អ.ស.ប.៖ដំណើរទស្សនកិច្ចមួយជុំតំបន់មជ្ឈិមបូព៌ារបស់លោកបាន គីមូន
លោកអគ្គលេខាធិការអង្គការសហប្រជាជាតិបាន គីមូនផ្តើមទស្សនកិច្ចមួយជុំតំបន់មជ្ឈិមបូព៌ា។ បន្ទាប់ពីបានបំពេញទស្សនកិច្ចក្នុងប្រទេសកូវ៉ែតនាថ្ងៃអាទិត្យ ទី២៦ មិថុនា លោកបាន គីមូនបន្តដំណើរទៅកាន់ប្រទេសអ៊ីស្រាអែល និងដែនដីប៉ាឡេស្ទីនក្នុងថ្ងៃចន្ទ ទី២៧ មិថុនានេះ។ នៅក្នុងប្រទេសកូវ៉ែត លោកអគ្គលេខាធិការអង្គការសហប្រជាជាតិបានជំរុញដល់គ្រប់ភាគីជម្លោះក្នុងប្រទេសយេម៉ែនឲ្យទទួលយកផែនការសន្តិភាពដែលស្នើឡើងដោយសហគមន៍អន្តរជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ដំណើរទៅកាន់ប្រទេសកូវ៉ែតមុនគេរបស់លោកអគ្គលេខាធិការអង្គការសហប្រជាជាតិបាន គីមូនក៏ដោយសារថា កូវ៉ែតបានធ្វើជាម្ចាស់ផ្ទះរៀបចំកិច្ចចរចាស្វែងរកសន្តិភាពឲ្យប្រទេសយេម៉ែនតាំងពី ២ខែមកហើយ។ គឺជាកិច្ចចរចាដែលបានផ្តួចផ្តើម និងដឹកនាំដោយលោកអ៊ូល ឆេកអាម៉េដ ប្រេសិតពិសេសរបស់លោកបាន គីមូន។ សូមជម្រាបជូនថា តាំងពីជាង ១ឆ្នាំកន្លងមកដែលប្រទេសយេម៉ែនបានធ្លាក់ក្នុងវិបត្តិហែកហួរគ្នារវាងក្រុមអ្នកគំាទ្រលោកប្រធានាធិបតីនិរទេសខ្លួនហាឌី និងក្រុមឧទ្ទាមឈីអ៊ីតដែលគាំទ្រលោកអតីតប្រធានាធិបតីសាឡេ។ អ្វីជាការកត់សម្គាល់ លោកប្រធានាធិបតីនិរទេសខ្លួនហាឌីទទួលបានការគំាទ្រពីសហគមន៍អន្តរជាតិ ពិសេសពីកម្លាំងសម្ព័ន្ធអារ៉ាប់ដឹកនាំដោយប្រទេសអារ៉ាប៊ីសាអូឌីត។
នៅក្នុងកិច្ចចរចារវាងភាគីជម្លោះផ្ទៃក្នុងទាំងពីរដែលរៀបចំដោយប្រទេសកូវ៉ែតតាំងពីថ្ងៃទី២១ មេសា អង្គការសហប្រជាជាតិ តាមរយៈលោកប្រេសិតពិសេសអ៊ូល ឆេកអាម៉េដបានដាក់ចេញនូវផែនការសន្តិភាពដោយតម្រូវឲ្យបង្កើតរដ្ឋាភិបាលឯកភាពជាតិមួយ និងការរំសាយអាវុធរបស់ក្រុមឧទ្ទាមឈីអ៊ីត។ តែរហូតមកដល់ពេលនេះ ភាគីជម្លោះនីមួយៗនៅបន្តប្រកាន់ជំហររៀងៗខ្លួន។ នៅម្ខាង រដ្ឋាភិបាលរបស់លោកប្រធានាធិបតីហាឌីបន្តទាមទារឲ្យក្រុមឧទ្ទាមប្រគល់តំបន់ដែលពួកគេបានកាន់កាប់តាំងពីឆ្នាំ ២០១៤ ឲ្យរដ្ឋាភិបាល ចំណែកក្រុមឧទ្ទាមនៅបន្តទាមទារឲ្យជ្រើសរើសរូបប្រធានាធិបតីថ្មី និងបង្កើតរដ្ឋាភិបាលឯកភាពជាតិជាមុន មុននឹងចរចារឿងផ្សេង។
នៅក្នុងន័យនេះ លោកអគ្គលេខាធិការអង្គការសហប្រជាជាតិបាន គីមូនបានអំពាវនាវដល់ភាគីជម្លោះផ្ទៃក្នុងទាំងពីរបិទបញ្ចប់ភាពប្រទាញប្រទង់គ្នា និងផ្តើមទទួលយកផែនការសន្តិភាពដែលស្នើឡើងដោយលោកប្រេសិតពិសេសអ៊ូល ឆេកអាម៉េដ។ លោកបាន គីមូនបានព្រមានទុកជាមុនថា វិបត្តិនឹងកាន់តែធ្លាក់ដុបដាបខ្លាំង ប្រសិនបើភាគីជម្លោះមិនយល់ព្រមធ្វើសម្បទានឲ្យគ្នាទៅវិញ ទៅមកទេ។ គួររម្លឹកជូនថា សង្រ្គាមស៊ីវិលដែលបានផ្ទុះតាំងពីខែមីនា ឆ្នាំ ២០១៥ បានបណ្តាលឲ្យមានមនុស្សស្លាប់ជាង ៦ ៤០០នាក់ និងអ្នករត់ចោលផ្ទះសម្បែងប្រមាណជា ២លាន ៨សែននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ