អាមេរិកដកតួកគីចេញពីកម្មវិធីផលិតយន្តហោះចម្បាំង F-35 បន្ទាប់ពីតួកគីទិញមីស៊ីលរុស្ស៊ី
សេតវិមានអាមេរិក នៅថ្ងៃពុធ ទី១៧កក្កដាម្សិលមិញ បានប្រកាសដកតួកគីចេញពីកម្មវិធីផលិតយន្តហោះចម្បាំងទំនើប F-35។ ការសម្រេចនេះ ធ្វើឡើងបន្ទាប់ពីតួកគីបន្តទិញមីស៊ីលពីរុស្ស៊ី។ រដ្ឋមន្ដ្រីក្រសួងការបរទេសតួកគី បានចាត់ទុកការសម្រេចជាឯកត្តោភាគីរបស់អាមេរិកដូច្នេះ ថាជារឿងអយុត្តិធម៌ និងមិនសមហេតុផល។
ចុះផ្សាយនៅថ្ងៃ៖ កែប្រែថ្ងៃទី៖
«អយុត្តិធម៌ មិនសមហេតុផល និងដើរផ្ទុយពីស្មារតីជាសម្ព័ន្ធមិត្ត» នេះគឺជាប្រតិកម្មរបស់ប្រមុខការទូតតួកគី ឆ្លើយតបនឹងសេចក្ដីសម្រេចរបស់សហរដ្ឋអាមេរិក ដកតួកគីចេញពីកម្មវិធីផលិតយន្តហោះចម្បាំង ធុន F-35 ដ៏ទំនើបរបស់អាមេរិក។
គួរជម្រាបជូនថា សេចក្ដីសម្រេចរបស់អាមេរិកដូច្នេះ ធ្វើឡើងតែប្រាំថ្ងៃប៉ុណ្ណោះ បន្ទាប់ពីតួកគី បានចាប់ផ្ដើមទទួលប្រព័ន្ធខែលមីស៊ីល ប្រភេទ S-400 ពីរុស្ស៊ី។ អាមេរិក បានប្រាប់តួកគី ម្ដងហើយម្ដងទៀត កុំឲ្យទិញប្រព័ន្ធមីស៊ីលពីរុស្ស៊ី ក្នុងហេតុផលថា មីស៊ីលប្រឆាំងយន្តហោះរបស់រុស្ស៊ី មិនស្របនឹងគោលនយោបាយរបស់អង្គការអូតង់ ដែលតួកគីជាសមាជិក។
នៅក្នុងសេចក្ដីថ្លែងការណ៍របស់ខ្លួន ចុះថ្ងៃពុធ ទី១៧កក្កដា សហរដ្ឋអាមេរិកបានពន្យល់ពីការសម្រេចចិត្តនេះថា ធ្វើឡើងដោយសារតែតួកគី បន្តទិញប្រព័ន្ធខែលមីស៊ីលពីរុស្ស៊ី។ អាមេរិកសង្កត់ធ្ងន់ថា កម្មវិធីផលិតយន្តហោះចម្បាំង F-35 របស់អាមេរិក មិនអាចរួមរស់ជាមួយប្រព័ន្ធមីស៊ីលរបស់រុស្ស៊ីបានឡើយ។ សម្រាប់អាមេរិក ប្រព័ន្ធមីស៊ីលប្រភេទ S-400 របស់រុស្ស៊ី គឺជាប្រព័ន្ធប្រមូលព័ត៌មានសម្ងាត់។ ហើយការប្រើប្រាស់យន្តហោះចម្បាំងអាមេរិកទន្ទឹមនឹងមីស៊ីលរុស្ស៊ី គឺប្រៀបបាននឹងការផ្ញើសាច់នឹងមាត់ខ្លា។ មានន័យថា រុស្ស៊ីអាចមានឱកាសខ្ពស់ ក្នុងការស្វែងយល់ពីអាថ៌កំបាំងបច្ចេកវិទ្យាដ៏ទំនើបរបស់យន្តហោះចម្បាំងអាមេរិក F-35។
យ៉ាងណាក៏ដោយ សហរដ្ឋអាមេរិក តាមរយៈសេចក្ដីថ្លែងការណ៍ដដែល បានបន្តបញ្ជាក់ពីជំហររបស់ខ្លួននៅក្នុងទំនាក់ទំនងជាសម្ព័ន្ធមិត្តជាមួយតួកគី។ ទីក្រុងវ៉ាស៊ីនតោនអះអាងថា ខ្លួននៅតែឲ្យតម្លៃខ្ពស់ចំពោះទំនាក់ទំនងជាយុទ្ធសាស្ត្រជាមួយទីក្រុងអង់ការ៉ា។ ប៉ុន្តែទន្ទឹមគ្នានេះ ទីក្រុងវ៉ាស៊ីនតោន ក៏បានព្រមានតួកគីផងដែរ ពីផលប៉ះពាល់អវិជ្ជមាន តាមរយៈទំនាក់ទំនងជាមួយរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ