អាមេរិកសន្យាផ្តល់លុយទៅឲ្យសម្ព័ន្ធមិត្តអាស៊ី ដែលជាប់ក្នុងជម្លោះសមុទ្រចិនខាងត្បូង
នៅក្នុងដំណើរទស្សនកិច្ច នៅលើនាវាចម្បាំងហ្វីលីពីន ក្នុងក្រុងម៉ានីល កាលពីថ្ងៃអង្គារ លោកប្រធានាធិបតីអាមេរិក បារ៉ាក់ អូបាម៉ា បាប្រកាសសន្យាផ្តល់ទឹកប្រាក់ប្រមាណ ២៥៩លានដុល្លារ សម្រាប់ប្រទេសសម្ព័ន្ធមិត្តអាស៊ី ដែលបច្ចុប្បន្ន ជាភាគីជម្លោះដណ្តើមដែនទឹក ជាមួយចិន នៅសមុទ្រចិនខាងត្បូង។ សម្រាប់លោកប្រធានាធិបតីបារ៉ាក់ អូបាម៉ា ទឹកប្រាក់ជំនួយ របស់អាមេរិក នឹងត្រូវប្រើជាប្រយោជន៍សម្រាប់ពង្រឹងសន្តិសុខរបស់ប្រទេសសម្ព័ន្ធមិត្តរបស់អាមេរិក នៅអាស៊ី។
ចុះផ្សាយនៅថ្ងៃ៖
នៅហ្វីលីពីន ប្រធានាធិបតីអាមេរិក លោកបារ៉ាក់ អូបាម៉ា ត្រូវទៅចូលរួមនៅក្នុងវេទិកានៃសហប្រតិបត្តិការសេដ្ឋកិច្ចសម្រាប់អាស៊ី ប៉ាស៊ីហ្វិក ឬជំនួបកំពូលអាប៉ិច APEC ដែលត្រូវចាប់បើកទ្វារ នៅថ្ងៃពុធទី ១៨វិច្ឆិកា។
ប៉ុន្តែ លោកប្រធានាធិបតីដែលបានទៅដល់ហ្វីលីពីន មួយថ្ងៃមុនជំនួប អាប៉ិចបានឆ្លៀតទៅធ្វើទស្សនកិច្ចនៅលើនាវាចម្បាំងហ្វីលីពីន ដែលនៅទីនោះ លោកប្រកាសផ្តល់ជំនួយ អាមេរិកប្រមាណ ២៥៩លានដុល្លារ សម្រាប់ជួយគាំទ្រ ពង្រឹងផ្នែកសន្តិសុខរបស់ប្រទេសហ្វីលីពីន ឥណ្ឌូណេស៊ី វៀតណាម និងម៉ាឡេស៊ី។ ទឹកប្រាក់ប្រមាណ ១១៩លានដុល្លារ នឹងត្រូវបញ្ជូនទៅឲ្យប្រទេសទាំងនោះ នៅក្នុងឆ្នាំនេះ ចំណែក ១៤០លានដុល្លារ ដែលនៅសល់នឹងត្រូវបញ្ជូនក្នុងរយៈពេល ១២ខែទៅមុខ។ នេះបើតាមសេចក្តីថ្លែងការណ៍របស់សេតវិមាន។
ហ្វីលីពីនដែលជាអតីតប្រទេសស្ថិតនៅក្រោមអាណានិគមរបស់អាមេរិក និងដែលកំពុងប្រឈមមុខខ្លាំងជាងគេជាមួយចិន នឹងទទួលបានជំនួយហិរញ្ញវត្ថុច្រើនជាងគេ។ “អស់រយៈពេល ៧០ឆ្នាំមកហើយ អាមេរិកបានចូលរួមធានារក្សាសន្តិសុខនៅក្នុងតំបន់អាស៊ី។ ទៅតាមសន្ធិសញ្ញា អាមេរិកមានកាតព្វកិច្ចការពារសម្ព័ន្ធមិត្តហ្វីលីពីន ដែលអាចពឹងពាក់អាមេរិកបានគ្រប់ពេលវេលា” នេះជាប្រសាសន៍របស់លោកបារ៉ាក់ អូបាម៉ា។
សហរដ្ឋអាមេរិក និងប្រទេសនៅអាស៊ី ដែលកំពុងជាប់ជម្លោះជាមួយចិន នៅសមុទ្រចិនខាងត្បូង បានរិះគន់ ការងារសាងសង់ កោះសិប្បនិម្មិតរបស់ចិននៅសមុទ្រចិនខាងត្បូង។ សម្រាប់អាមេរិក និងប្រទេសនៅអាស៊ីអាគ្នេយ៍ សកម្មភាពរបស់ចិនកំពុងរំលោភដែនទឹករបស់ប្រទេសជិតខាង និងគំរាមកំហែងដល់សេរីភាពក្នុងការធ្វើចរាចរណ៍ពាណិជ្ជកម្មក្នុងដែនទឹកអន្តរជាតិ។ ទីក្រុងប៉េកាំងវិញបានរុញច្រានចោលការចោទប្រកាន់របស់អាមេរិក និងហ្វីលីពីន និងបានការពារយុទ្ធសាស្រ្តរបស់ខ្លួន ដែលបើតាមចិន គឺនឹងជួយធានារក្សាលំនឹងនយោបាយការបរទេសរបស់ខ្លួន ទៅអាស៊ីប៉ាស៊ីហ្វិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ