ប្រទេសអូស្រា្តលីប្រហែលជាបានរកឃើញបំណែកយន្តហោះប៊ូអ៊ីង ៧៧៧ របស់ Malaysia Airlines
នៅថ្ងៃព្រហស្បតិ៍ ទី២០ មីនានេះ ប្រទេសអូស្រា្តលីបានបញ្ជូនយន្តហោះជាច្រើនគ្រឿងរបស់ខ្លួនទៅកាន់ប៉ែកខាងត្បូងមហាសមុទ្រឥណ្ឌាដើម្បីស្វែងរកវត្ថុកំពុងអណ្តែតលើផ្ទៃទឹកសមុទ្រដែលផ្កាយរណបបានរកឃើញ។ តើវត្ថុដែលកំពុងអណ្តែតលើផ្ទៃទឹកសមុទ្រនោះ ពិតជាបំណែកយន្តហោះប៊ូអ៊ីង ៧៧៧ របស់ក្រុមហ៊ុន Malaysia Airlines ដែលបានបាត់ខ្លួនតំាងពីជាង ១០ថ្ងៃនោះ ឬយ៉ាងណា?។ រហូតមកដល់ពេលនេះ នៅមិនទាន់មានការបញ្ជាក់ជាផ្លូវការណាមួយនៅឡើយទេ។ ដើម្បីអាចបញ្ជាក់បាន រដ្ឋអំណាចអូស្រ្តាលីបានបញ្ជូនយន្តហោះទៅកាន់តំបន់ដែលកំពុងមានវត្ថុអណ្តែតលើទឹកក្នុងមហាសមុទ្រឥណ្ឌាប៉ែកខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
សម្រាប់រដ្ឋអំណាចប្រទេសអូស្រ្តាលី រូបភាពមួយចំនួនដែលផ្តល់ដោយផ្កាយរណបបានបង្ហាញយ៉ាងឲ្យឃើញនូវវត្ថុធំៗជាច្រើនបំណែកដែលកំពុងអណ្តែតលើផ្ទៃទឹកសមុទ្រក្នុងមហាសមុទ្រឥណ្ឌាប៉ែកខាងត្បូងដែលមានចម្ងាយជាង ២ ៥០០គីឡូម៉ែត្រស្ថិតប៉ែកនីរតីនៃរដ្ឋអូស្រ្តាលីខាងលិច។ គឺតាមរយៈរូបភាពដ៏គួរឲ្យកត់សម្គាល់នេះហើយបានជាអូស្រា្តលីបានសម្រេចបញ្ជូនយន្តហោះចំនួន ៤គ្រឿងទៅកាន់ទីនោះដើម្បីពិនិត្យមើលឲ្យច្បាស់ថា តើវាជាវត្ថុអ្វីទៅ?។ យន្តហោះមួយគ្រឿងកំពុងស្ថិតនៅម្តុំតំបន់នោះរួចជាស្រេច និងបានប្រាប់ឲ្យដឹងពីការមើលមិនសូវច្បាស់លើវត្ថុទំាងនោះ។ តែយ៉ាងណាក៏ដោយ យន្តហោះចំនួន ៣គ្រឿងទៀតកំពុងធ្វើដំណើរទៅកាន់ទីនោះដោយត្រូវចំណាយពេលហោះហើរចំនួន ៤ម៉ោង។ មន្រ្តីសន្តិសុខផ្លូវសមុទ្រអូស្រា្តលីម្នាក់បានប្រាប់ឲ្យដឹងថា មានវត្ថុកំពុងអណ្តែតលើផ្ទៃទឹកសមុទ្រចំនួនពីរដែលផ្កាយរណបបានរកឃើញក្នុងនោះ វត្ថុទី១ មានប្រវែងយ៉ាងតិច ២៤ម៉ែត្រ និងវត្ថុទី២ មានប្រវែងខ្លីជាង។
ដោយឡែក ក្នុងពេលដែលគ្រប់គ្នាកំពុងរង់ចំាការបញ្ជាក់ថា តើវត្ថុទំាងនោះ ពិតជាបំណែករបស់យន្តហោះប៊ូអ៊ីង ៧៧៧ របស់ Malaysia Airlines មែន ឬមិនមែន រដ្ឋអំណាចអូស្រ្តាលីក៏បានបញ្ជូននាវាសង្រ្គោះមួយគ្រឿងទៅកាន់តំបន់នោះក្នុងគោលដៅស្រង់យកវត្ថុដែលកំពុងអណ្តែតលើផ្ទៃទឹកសមុទ្រទំាងនោះ។ ក្រៅពីយន្តហោះអូស្រ្តាលី ក៏មានយន្តហោះអាមេរិកំាងមួយគ្រឿង និងនូវែលសេឡង់មួយគ្រឿង។ ចុងក្រោយ នាវាពាណិជ្ជកម្មមួយគ្រឿងដែលកំពុងស្ថិតក្បែរតំបន់នោះក៏ត្រូវបានគេបង្វែរទិសដៅឲ្យទៅចូលរួមស្វែងរកវត្ថុដែលកំពុងអណ្តែតលើផ្ទៃទឹកសមុទ្រ។
យ៉ាងណាក៏ដោយ រដ្ឋអំណាចអូស្រ្តាលីបានសម្តែងការប្រយ័ត្នប្រយែងជាទីបំផុតចំពោះដំណឹងថ្មីចុងក្រោយនេះ ព្រោះថា នៅមិនទាន់មានភស្តុតាងណាមួយដែលអាចបញ្ជាក់ថា វត្ថុទំាងនោះ ជាបំណែករបស់យន្តហោះប៊ូអ៊ីង ៧៧៧ របស់ Malaysia Airlines នៅឡើយទេ។ លោកនាយករដ្ឋមន្រ្តីអូស្រ្តាលីតូនី អាបូតដែលជាអ្នកប្រកាសដំណឹងថ្មីនេះបានអះអាងថា គេមិនគួរប្រញិបប្រញាប់ទាញសេចក្តីសន្និដ្ឋានចុងក្រោយណាមួយទេ។
គួររម្លឹកជូនថា ក្នុងរយៈពេលជាង ១០ថ្ងៃនៃការស្វែងរកយន្តហោះ និងអ្នកដំណើរទំាង ២៣៩នាក់នោះ ក្តីសង្ឃឹមលាយឡំនឹងក្តីអស់សង្ឃឹមបានធ្លាក់មកជាបន្តបន្ទាប់រាប់មិនអស់។ មាន ២៥ប្រទេសបានចូលរួមស្វែងរកយន្តហោះនោះនៅសឹងតែពេញផ្ទៃទឹកសមុទ្រក្នុងលោកទៅហើយ។ តែមកទល់ពេលនេះ វាប្រៀបបានដូចជាការរាវរកម្ជុលនៅបាតសមុទ្រអ៊ីចឹង។ រីឯក្រុមគ្រួសារអ្នកដំណើរវិញ មានតែការរង់ចំាជាមួយនឹងក្តីសង្ឃឹម រួមផ្សំនឹងភាពក្តៅក្រហាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ