ឃាតកម្មលោកគីម ជុងណាម៖ ម៉ាឡេស៊ីហៅតំណាងទូតកូរ៉េខាងជើងមកសួរ
ក្រសួងការបរទេសម៉ាឡេស៊ីកោះហៅឯកអគ្គរដ្ឋទូតរបស់កូរ៉េខាងជើងនៅថ្ងៃចន្ទនេះ ដើម្បីសាកសួរលើករណីឃាតកម្មលោកគីមជុងណាម ជាបងប្អូនលោកគីមជុងអ៊ុន មេដឹកនាំកូរ៉េខាងជើង។ ការកោះហៅនេះបានធ្វើឲ្យជម្លោះការទូតរវាងប្រទេសទាំងពីរកំពុងធ្លាក់ចូលទៅភាពតានតឹងកាន់តែខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ក្រោយពីមានការទាញភ្ជាប់ជនជាតិកូរ៉េខាងជើង៥នាក់ ទៅនឹងហេតុការណ៍បាញ់សម្លាប់លោកគីមជុងណាម នៅព្រលានយន្តហោះកាលពីសប្តាហ៍មុន បានធ្វើឲ្យមានការខឹងសម្បារយ៉ាងខ្លាំងពីក្រុងព្យុងយ៉ាង។ ក្រុងព្យុងយ៉ាងបានចោទប្រកាន់ គូឡាឡាំពួថាបានឃុបឃិតជាមួយ “កំលាំងសត្រូវ” ដើម្បីបំផ្លាញកេរ្តិ៍ឈ្មោះរបស់ខ្លួន ដោយសារតែម៉ាឡេស៊ីភ្ជាប់ជនជាតិកូរ៉េខាងជើងទៅនឹងឃាតកម្មនេះ។ ជាការឆ្លើយតបប្រទេសម៉ាឡេស៊ីបានកោះហៅឯកអគ្គរដ្ឋទូតកូរ៉េខាងជើងប្រចាំទីក្រុងគូឡាឡាំពួរ ដើម្បីសាកសួរបន្ថែមជុំវិញរឿងរ៉ាវខាងលើនេះ។ នេះបើតាមសេចក្តីថ្លែងការណ៍របស់ក្រសួងការបរទេសម៉ាឡេស៊ី។
ក្នុងសេចក្តីថ្លែងការណ៍នោះ បានឲ្យដឹងទៀតថា ហេតុការណ៍ឃាតកម្មលោកគីមជុងណាម ដែលកើតនៅលើទឹកដីម៉ាឡេស៊ី មិនទាន់ត្រូវបានបកបង្ហាញមុខឃាតករពិតនៅឡើយទេ។ ដូច្នេះហើយរដ្ឋាភិបាលម៉ាឡេស៊ីត្រូវតែធ្វើការស៊ើបអង្កេតមួយ ក្នុងគោលដៅស្វែងរកមូលហេតុពិតប្រាកដ ដែលបណ្តាលឲ្យលោកគីមជុងណាមស្លាប់។
គូរជម្រាបជូនថា ការឆ្លងឆ្លើយគ្នាតាមកាទូតមិនដាច់ស្រេចរវាងម៉ាឡេស៊ី និងកូរ៉េខាងជើង កើតឡើងនៅពេលដែលប៉ូលីសម៉ាឡេស៊ីបានបដិសេធមិនឲ្យកូរ៉េខាងជើងយកសាកសពរបស់លោកគីមជុងណាមត្រឡប់ទៅវិញ បន្ទាប់ពីលោកត្រូវបានគេសង្ស័យថាស្លាប់ដោយសារថ្នាំបំពុល។
លោកកាង ចូល ឯកអគ្គរដ្ឋទូតកូរ៉េខាងជើង បានប្រាប់ក្រុមអ្នកកាសែតនៅកន្លែងដាក់សពលោកជុងណាមកាលពីសប្តាហ៍មុនថា ម៉ាឡេស៊ីកំពុងតែរងសម្ពាធពីកូរ៉េខាងត្បូង ដើម្បីបង្ខូចកេរ្តិ៍ឈ្មោះកូរ៉េខាងជើង។ ទីក្រុងសេអ៊ូលបានចោទប្រកាន់ថាឃាតកម្មនេះគឺជាការបញ្ជារបស់លោកគីមជុងអ៊ុនមេដឹកនាំកូរ៉េខាងជើង ហើយកាលពីឆ្នាំ២០១២កន្លងទៅក៏មានការប៉ុនប៉ងធ្វើបាតុកម្មដែរ តែមិនបានសម្រេច។
ប៉ូលីសម៉ាឡេស៊ីជឿថាមានជនជាតិកូរ៉េខាងជើង៥នាក់ ដែលមានជាប់ពាក់ព័ន្ធក្នុងឃាតកម្មលោកគីមជុងណាម។ រហូតមកដល់ពេលនេះប៉ូលីសបានចាប់ខ្លួនជនជាតិកូរ៉េខាងជើងម្នាក់ ស្រី្តជនជាតិឥណ្ឌូនេស៊ីម្នាក់ បុរសជនជាតិម៉ាឡេស៊ីម្នាក់ និងជានារីជនជាតិវៀតណាម្នាក់ផងដែរ។
សូមបញ្ជាក់ថាលោកគីម ជុងណាម បើពិតជាត្រូវធ្វើឃាតតាមបញ្ជាមេដឹកនាំកូរ៉េខាងជើងមែន គឺជាមនុស្សសំខាន់ទី ២ ក្នុងថ្នាក់ដឹកនាំជាន់ខ្ពស់របស់របបកុម្មុយនិស្ត កូរ៉េខាងជើង ដែលត្រូវបានសម្លាប់ ក្រោមការដឹកនាំរបស់លោកគីម ជុងអ៊ុន។ ជនរងគ្រោះទី ១ គឺឪពុកមាថ្លៃ ដែលលោកគីម ជុងអ៊ុន ទើបបានបញ្ជាឲ្យគេកាត់ទោសប្រហារជីវិត ក្នុងបទប៉ុនប៉ងផ្តួលរំលំអំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ