រុស្ស៊ីសំណូមពរឲ្យបញ្ចូលក្រុមគួដ ទៅក្នុងតុចរចាសន្តិភាពនៅស៊ីរី
ការចរចាសន្តិភាពនៅស៊ីរី ក្រោមការផ្តួចផ្តើមរបស់អង្គការសហប្រជាជាតិ នឹងត្រូវចាប់ផ្តើមជាថ្មីនៅដើមសប្តាហ៍ក្រោយនេះហើយ។ នៅថ្ងៃនេះផងដែរ លោករដ្ឋមន្រ្តីការបរទេសរុស្ស៊ី បានធ្វើការស្នើសុំថា គេត្រូវអញ្ជើញតំណាងក្រុមជនជាតិកួដស៊ីរីឲ្យមកចូលរួមក្នុងតុចរចានេះដែរ។ ជនជាតិកួដ ដែលជាសម្ព័ន្ធមិត្តរបស់រុស្ស៊ីផង និង របស់អាមេរិកផងនោះ មានតួនាទីសំខាន់មួយដែរ ក្នុងការប្រយុទ្ធនឹងក្រុមជីហាដអង្គការរដ្ឋអ៊ីស្លាមនៅស៊ីរី។ ប៉ុន្តែតួកគី តែងតែបដិសេធដាច់អហង្ការ ព្រោះមិនចង់ឃើញជនជាតិកួដនៅស៊ីរី មានឱកាសបានឯករាជ្យផ្តាច់ខ្លួនចេញពីស៊ីរី។
ចុះផ្សាយនៅថ្ងៃ៖
ស្តាប់ - ០២:០៧
លោក ស៊ែកហ្គៃ ឡារ៉ូវ រដ្ឋមន្ត្រីការបរទេសរុស្ស៊ីបានថ្លែងប្រាប់ឲ្យដឹងនៅថ្ងៃនេះថា លោកបានសំណូមពរ ទៅកាន់លោក ស្តេហ្វិន ដឺមីស្ទូរ៉ា ប្រេសិទពិសេសអង្គការសហប្រជាជាតិទទួលបន្ទុកកិច្ចការស៊ីរី ដោយសុំឲ្យចាត់បញ្ចូលក្រុមជនជាតិកួដ នៅក្នុងការចរចាសន្តិភាពនៅស៊ីរី។ ថ្លែងនៅក្នុងសន្និសីទកាសែត នៅក្បែរលោករដ្ឋមន្ត្រីចិន លោករដ្ឋមន្ត្រីរុស្ស៊ីបញ្ជាក់ថា បើគេមិនរាប់បញ្ចូលក្រុមជនជាតិកួដ ទៅក្នុងតុចរចាទេ មានន័យថាសហគមន៍អន្តរជាតិ គ្មានសេចក្តីក្លាហានគ្រប់គ្រាន់ទេ។ មិនរាប់ជនជាតិកួដស៊ីរី គឺស្មើនឹងមិនផ្តល់សិទ្ធិឲ្យប្រជាជនកួដរាប់លាននាក់ នៅស៊ីរី។
កាលពីថ្ងៃព្រហស្បតិ៍ ទី ១០ មីនា មុននឹងលោកស៊ែកហ្គៃ ឡារ៉ូវបានមានប្រសាសន៍ពីបញ្ហានេះ លោក ស្តេហ្វាន ដឺមីស្ទូរ៉ា បានឆ្លើយទៅកាន់អ្នកកាសែតថា លោកគ្មានគំរោងផ្ញើរលិខិតអញ្ជើញទៅកាន់ភាគីណាថ្មីទៀតទេ ក្រៅពីភាគីដែលធ្លាប់មកចូលប្រជុំកាលពីលើកមុន។ ហើយបន្ថែមពីនេះ ការចរចាសន្តិភាព នឹងមិនត្រូវអូសបន្លាយឲ្យហួសពីថ្ងៃទី ២៤ មីនាដែរ។
សូមបញ្ជាក់ថា បច្ចុប្បន្ននេះក្រុមជនជាតិកួដ បានដណ្តើមបានដែនដីកាន់កាប់ចំនួន១០% នៃផ្ទៃដីស៊ីរី។ ប្រជាជនកួដប្រមាណជាជាង៤០លាននាក់ មាននៅរាយប៉ាយ នៅស៊ីរីផង អ៊ីរ៉ាក់ផង និងជាពិសេសនៅតួកគីផងដែរ។ ជនជាតិកួដគឺជាជនភាគតិច ដែលមានចំនួនច្រើនបំផុតលើលោក តែគ្មានប្រទេសអធិបតេយ្យខ្លួនឯងទេ។ សង្រ្គាម នៅស៊ីរី គឺជាឱកាសឲ្យចលនាតស៊ូកួដ បានបញ្ចេញកំលាំងនៅលើសមរភូមិព្រមទាំងលើឆាកអន្តរជាតិ ដើម្បីទាមទារធ្វើការបំបែកខ្លួន ជាប្រទេសមួយមានឯករាជ្យពេញលេញ។
តែយ៉ាងណាក៏ដោយ អ្នកវិភាគមួយចំនួនយល់ថា នេះគ្រាន់តែជាការសុបិន្ត តែការពិតគឺមិនអាចធ្វើទៅបានដោយងាយៗទេ។ ការទទួលស្គាល់បង្កើតរដ្ឋកួដ នៅរវាងស៊ីរី និងអ៊ីរ៉ាក់ មានឧបសគ្គច្រើនណាស់។ ឧបសគ្គចំបងគឺតួកកី។ រដ្ឋាភិបាលតួកគី របស់លោកអ៊ែកដូហ្កាន់ បដិសេធដាច់អហង្ការ ក្នុងការទទួលស្គាល់ជនជាតិកួដ។ តួកគីចាត់ទុកក្រុមចលនាតស៊ូកួដ ជាក្រុមភេរវកម្ម ហើយបានធ្វើការទំលាក់គ្រាប់បែកនៅតាមមូលដ្ឋានជនជាតិកួដជារឿយៗ។ ក្រុម PKK កួដ គឺត្រូវបានតួកគីចាត់ទុកជាសត្រូវ ក៏ព្រោះតែតួកគីខ្លាចទឹកដីភាគខាងកើតរបស់ខ្លួន ដែលសំបូរទៅដោយជនជាតិកួដ រស់នៅប្រមាណជា១៥លាននាក់នោះ បំបែកខ្លួនទៅចូលជាមួយដែនដីកួដស៊ីរី និងអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ