តានតឹងជាមួយតួកគី អាល្លឺម៉ង់ចង់ដកយន្តហោះTornados ចេញពីទឹកដីតួកគី
ថ្ងៃព្រហស្បតិ៍នេះ កាសែតឌែរ ស្ពេហ្គែល Der Spiegel អាល្លឺម៉ង់បានចុះផ្សាយថា អាល្លឺម៉ង់កំពុងត្រៀមដកចេញ នូវយន្តហោះចាប់អត្តសញ្ញាណ Tornados ដែលអាល្លឺម៉ង់បានបញ្ជូនទៅជួយបេសកកម្មប្រឆាំងក្រុមជីហាត រដ្ឋអ៊ីស្លាម។ មូលហេតុគឺដោយសារតែទំនាក់ទំនងរវាងអាល្លឺម៉ង់និងតួកគីកាន់តែតានតឹង ខ្លាំង ក្រោយអាល្លឺម៉ង់ទទួលស្គាល់អំពើប្រល័យពូជសាសន៍លើប្រជាជនអាមេនី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៤
យោងតាមកាសែត Der Spiegel កងទ័ពអាល្លឺម៉ង់កំពុងត្រៀមដកយន្តហោះចាប់អត្តសញ្ញាណ Tornados និងយន្តហោះដឹកប្រេងផ្សេងៗ ដែលកំពុងឈរជើងក្នុងទឹកដីតួកគី។ កងទ័ពត្រៀមបញ្ជូនយន្តហោះទាំងនេះទៅChypre រឺក៏ហ្ស៊កដានីវិញ។ ក្រសួងការពារជាតិអាល្លឺម៉ង់មិនបានគូសបញ្ជាក់ពីការត្រៀមទាំងនេះទេ។
គួររំលឹកថា កាលពីខែមករា ដើមឆ្នាំ ក្រុងប៊ែរឡាំងបានបញ្ជូនយន្តហោះចាប់អត្តសញ្ញាណ Tornados១២គ្រឿង អោយប្រតិបត្តិការនៅអ៊ីរ៉ាក់ និងស៊ីរី ក្នុងក្របខណ្ឌនៃការប្រយុទ្ធប្រឆាំងក្រុមរដ្ឋអ៊ីស្លាម។ បេសកកម្មនេះក៏ដើម្បីសំដែងការគាំទ្រដល់ក្រុងប៉ារីស ដែលរងភេរវកម្មធ្ងន់ធ្ងរ កាលពីខែវិច្ឆិកា ឆ្នាំ២០១៥ដែរ។
ទំនាក់ទំនងរវាងអាល្លឺម៉ង់និងតួកគីចាប់ធ្លាក់ដុនដាបខ្លាំង ចាប់ពីខែមិថុនាមក ក្រោយពេលសភាអាល្លឺម៉ង់ បានអនុម័តសេចក្តីសម្រេចមួយ ទទួលស្គាល់អំពើប្រល័យពូជសាសន៍ទៅលើប្រជាជនអាមេនី។ ឆ្នាំ១៩១៥ ប្រជាជនអាមេនីប្រមាណ១លាននាក់កន្លះ បានស្លាប់ ក្នុងសម័យអាណាចក្រអូតូម៉ង់។ តួកគីខឹងអាល្លឺម៉ង់ខ្លាំងណាស់ ព្រោះមិនចង់អោយប្រើពាក្យថា ទង្វើប្រល័យពូជសាសន៍ដូច្នេះទេ។
ក្រៅពីរឿងប្រជាជនអាមេនី តួកគីក៏ខឹងអាល្លឺម៉ង់ដែរ ដោយសារកាលពីខែកក្កដា អាល្លឺម៉់ង់បានហាមប្រាមប្រធានាធិបតីអ៊ែរដូហ្កានមិនអោយថ្លែងសន្ទរកថា ជារូបភាពវីដេអូ ក្នុងពេលមានបាតុកម្មក្រុមគាំទ្រលោកអ៊ែរដូហ្កាន ក្នុងទឹកដីអាល្លឺម៉ង់។ តួកគិនិងអាល្លឺម៉់ងក៏មើលមុខគ្នាមិនចំផងដែរ ដោយសារជម្លោះជុំវិញទិដ្ឋាការធ្វើដំណើររបស់ប្រជាជនតួកគីនៅអឺរ៉ុប រឺក៏កិច្ចព្រមព្រៀងស្តីពីជនភៀសខ្លួន ដែលតួកគីសម្រេចបានកន្លងមក ជាមួយអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ