បញ្ហាបាតុកម្ម៖ ចិនប្រាប់ឲ្យរដ្ឋអំណាចហុងកុងដាក់ទោសទណ្ឌលើអ្នកប្រើប្រាស់ហិង្សា
ការិយាល័យទទួលបន្ទុកកិច្ចការហុងកុង នៃរដ្ឋាភិបាលចិន នៅថ្ងៃចន្ទ ទី២៩កក្កដានេះ បានបើកធ្វើសន្និសីទកាសែតដ៏កម្រមួយ ដើម្បីបញ្ជាក់ជំហររបស់ទីក្រុងប៉េកាំង ចំពោះបាតុកម្មនិងអំពើហិង្សាដែលកើតឡើងជាបន្តបន្ទាប់នៅហុងកុង។ តាមរយៈសន្និសីទកាសែតនេះ ចិន បានទាមទារឲ្យរដ្ឋអាជ្ញាហុងកុង ដាក់ទោសទណ្ឌចំពោះអ្នកទាំងឡាយណា ដែលប្រើប្រាស់អំពើហិង្សានិងប្រព្រឹត្តខុសច្បាប់។
ចុះផ្សាយនៅថ្ងៃ៖ កែប្រែថ្ងៃទី៖
បាតុកម្មនៅហុងកុង ដែលរៀបចំធ្វើជារៀងរាល់សប្ដាហ៍នោះ បានធ្វើឲ្យរដ្ឋាភិបាលចិនមិនសប្បាយចិត្តយ៉ាងខ្លាំង។ នៅថ្ងៃចន្ទ ទី២៩កក្កដានេះ រដ្ឋាភិបាលចិន តាមរយៈការិយាល័យទទួលបន្ទុកកិច្ចការហុងកុងនិងតៃវ៉ាន់ បានចេញមកទាមទារឲ្យរដ្ឋអំណាចហុងកុង ពង្រឹងការអនុវត្តច្បាប់។ ពង្រឹងការអនុវត្តច្បាប់ តាមរយៈការដាក់ទោសទណ្ឌទៅលើអ្នកទាំងឡាយណា ដែលប្រព្រឹត្តខុសច្បាប់ និងប្រើប្រាស់អំពើហិង្សា នៅក្នុងពេលបាតុកម្ម។
គួរជ្រាបថា ប្រជាជនហុងកុង អ្នកស្នេហាប្រជាធិបតេយ្យ បាននាំគ្នាចុះផ្លូវធ្វើបាតុកម្មជារៀងរាល់ចុងសប្ដាហ៍ អស់រយៈពេលជិត២ខែរួចមកហើយ។ បាតុកម្មនេះ ពីដំបូងឡើយ ធ្វើឡើងក្នុងទម្រង់អហិង្សា ដោយមានត្រឹមតែការជួបប្រជុំគ្នាលើកបដា និងសម្ដែងមតិប៉ុណ្ណោះ។ ប៉ុន្តែពីរសប្ដាហ៍ចុងក្រោយនេះ រដ្ឋអំណាចហុងកុង បានដាក់ពង្រាយកម្លាំងចុះបង្ក្រាបក្រុមបាតុករ ដោយប្រើប្រាស់គ្រាប់កាំភ្លើងកៅស៊ូ និងឧស្ម័នបង្ហូរទឹកភ្នែក។ សម្រាប់រដ្ឋអំណាចហុងកុងដែលស្និទ្ធនឹងទីក្រុងប៉េកាំង ការចុះផ្លូវធ្វើបាតុកម្មរបស់ក្រុមបាតុករទាំងនេះ គឺជាទង្វើខុសច្បាប់។
ប្រទេសចិនឯណោះវិញ បានចាត់ទុកការធ្វើបាតុកម្មលាយឡំនឹងអំពើហិង្សានៅហុងកុងថា ជាការគំរាមកំហែងដល់ស្ថិរភាពនិងវិបុលភាពរបស់ហុងកុង។ និងថា គ្មានប្រជាជាតិស៊ីវិល័យឯណា ដែលសុខចិត្តសំងំស្ងៀម ទ្រាំខាំមាត់សង្កត់ចិត្ត នៅចំពោះមុខអំពើហិង្សានេះឡើយ។ ចិនបានសង្កត់ធ្ងន់ទៀតថា បញ្ហាអាទិភាពសម្រាប់រដ្ឋអំណាចហុងកុងនាពេលនេះ គឺដាក់ទោសទណ្ឌចំពោះអ្នកដែលប្រើប្រាស់អំពើហិង្សានិងប្រព្រឹត្តខុសច្បាប់ ដើម្បីស្ដារឡើងវិញនូវរបៀបរៀបរយសង្គម និងរក្សាឲ្យបាន បរិយាកាសធុរកិច្ចនៅហុងកុង។ ចិនក៏សង្ឃឹមដែរថា ប្រជាជនហុងកុងនឹងយល់ពីបញ្ហានេះ ហើយរួមគ្នាប្រឆាំងព្រមទាំងទប់ទល់នឹងការប្រើប្រាស់អំពើហិង្សាគ្រប់ទម្រង់។
មែនទែនទៅ ក្នុងសំណុំរឿងបាតុកម្មនៅហុងកុងនេះ ការប្រើប្រាស់អំពើហិង្សា មានទាំងសងខាង ទាំងខាងបាតុករ និងខាងរដ្ឋអំណាចហុងកុង។ ប៉ុន្តែតំណាងរាស្ត្រហុងកុងម្នាក់យល់ឃើញថា រដ្ឋអំណាចហុងកុងប្រើប្រាស់កម្លាំងជ្រុលហួស ដោយបានបញ្ចេញកម្លាំងប្រដាប់អាវុធ បាញ់គ្រាប់កាំភ្លើងជ័រ និងប្រើប្រាស់គ្រាប់បែកផ្សែងទៅលើហ្វូងបាតុករ ដែលមានតែដុំថ្ម និងដំបងប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ