អាកាសធាតុ ៖ មូលនិធិបៃតងរបស់អ.ស.ប.ចែកចាយជំនួយដល់ប្រទេសក្រីក្រជាលើកដំបូង
បីសប្តាហ៍មុនការបើកសន្និសីទអន្តរជាតិ ក្រុងប៉ារីស ស្តីអំពីអាកាសធាតុ មូលនិធិបៃតងរបស់អង្គការសហប្រជាជាតិ បានប្រកាសនៅថ្ងៃសុក្រនេះ ផ្តល់ហិរញ្ញវត្ថុដល់គម្រោងចំនួន៨ សម្រាប់ជួយប្រទេសក្រីក្រកំពុងអភិវឌ្ឍន៍ ក្នុងការប្រយុទ្ធប្រឆាំងនឹងការប្រែប្រួលអាកាសធាតុ។ ពាក្យសន្យារបស់ក្រុមប្រទេសអ្នកមានផ្តល់ថវិកាជួយប្រទេសអ្នកក្រ ជាផ្នែកមួយដ៏សំខាន់នៃកិច្ចព្រមព្រៀងដែលសន្និសីទក្រុងប៉ារីស ចង់សម្រេចឱ្យបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
នេះជាលើកទីមួយ ដែលក្រុមប្រទេសអភិវឌ្ឍន៍ (អ្នកមានឬក្រុមប្រទេសខាងជើង) បានព្រមព្រៀង បើកហិបផ្តល់ជំនួយហិរញ្ញវត្ថុដល់បណ្តាប្រទេសក្រីក្រ (ប្រទេសខាងត្បូង) ដើម្បីមានលទ្ធភាពប្រយុទ្ធប្រឆាំងនឹងការឡើងកំដៅនៃភពផែនដីផង និងដើម្បីប្រឈមមុខនឹងផលវិបាកបង្កឡើងដោយអាកាសធាតុ (បាក់ច្រាំងបាត់ដី ភាពរាំងស្ងួត ទឹកកករលាយ ...)ផង។
បង្កើតឡើងដោយអង្គការសហប្រជាជាតិ កាលពីពីរឆ្នាំមុន មូលនិធិបៃតង បានអនុម័តកញ្ចប់ថវិកា១៦៨លានដុល្លារ សម្រាប់គម្រោង៨ មានជាអាទិ៍ការដាក់ដោយដំណើរការប្រព័ន្ធតាមដាននិងប្រកាសអាសន្នអាកាសធាតុនៅម៉ាឡាវី អភិវឌ្ឍន៍ហេដ្ឋារចនាសម្ព័ន្ធធន់ខ្លាំងនឹងអាកាសធាតុនៅបង់ក្លាដែល គម្រោងរក្សាធនធានទឹកនៅម៉ាល់ឌីវ និងហ្វ៊ីជី និងការបង្កើតទុនសម្រាប់អភិវឌ្ឍន៍ថាមពលមិនចេះរីងស្ងួតនៅអាមេរិកឡាទីន។ ប្រទេសដែលបានទទួលជំនួយដំបូងគេបង្អស់ពីគម្រោងនេះ មានបីជាកម្មវិធីនៅទ្វីបអាហ្វ្រិក (ម៉ាឡាវី សេណេហ្កាល់ អាហ្វ្រិកខាងលិច) បីនៅអាស៊ី និងប៉ាស៊ីហ្វិក (បង់ក្លាដែស ម៉ាល់ឌីវ ហ្វ៊ីជី) និងពីរទៀត នៅអាមេរិកឡាទីន (ប៉េរ៉ូ និងទ្វីបអាមេឡាទីន)។
នាឱកាសសន្និសីទអន្តរជាតិស្តីអំពីអាកាសធាតុ ឆ្នាំ២០០៩ នៅទីក្រុងកូផែនហាកប្រទេសដាណឺម៉ាក ក្រុមប្រទេសអភិវឌ្ឍន៍ បានសន្យាចាក់បញ្ចូលជារៀងរាល់ឆ្នាំ ទឹកប្រាក់ចំនួន ១០០ពាន់លានដុល្លារ ទៅក្នុងមូលនិធិ ដើម្បីជួយប្រទេសក្រីក្រកំពុងអភិវឌ្ឍន៍ ឱ្យពង្រឹងនយោបាយអាកាសធាតុ រហូតដល់ឆ្នាំ២០២០ ឆ្នាំដែលកិច្ចព្រមព្រៀងប៉ារីស(ឆ្នាំ២០១៥នេះ)ត្រូវចាប់មានសុពលភាព។
កាតព្វកិច្ចអ្នកមានត្រូវជួយអ្នកក្រ មានចែងក្នុងសន្ធិសញ្ញាអង្កការសហប្រជាជាតិ តាំងពីឆ្នាំ១៩៩២មកម្ល៉េះ ដោយប្រទេសចំនួន១៩៥ ប៉ុន្តែស្ថានភាពប្តូរផ្លាស់ បច្ចុប្បនេះក្រុមប្រទេសអ្នកមានយល់ថា ប្រទេសកំពុងអភិវឌ្ឍន៍មានសេដ្ឋកិច្ចលូតលាស់ខ្លាំង ក៏ត្រូវមានចំណែកធ្វើវិភាគទានដែរ ចាប់ពីឆ្នាំ២០២០ទៅ។
ហិរញ្ញវត្ថុអាកាសធាតុ ឬហិរញ្ញវត្ថុបៃតងនេះ គឺចំណុចគន្លឹះមួយនៃការចរចាស្វែងរកកិច្ចព្រមព្រៀងស្តីពីអាកាសធាតុ នៅទីក្រុងប៉ារីស។ ដូច្នេះការបែកចែកគម្រោងហិរញ្ញវត្ថុជាក់ស្តែងថ្ងៃនេះ ជាចំណាត់ការដ៏ប្រពៃមួយសម្រាប់ពង្រឹងទំនុកចិត្តរវាងប្រទេសមាននិងអ្នកក្រកំពុងអភិវឌ្ឍន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ