យន្តហោះប៊ូអ៊ីង៧៧៧៖ការស្វែងរកបំណែកវត្ថុអណ្តែតលើទឹក មិនទាន់ផ្តល់លទ្ធផលអ្វីទេ
នៅថ្ងៃសុក្រនេះ ប្រតិបត្តិការស្វែងរកយន្តហោះប៊ូអ៊ីង៧៧៧របស់ក្រុមហ៊ុនម៉ាឡេស៊ីអ៊ែរឡាញ ដែលបាត់ខ្លួន១៣ថ្ងៃមកហើយនោះ បានបន្តធ្វើនៅចុងភាគខាងត្បូងមហាសមុទ្រឥណ្ឌា ចំងាយ២៥០០គីឡូម៉ែត្រ ស្ថិតនៅភាគនិរតីក្រុង Perth អូស្ត្រាលី។ តាមធម្មតា ចិនត្រូវបញ្ជូននាវាយ៉ាងហោច៧គ្រឿង ទៅជួយរុករកទៀត។ ឧបនាយករដ្ឋមន្ត្រីអូស្ត្រាលី ប្រាប់ថា វត្តុអណ្តែតលើទឹកអាចជាបំណែកយន្តហោះ ដែលគេកំពុងរុករកនៅពេលនេះ ហើយដែលត្រូវបានផ្កាយរណបចាប់រូបភាពបានកាលពីថ្ងៃអាទិត្យនោះ ប្រហែលអាចនឹងលិចចូលក្នុងទឹកសមុទ្របាត់ទៅហើយ។ គេនៅមិនទាន់រកឃើញវត្ថុទាំងនេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
នៅថ្ងៃសុក្រនេះ នៅខាងត្បូងមហាសមុទ្រឥណ្ឌា យន្តហោះ៥គ្រឿងបានបន្តប្រតិបត្តិការស្វែងរកយន្តហោះប៊ូអ៊ីង៧៧៧ របស់ក្រុមហ៊ុនម៉ាឡេស៊ី អ៊ែរឡាញ ស្វែងរកវត្ថុអណ្តែតលើទឹកជាច្រើនបំណែក ដែលផ្កាយរណបចាប់រូបភាពបានកាលពីថ្ងៃ១៦មីនា កន្លងទៅ។ វត្ថុអណ្តែតលើទឹកទាំងនេះ អាចជាបំណែករបស់យន្តហោះដែលបាត់ខ្លួន ជាង១៣ថ្ងៃមកហើយនោះ។ ទីកន្លែងរុករកនៅមហាសមុទ្រឥណ្ឌា ចំងាយ២៥០០គីឡូម៉ែត្រ ភាគនិរតី ក្រុង Perth អូស្ត្រាលី ហួសឆ្ងាយខ្លាំងពីគន្លងដើមរបស់យន្តហោះ។
ប្រតិបត្តិការរុករកនៅថ្ងៃសុក្រនេះ មានការលំបាក ព្រោះតំបន់នេះមិនសូវជាមាននាវាចរាចរណ៍នោះទេ ជាតំបន់មានខ្យល់បោកបក់ខ្លាំង។ យោងតាមលោក Warren Tuss ជាឧបនាយករដ្ឋមន្ត្រីអូស្ត្រាលី វត្ថុអណ្តែតលើទឹក ដែលផ្កាយរណបចាប់រូបភាពបាន មិនប្រាកដថា នៅតែបន្តអណ្តែតលើផ្ទៃទឹកសមុទ្រទៀតទេ ពិសេសនៅសមុទ្រដែលសំបូររលកធំៗ មានចរន្តទឹកហូរខ្លាំង និងសំបូរដោយខ្យល់បោកបក់ផងនោះ។ ដូច្នេះ វត្ថុទាំងនោះអាចនឹងលិចចូលក្នុងទឹកបាត់ហើយ នៅពេលនេះ។ គួរបញ្ជាក់ថា កាលពីថ្ងៃ១៦មីនា ផ្កាយរណបចាប់បានរូបភាពវត្ថុអណ្តែតលើទឹកចំនួន២ វត្ថុមួយប្រវែង២៤ម៉ែត្រ និងមួយទៀតប្រវែង៥ម៉ែត្រ។ អ្នកស៊ើបអង្កេតនានាចាត់ទុកថា វត្ថុទាំង២នេះ មានលក្ខណៈច្បាស់លាស់ គួរអោយជឿជាក់បាន ដើម្បីជួយអោយពួកគេអាចរកឃើញយន្តហោះប៊ូអ៊ីង៧៧៧ ដែលបាត់ស្រមោលសូន្យឈឹងនោះ។
ដោយឡែក ប្រតិបត្តិការរុករកយន្តហោះប៊ូអ៊ីងនេះ ក៏ធ្វើនៅតំបន់ផ្សេងទៀតដែរ ក្នុងនោះមាននៅកន្លែងដែលនាំដំណើរទៅភាគខាងជើងប្រទេសឡាវ បន្តរហូតទៅដល់ប្រទេសកាហ្សាក់ស្ថាន។ អាជ្ញាធរម៉ាឡេស៊ីបានសុំអោយអាមេរិកធ្វើការវិភាគលើទិន្នន័យអេឡិចត្រូនិកដែលត្រូវគេលុបចោលពីម៉ាស៊ីនហោះហើរគំរូ កាលពីខែមុន។ ម៉ាស៊ីនហោះហើរគំរូនេះ ត្រូវអាជ្ញាធររឹបអូសពីផ្ទះរបស់អ្នកបើកបរយន្តហោះប៊ូអ៊ីងនោះ។
នាយករដ្ឋមន្ត្រីអូស្ត្រាលីថូនី អាបត បានប្រាប់អោយដឹងថា ក្នុងពេលទូរសព្ទជាមួយប្រធានាធិបតីចិនស៊ី ជីនពីង លោកស៊ី ជីនពីងមានការព្រួយបារម្ភខ្លាំងចំពោះការបាត់ខ្លួនដ៏អាថ៌កំបាំងរបស់យន្តហោះប៊ូអ៊ីងនេះ ព្រោះថាអ្នកដំណើរជនជាតិចិនមានចំនួនច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ