ទីក្រុងម៉ូស្គូប្រកាសនិរទេសជាតិតាហ្ស៊ីគ១០០នាក់ចេញពីរុស្ស៊ី
គឺថ្ងៃសុក្រ១១វិច្ឆិកានេះ ដែល “ស្ថាប័នអន្តោប្រវេសន៍រុស្ស៊ី” ហៅថា FMS បានប្រកាសអំពីការសម្រេចចិត្តនិរទេសកម្មករតាហ្ស៊ីគ ១០០នាក់ ក្រោមលេសថា ពួកគេស្ថិតនៅលើដែនដីរុស្ស៊ី ដោយខុសច្បាប់។ ចំណែកប្រភពការទូតរុស្ស៊ីបានថ្លែងទៅទីភ្នាក់ងារព័ត៌មាន RIA Novosty ថា ការនិរទេសនេះជាភាគមួយនៃចម្លើយព្រមានចាត់ដោយប្រធានាធិបតីរុស្ស៊ី លោកមេដវេដេវ តបនឹងការកាត់ទោសអ្នកបើកយន្តហោះជាតិរុស្ស៊ីម្នាក់ ដោយតុលាការតាហ្ស៊ីគីស្ថាន ឲ្យជាប់ពន្ធនាគារដល់៨ឆ្នាំកន្លះ។
ចុះផ្សាយនៅថ្ងៃ៖
ស្តាប់ - ០២:០៦
ភាពរកាំរកូស រវាងរុស្ស៊ី និងតាហ្ស៊ីគីស្ថាន កើតឡើង គឺក្រោយពីថ្ងៃ៨វិច្ឆិកាកន្លងទៅ តុលាការតាហ្ស៊ីគីស្ថានបានចេញសាលក្រមកាត់ទោសអ្នកបើកយន្តហោះ២នាក់៖ ម្នាក់ជាតិរុស្ស៊ីឈ្មោះ Vladimir Sadovnichi និង ម្នាក់ទៀតឈ្មោះ Alexei Roudenko ជាតិអេស្តូនី ឲ្យជាប់គុកម្នាក់ៗ ៨ឆ្នាំកន្លះ តាមបទចោទប្រកាន់ថា ទី១ បានបើកឆ្លងកាត់ព្រំដែនតាហ្ស៊ីគីស្ថាន ដោយខុសច្បាប់ ទី២ បានរំលោភលើច្បាប់អន្តរជាតិខាងហោះហើរ ទី៣ បានប្រព្រឹត្តអំពើរត់គយ។
ជាការរំឭក អ្នកទាំងពីរបានត្រូវអាជ្ញាធរតាហ្ស៊ីគឃាត់ខ្លួន តាំងពីខែមីនាម៉្លេះ ក្រោយពីយន្តហោះស៊ីវិលខាងដឹកជញ្ជូនទាំងពីរគ្រឿងរបស់គេ បន្ទាប់ពីហោះត្រឡប់ពីអាហ្វហ្កានីស្ថានដោយមកពីខ្វះសាំង បានបង្ខំខ្លួនចុះចតទាំងមានការអនុញ្ញាតជាមុន ពីខាងប៉ុស្តិ៍កុងត្រូល នៃអាកាសយានដ្ឋានមួយ នៅប៉ែកខាងត្បូងតាហ្ស៊ីគីស្ថាន។ ប៉ុន្តែ ក្រោយពីចុះចត អាជ្ញាធរតាហ្ស៊ីគីស្ថានបានប្រទះភ្នែកឃើញក្នុងយន្តហោះមួយ គឺមានផ្ទុកទៅដោយម៉ាស៊ីនយន្តហោះដ៏កញ្ចាស់មួយ ដែលដោះទៅជាបំណែកៗទៅហើយ។ គឺវត្ថុនេះឯង ដែលក្លាយទៅជាការចោទអ្នកទាំងពីរថាប្រព្រឹត្តអំពើរត់គយ។
ថ្ងៃ៩វិច្ឆិកា លោកប្រធានាធិបតីរុស្ស៊ី មេដវេដេវ បានប្រតិកម្មយ៉ាងក្តួលក្តៅថា ការចោទប្រកាន់នោះ គឺជាការប្រឌិតឡើងទេតើ។ ហើយសំណុំរឿងអ្នកបើកយន្តហោះទាំងពីរញ៉ាំងឲ្យមានសំណួរច្រើនជាងចម្លើយ។ លោកមេដវេដេវ បានព្រមានថា ចម្លើយពីខាងម៉ូស្គូ គឺអាស្រ័យនឹងការពន្យល់បំភ្លឺពីខាង ទីក្រុង Douchanbe។
ក្រោយពីឮពាក្យព្រមាននេះ របស់ប្រមុខរដ្ឋខ្លួន តាំងពីថ្ងៃ១០វិច្ឆិកាម្សិលមិញមក ពួកជាតិនិយម នៅរុស្ស៊ី ក៏បានដៃនាំគ្នាតាមប្រមាញ់ចាប់ជនបរទេសណា ដែលមានមុខមាត់មកពីតំបន់អាស៊ីកណ្តាល ហើយច្បិចយកនរណា ដែលជាជាតិតាហ្ស៊ីគ។
តាម “ស្ថាប័នអន្តោប្រវេសន៍រុស្ស៊ី” បច្ចុប្បន្ន មានជាតិតាហ្ស៊ីគលក់កម្លាំងធ្វើការស៊ីឈ្នួល ក្នុងប្រទេសរុស្ស៊ី ប្រមាណ២លាននាក់ ដែលក្នុង១ឆ្នាំៗ ផ្ញើលុយទៅជួយឧបត្ថម្ភគ្រួសារខ្លួន ក្នុងទំហំដល់ ៦.០០០លានដុល្លារអាមេរិក ឬស្មើនឹង២ដងនៃទំហំថវិកាជាតិតាហ្ស៊ីគផ្ទាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ