ព្រះមហាក្សត្រអេស្ប៉ាញដាក់រាជ្យ ក្រោយពីបានគ្រងរាជ្យអស់រយៈពេលជិត៣៩ឆ្នាំ
ព្រះមហាក្សត្រអេស្ប៉ាញ ដែលបានគ្រងរាជ្យអស់រយៈពេល ជិត៣៩ឆ្នាំមកហើយនោះ បានប្រកាស នៅថ្ងៃចន្ទថា ព្រះអង្គបានសម្រេចដាក់រាជ្យ ហើយប្រគល់រាជបល្ល័ង្កទៅឲ្យបុត្រាជាអ្នកស្នងបន្ត។ ព្រះអង្គបានពន្យល់ថា ការដាក់រាជ្យនេះធ្វើឡើង ដើម្បីឲ្យមានការផ្លាស់ប្តូរមួយ នៅក្នុងរាជានិយមអេស្ប៉ាញ ដោយទុកឲ្យអ្នកជំនាន់ក្រោយជាអ្នកឡើងមកបន្តវេនវិញម្តង។
ចុះផ្សាយនៅថ្ងៃ៖
ស្តាប់ - ០២:១២
ព្រះមហាក្សត្រអេស្ប៉ាញ Juan Carlos បានឡើងគ្រងរាជ្យ កាលពីខែវិច្ឆិកា ឆ្នាំ១៩៧៥ ក្រោយពីមេដឹកនាំផ្តាច់ការអេស្ប៉ាញ Francisco Franco ត្រូវទទួលមរណភាព។ នៅក្នុងការគ្រងរាជ្យ រយៈពេល ជិត៣៩ឆ្នាំកន្លងទៅនេះ ព្រះអង្គបានចូលរួមចំណែក ក្នុងការនាំប្រទេសអេស្ប៉ាញ ពីរបបផ្តាច់ការ ឆ្ពោះទៅរកលទ្ធិប្រជាធិបតេយ្យ។
ក៏ប៉ុន្តែ មួយរយៈកាលចុងក្រោយនេះ ព្រះអង្គត្រូវជួបនឹងបញ្ហាជាច្រើន ទាំងបញ្ហាសុខភាពដែលធ្លាក់ចុះទន់ខ្សោយផង និងមានរឿងអាស្រូវជាច្រើនផង ទាក់ទងនឹងរាជវង្សានុវង្សរបស់ព្រះអង្គ។
នៅក្នុងសន្ទុរកថា តាមទូរទស្សន៍ជាតិ នៅថ្ងៃចន្ទ ព្រះបាទ Juan Carlos បានពន្យល់ថា ព្រះអង្គសម្រេចដាក់រាជ្យនេះ គឺដើម្បីទុកឱកាសឲ្យក្មេងជំនាន់ក្រោយជាអ្នកបន្តវេន ក្នុងការដឹកនាំប្រទេសអេស្ប៉ាញ ទៅរកអនាគតមួយភ្លឺស្វាង។
ព្រះអង្គបានមានបន្ទូលថា “វិបត្តិសេដ្ឋកិច្ចដ៏ធ្ងន់ធ្ងរ ដែលអេស្ប៉ាញបានឆ្លងកាត់ មិនត្រឹមតែបានបន្សល់ទុកនូវស្នាមរបួស នៅក្នុងស្រទាប់សង្គមរបស់យើងប៉ុណ្ណោះទេ ក៏ប៉ុន្តែ វាក៏ជាការចង្អុលបង្ហាញដល់យើងផងដែរនូវផ្លូវដែលត្រូវដើរ ទៅរកអនាគតមួយដ៏ភ្លឺស្វាង។ ក្មេងជំនាន់ក្រោយគួរតែត្រូវបានផ្តល់ឱកាសឲ្យដើរតួនាទីចម្បង ដើម្បីកសាងគ្រឹះ សម្រាប់អនាគតនេះ។ ដូច្នេះ នៅពេលនេះ មនុស្សជំនាន់ក្រោយ ដែលពោរពេញទៅដោយកម្លាំងនិងថាមពល ត្រូវតែជាអ្នកដើរជួរមុខគេ។ មនុស្សជំនាន់ក្រោយ ដែលបានត្រៀមខ្លួនរួចជាស្រេច ដើម្បីនាំមកនូវការផ្លាស់ប្តូរ ដែលសមស្របទៅតាមកាលៈទេសៈជាក់ស្តែង។ មនុស្សជំនាន់ក្រោយ ដែលបានត្រៀមខ្លួនជាស្រេច ក្នុងការប្រឈមមុខនឹងបញ្ហានៃថ្ងៃអនាគត។”
មនុស្សជំនាន់ក្រោយ ដែលនឹងត្រូវឡើងមកស្នងរាជ្យបន្តពីព្រះបាទ Juan Carlos គឺព្រះអង្គម្ចាស់ Felipe រាជបុត្រវ័យ ៤៦ឆ្នាំ។ ក៏ប៉ុន្តែ គេនៅមិនទាន់ដឹងច្បាស់នៅឡើយទេថា តើការផ្ទេររាជបល្ល័ង្កនេះនឹងត្រូវធ្វើឡើងនៅពេលណាពិតប្រាកដ?
លោក Mariano Rajoy នាយករដ្ឋមន្រ្តីអេស្ប៉ាញ បានកោះប្រជុំគណៈរដ្ឋមន្រ្តីវិសាមញ្ញមួយ នៅថ្ងៃអង្គារនេះ ដើម្បីពិភាក្សាអំពីការដាក់រាជ្យរបស់ព្រះមហាក្សត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ