក្នុងបទសម្ភាសន៍មួយផ្តល់ឲ្យកាសែតប្រចំាថ្ងៃអេស្បាញឈ្មោះ EL Mundo ចេញផ្សាយថ្ងៃពុធ ទី២៩ មេសាដែលលោកប្រធានាធិបតីអេហ្ស៊ីបអាល់ស៊ីស៊ីបានប្រាប់ឲ្យដឹងពីការរៀបចំបោះឆ្នោតសភាអេហ្ស៊ីបនៅមុនដំណាច់ឆ្នំា ២០១៥ នេះ តែលោកមិនបានបញ្ជាក់ថ្ងៃខែឲ្យបានច្បាស់លាស់ទេ។ ការផ្តល់បទសន្ទនាឲ្យកាសែតអេស្បាញ ព្រោះអេស្បាញជាប្រទេសដែលលោកអាល់ស៊ីស៊ីផ្តើមទស្សនកិច្ចផ្លូវការក្នុងថ្ងៃព្រហស្បតិ៍ ទី៣០ មេសា។ គួររម្លឹកជូនថា តំាងពីឧត្តមសេនីយអាល់ស៊ីស៊ីបានធ្វើរដ្ឋប្រហារយោធាទម្លាក់លោកប្រធានាធិបតីស្របច្បាប់ម័រស៊ីក្នុងខែកក្កដា ឆ្នំា ២០១៣ រួចក្លាយខ្លួនឯងជាប្រធានាធិបតីក្នុងខែឧសភា ឆ្នំា ២០១៤ មក លោកអាល់ស៊ីស៊ីបានរងការចោទប្រកាន់ពីបទប្រើអំណាចផ្តាច់ការតាមបំបាត់ក្រុមប្រឆំាង។
លោកធ្លាប់បានសន្យារៀបចំបោះឆ្នោតសភាតំាងពីខែមីនា តែត្រូវបានលើកពេល បន្ទាប់ពីតុលាការធម្មនុញ្ញបានច្រានចោលមាត្រាមួយចំនួននៃច្បាប់បោះឆ្នោតដែលក្រុមគណបក្សប្រឆំាងបានតវ៉ាមិនសុខចិត្ត។ តែក្រៅពីលើកយកសេចក្តីសម្រេចចិត្តរបស់តុលាការធម្មនុញ្ញទៅនិយាយ លោកអាល់ស៊ីស៊ីក៏បានបញ្ជាក់ពីហេតុផលផ្សេងទៀតដែលជម្រុញលោកឲ្យលើកការបោះឆ្នោតសភាទៅថ្ងៃខាងមុខ។ សុទ្ធសឹងជាហេតុផលដែលលោកគិតថា មានអាទិភាពជាងការរៀបចំបោះឆ្នោតទៅទៀត រួមមាន ការគិតគូររឿងជីវភាព និងសន្តិសុខរបស់ប្រជាជនទំាង ៩០លាននាក់ និងការប្រឈមទប់នឹងទង្វើបោះបោរ ក៏ដូចជាអំពើភេរវកម្មដែលនឹងអាចនំាអេហ្ស៊ីបឲ្យធ្លាក់ក្នុងភាពវឹកវរ និងសង្រ្គាមស៊ីវិល។
យ៉ាងណាក៏ដោយ លោកអាល់ស៊ីស៊ីបានព្យាយាមការពារតុល្យការវិជ្ជមាននៃការកាន់អំណាចរបស់លោក និងថែមទំាងហ៊ានប្រកាសក្តែងៗថា អេហ្ស៊ីបសព្វថ្ងៃកំពុងធ្វើដំណើរទៅរកលទ្ធិប្រជាធិបតេយ្យ ព្រោះអេហ្ស៊ីបមានឆន្ទៈនយោបាយគោរពតាមការចង់បានរបស់ប្រជាជន។ លោកអាល់ស៊ីស៊ីបានបន្ថែមដោយមោទនភាពថា បើលោកមិនចូលខ្លួនអន្តរាគមន៍ទេ ម្លេះអេហ្ស៊ីបធ្លាក់ក្នុងសង្រ្គាមស៊ីវិលបាត់ទៅហើយ។ តែទាក់ទងនឹងសំណួររឿងកាត់ទោសលោកម័រស៊ីដាក់គុក ២០ឆ្នំានាពេលថ្មីៗនេះ លោកអាល់ស៊ីស៊ីព្យាយាមមិនឆ្លើយដោយបង្វែររឿងនេះថា ជារឿងរបស់តុលាការ។ គួរជម្រាបជូនថា តំាងពីលោកអាល់ស៊ីស៊ីឡើងកាន់អំណាច មានសកម្មជនគំាទ្រលោកម័រស៊ីយ៉ាងតិច ១ ៤០០នាក់បានបាត់បង់ជីវិត និងជាង ១៥ ០០០នាក់កំពុងជាប់គុកដែលខ្លះបានទទួលទោសប្រហារជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ