ចិននៅតែធ្វើគ ថ្លង់ នៅក្នុងជម្លោះ នៅសមុទ្រចិនខាងត្បូង
ទីក្រុងប៉េកាំង តាមរយៈអនុរដ្ឋមន្រ្តីការបរទេស កាលពីថ្ងៃអាទិត្យ ទី ២២ វិច្ចិកា បានបញ្ជាក់ថា ខ្លួននឹងមិនបញ្ឈប់សកម្មភាពសាងសង់សំណង់កោះសិប្បនិម្មិត នៅសមុទ្រចិនខាងត្បូងនោះទេ។ ជាថ្មីម្តងទៀត នៅក្នុងកិច្ចប្រជុំកំពូលអាស៊ានលើកទី ២៧ ដែលកំពុងបើកធ្វើនៅ ប្រទេសម៉ាឡេស៊ី ប្រទេសចិនបានរងការរិះគន់ពីលោកប្រធានាធិបតីអាមេរិក និងថ្នាក់ដឹកនាំរបស់ប្រទេសសមាជិកអាស៊ានដែលកំពុងឈ្លោះ ជាមួយ ចិន ក្នុងជម្លោះដណ្តើមដែនទឹកនៅសមុទ្រចិនខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ប្រទេសចិន មិនបានចាញ់សម្លុត គំរាមពីខាងក្រៅនោះទេ។ នៅក្នុងកិច្ចប្រជុំកំពូលអាស៊ាន នៅទីក្រុងគូឡាឡាំពួរ ជាទីដែលចិន ត្រូវរងការរិះគន់ និងការដាក់សម្ពាធ ដោយសារតែជម្លោះដែនទឹកនៅសមុទ្រចិនខាងត្បូង ទីក្រុងប៉េកាំងបានចេញមុខបញ្ជាក់ជំហររបស់ខ្លួន សាជាថ្មី នៅក្នុងសន្និសីទកាសែតមួយ ដឹកនាំដោយអនុរដ្ឋមន្រ្តីការបរទេសចិន លោកលីវ ហ្សេនមីន។
តាមប្រសាសន៍របស់លោកលីវ ហ្សេនមីន ដែលដកស្រង់ដោយទីភ្នាក់ងារព័ត៌មានអង់គ្លេស Reuters ប្រទេសចិន នឹងបន្តសាងសង់សំណង់យោធា និងស៊ីវិល នៅលើប្រជុំកោះសិប្បនិម្មិតតទៅទៀត។ សម្រាប់លោកអនុរដ្ឋមន្រ្តីការបរទេសចិន ការសាងសង់ និងរក្សាទីតាំងយោធាចិន គឺជាអ្វីដែលទីក្រុងប៉េកាំងត្រូវតែធ្វើជាចាំបាច់ ដើម្បី បុព្វហេតុការពារជាតិ និងការពារកោះ និងប្រជុំថ្មប៉ប្រះទឹករបស់ចិន នៅសមុទ្រចិនខាងត្បូង។
ការសាងសង់ និងពង្រីកកែលម្អកន្លែងរស់នៅលើប្រជុំកោះ ក្នុងសមុទ្រចិនខាងត្បូង ត្រូវបានរដ្ឋាភិបាលចិនបកស្រាយពន្យល់ថា គឺធ្វើឡើង ដើម្បីចូលរួមបម្រើសេវា ដល់កប៉ាល់ពាណិជ្ជកម្ម អ្នកនេសាទ និងប្រជាជនដែលជួបគ្រោះថ្នាក់ នៅក្នុងសមុទ្រ។ លោកលីវ ហ្សេនមីន បានបដិសេធរុញច្រានចោលការចោទប្រកាន់ ដែលថា ចិនមានបំណងបំពាក់កងទ័ពលើប្រជុំកោះ សិប្បនិម្មិត ដែលចិនកំពុងសាងសង់ និងដែលកំពុងរងការរិះគន់ មិនសប្បាយចិត្តពីអាមេរិក និងប្រទេសសមាជិកអាស៊ាន ដូចជាហ្វីលីពីន ម៉ាឡេស៊ី និងវៀតណាមជាដើម។
កាលពីថ្ងៃសៅរ៍ លោកប្រធានាធិបតីអាមេរិកបារ៉ាក់ អូបាម៉ា បានអំពាវនាវឲ្យចិនឈប់ទាមទារ សង់កោះសិប្បនិម្មិត និងបោះទីតាំងយោធានៅក្នុងសមុទ្រចិនខាងត្បូង។ ប្រធានាធិបតីអាមេរិកនៅបានបន្ថែមថា អាមេរិកនឹងនៅតែបន្តបញ្ជូននាវាចម្បាំងរបស់ខ្លួន ទៅសមុទ្រចិនខាងត្បូង ដែលជាផ្នែកមួយនៃសិទ្ធិសេរីភាពនាវាចរណ៍ ហើយនិងស្របច្បាប់អន្តរជាតិ។ នៅក្នុងសន្និសីទកាសែតកាលពីថ្ងៃអាទិត្យ អនុរដ្ឋមន្រ្តីការបរទេសចិន ចាត់ទុកការរំលោភដែនទឹករបស់ចិនពីសំណាក់នាវាចម្បាំងអាមេរិក ថា ជាការញុះញង់ផ្នែកនយោបាយ។ ចំណែកនាយករដ្ឋមន្រ្តីចិន លី ឃឺឈាំងវិញ នៅក្នុងកិច្ចប្រជុំបិទទ្វារ របស់សមាគមអាស៊ាន ដែលមានលោកប្រធានាធិបតីអាមេរិកចូលរួមដែរនោះ បានអំពាវនាវសុំឲ្យប្រទេសនៅក្រៅតំបន់ គួរឈប់ផ្លុះភ្លើង បង្កើនភាពតានតឹង ក្នុងជម្លោះដែនទឹក តទៅទៀត។
អាស៊ាន កាលពីថ្ងៃសៅរ៍បានចេញសេចក្តីថ្លែងការណ៍រួមមួយ ដែលទាមទារឲ្យគេថែរក្សាសេរីភាពធ្វើដំណើរ តាមផ្លូវទឹក និងការហោះហើរនៅលើសមុទ្រចិនខាងត្បូង។ ទីក្រុងវ៉ាស៊ីនតោនធ្លាប់បានបញ្ជាក់ថា នាវាចរណ៍ នៅសមុទ្រចិនខាងត្បូង ដែលជាកន្លែងធ្វើចរាចរណ៍សំខាន់សម្រាប់កប៉ាល់ជំនួញ នឹងអាចគំរាមកំហែង ដោយសារតែសកម្មភាព ដូចជាការសាងសង់កោះសិប្បនិម្មិតរបស់ចិនជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ