លោក កឹម សុខា ចេញពីទីស្នាក់ការជាលើកដំបូងដើម្បីចុះឈ្មោះបោះឆ្នោត បន្ទាប់ពីឃុំខ្លួនឯងអស់ជិត៥ខែ!
នៅព្រឹកថ្ងៃពុធនេះ លោក កឹម សុខា បានចេញពីទីស្នាក់ការ ជាលើកដំបូង បន្ទាប់ពីឃុំខ្លួនឯងអស់ជិត៥ខែ ដើម្បីទៅចុះឈ្មោះបោះឆ្នោត។ ក្រោយពីបំពេញលិខិតស្នាមតាមបែបបទរបស់គ.ជ.ប. នៅការិយាល័យមួយក្នុងសង្កាត់ចាក់អង្កែលើរួច លោកប្រធានស្តីទីបក្សសង្គ្រោះជាតិ បានបញ្ជាក់ប្រាប់អ្នកគាំទ្រនៅស្នាក់ការកណ្តាលរបស់ខ្លួនថា លោកបានចុះឈ្មោះក្នុងបញ្ជីបោះឆ្នោត ហើយមានឯកសារត្រឹមត្រូវគ្រប់គ្រាន់ហើយសម្រាប់ការបោះឆ្នោត។ ជាមួយគ្នានេះ លោក កឹម សុខា ប្រាថ្នាចង់ឃើញបរិយាកាសនយោបាយវិលទៅរកប្រក្រតីភាព ទាំងមុននិងក្រោយពេលបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
លោក កឹម សុខា បានចេញទៅចុះឈ្មោះបោះឆ្នោត នៅសង្កាត់ចាក់អង្រែលើ ក្នុងការិយាល័យចុះឈ្មោះបោះឆ្នោតមួយ ដែលនៅមិនឆ្ងាយប៉ុន្មានពីទីស្នាក់ការកណ្តាលរបស់បក្ស និងនៅម្តុំផ្សារប៉េសេ។ ការិយាល័យមួយនោះ គឺជាសាលាបង្រៀនតូចមួយ។ បរិវេណខាងក្រោម គឺក្រាលដោយទឹកលូស្អុយនិងទឹកភ្លៀង ដែលគេបានដាក់បន្ទះក្តារតូចៗជាជួរៗ សម្រាប់ដើរឆ្លងចូលទៅខាងក្នុងការិយាល័យចុះឈ្មោះបោះឆ្នោត។
បន្ទាប់ពីចុះពីឡានទំនើប លោក កឹម សុខា ស្ថិតក្នុងសម្លៀបំពាក់ តឺនុយ អាវធំ និងស្បែកជើងប៊ូ បានដើរមួយៗដោយមានអង្គរក្សទប់យ៉ាងប្រុងប្រយ័ត្ន ចូលទៅចុះឈ្មោះក្នុងបញ្ចីបោះឆ្នោត បានសម្រេច និងបានត្រឡប់ចូលទីស្នាក់បក្សវិញ ដោយសុវត្ថិភាព។
ថ្លែងសន្ទរកថាខ្លី មិនដល់៥នាទីស្រួលបួលផង ប្រធានស្តីទីបក្សសង្គ្រោះជាតិ បានបញ្ជាក់ទៅអ្នកគាំទ្រនិងអ្នកសារព័ត៌មានថា លោកស្នាក់នៅទីស្នាក់ការជាង៤ខែមកនេះ គឺដើម្បីជាការតស៊ូមតិ ជាការទាមទារនូវដំណោះស្រាយនយោបាយ គឺអត់ចង់ឲ្យមានអំពើហិង្សានោះទេ។ លោកសង្កត់ធ្ងន់ថា ដំណោះស្រាយនយោបាយដែលបក្សប្រឆាំងចង់បាន គឺដោយអហិង្សា និងសន្តិវិធី។
ក្រៅពីបញ្ជាក់សាជាថ្មីពីគោលបំណង និងគោលដៅរបស់បក្សសង្គ្រោះជាតិ, លោក កឹម សុខា ប្រាថ្នាចង់បាន បរិយាកាសនយោបាយ ដែលមានភាពប្រក្រតី ទាំងមុនថ្ងៃបោះឆ្នោត នៅថ្ងៃបោះឆ្នោត និងក្រោយនៅពេលបោះឆ្នោត។ បើតាមអ្នកនយោបាយរូបនេះ បើគ្មានបរិយាកាសនយោបាយល្អប្រក្រតី និងស្មើភាពគ្នាទេ នោះលទ្ធផលបោះឆ្នោត គឺមិនឆ្លុះបញ្ចាំងពីឆន្ទៈពិតប្រាកដរបស់ប្រជាពលរដ្ឋនោះឡើយ។ មុននឹងបញ្ចប់សន្ទរកថាខ្លីរបស់ខ្លួន អនុប្រធានបក្សសង្គ្រោះជាតិ បង្ហាញក្តីរំពឹងថា គ្រប់ភាគីនយោបាយ ត្រូវអាចប្រកួតប្រជែង ដោយស្មើភាព សេរី ត្រឹមត្រូវ និង យុត្តិធម៌ ហើយពីថ្ងៃនេះទៅមុខ លោក កឹម សុខា សង្ឃឹមថាបរិយាកាសនយោបាយ នឹងដើរទៅរកប្រក្រតីភាពឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ